Мемлекет басшысының «Әкімдердің халыққа есеп беру кездесулерін өткізу туралы» Жарлығына сәйкес, барлық деңгейдегі әкімдердің есептік кездесулері өтуде бұл күнде. Өткен аптаның сейсенбісінде Семей қаласының әкімі Ермак Бидахметұлы Сәлімовтің есептік кездесулері басталып, апта соңында Абыралы өңірінде өз жалғасын тапты. Өткен жылы атқарылған жұмыстар қорытындыланып, ағымдағы жылға, алда тұрған ауқымды істердің жоспары айтылатын есептік кездесулерде бірқатар мәселелер қамтылды. Ермак Бидахметұлы әсіресе, ауылдарды ауыз сумен қамтамасыз ету, көшелерді жарықтандыру, ауылшаруашылық өнімдерін арттыру, мал басын көбейту және асылдандыру, инвестиция тарту, шағын және орта бизнесті өркендету бағытындағы атқарылған жұмыстарға кеңінен тоқталды. Табиғат тосын мінез танытып, ақ түтек боран кездесулерді кешеуілдетіп, «жол жоқ, келмей –ақ қойыңыздар» деп таңқалдырған Таңат ауылдық округінің әкімінің әттеген-айы болмаса, жалпы Абыралы өңіріндегі кездесулер абыроймен өтті.
Өткен бейсенбі — жұма күндері қала әкімі Ермак Сәлімовтің 2015 жылдың әлеуметтік-экономикалық дамуы туралы тұрғындар алдындағы есебі Знаменка, Жазық, Айнабұлақ, Ақбұлақ, Таңат, Абыралы, Қараөлең, Алғабас ауылдық округтерінде жалғасын тапты. Кездесулерге қалалық мәслихат депутаттары, ауылдық округтер әкімдері, сондай-ақ сала басшылары қатысты.
Знаменка ауылдық округіндегі кездесуде алғаш болып сөз алған ауылдық округ әкімі Әбусана Қарсақбаев ауылдың әлеуметтік-экономикалық дамуының негізгі көрсеткіштері туралы жылдың қорытындысын баяндады. Есептік баяндамада округ әкімі негізгі басымдықты жыл санып дамып келе жат- қан ауылшаруашылық саласына арнады. Өңірдегі «Өңірлерді дамыту», «Сыбаға», «Алтын асық», «Құлан», «Бизнестің жол картасы — 2020» бағдарламаларын тиімді пайдаланудың нәтижесінде ірі қара малы мен ұсақ мал басы айтарлықтай өскен. Бұл өз кезегінде мал шаруашылығымен айналысатын ауылдағы ағайынның санын арттырып отыр. Бұдан өзге округте ет және сүт өнімдерін өндіру жағы да қалыпты деңгейде. 2015 жылы ет өндіру 2014 жылмен салыстырғанда 2,5 пайызға артқан. Сол сияқты өңірде сүт өндіру 0,2 пайызға өскен. Ауылдық округте жүнді қайта өңдеу саласында да алға ілгерілеушілік бар. Мысалы, өткен жылы өңірде 600 центнер шикізат өндіріліп, оның жартысы «Роза» ЖШС өткізілген.
Округте мал шаруашылығымен қатар материалдық-техникалық базаны жақсарту дұрыс жолға қойылып келеді. Оны шаруалардың жаңа техникалар сатып алуынан байқауға болады. Бұған қоса округте мал бордақылауға арналған алаңдар бар, ал ірі қара мен ұсақ мал басын арттыру мақсатында шаруа қожалықтары асыл тұқымды мал басын арттыруда.
— Ауыл шаруашылығын дамытуға арнал-ған бағдарламалар мен субсидиялар нәтижесі әлеуметтік-экономикалық көрсеткіштің біршама ілгерлеуіне, әрі тұрақты өсім және дамуға қол жеткізгені белгілі. Знаменка ауылдық округі бойынша «Сыбаға», «Алтын асық», «Құлан», «Бизнестің жол картасы — 2020» бағдарламалары бойынша жұмыстар жүргізілді. Мемлекеттік бағдарламалар арқылы ауылдық округтің тұрғындары мал санын арттыру мақсатында шағын несиелер алды, — дейді Знаменка ауылдық округінің әкімі Әбусана Қарсақбаев.
Знаменка ауылындағы жалпы білім беретін орта мектепте бір ауысымда 168 бала білім алады. Шағын орталықта 23 бала тәрбиеленуде. Оқу орнының материалдық-техникалық базасын жақсарту бойынша жұмыстар атқарылуда. Ал балаларды ыстық тамақпен қамтамасыз ету үшін мектептегі асхана жүйелі жұмыс жасауда.
Округ әкімінің айтуынша, өңірдің денсаулық саласын дамытуға да айтарлықтай көңіл бөлінген. Бүгінгі күні ауылдық дәрігерлік амбулатория ғимараты жалға алынған. Қуаныштысы сол, Знаменка ауылында жаңа амбулатория құрылысы аяқталды. Заман талабына сай нысанның құрылыс жұмыстары 2016 жылдың үшінші тоқсанында толықтай аяқталмақ. Бүгінгі күні ауыл тұрғындарына 1 дәрігер және алты медбике қызмет көрсетеді екен.
Семей қаласының әкімі Ермак Сәлімов Мемлекет басшысының бес институтционалдық реформасын жүзеге асыруға бағытталған Ұлт жоспары — «100 нақты қадамда» көрсетілген негізгі бағыттарды орындау мақсатында жұмыстар атқарылғанын, өткен жылы негізгі көрсеткіштер бойынша бірқатар саланың дамуы көңілге қонымды екенін атап өтті.
— Алдымызда тұрған мақсат Елбасы Н. Назарбаевтың «Қазақстан жаңа жаһандық нақты ахуалда: өсім, реформалар, даму» атты Жолдауын іске асыру, халықтың тұрмысын жақсарту. Келешекте біздің жұмысымыз осы бағытта жүретін болады. Өнеркәсіп саласында тұрақтылық байқалады. Жұмысшылар еңбекақысы 2,5 пайызға артқан. Сүт өндірісі мен ет консервілеу, химия өндірісі, бағалы металдар мен машина жасау саласында даму көрсеткіші бар. Экономикалық өсімді қамтамасыз ету үшін біз қайта өңдеу цехтарын қалпына келтіруді қолға алдық. Семей тері илеу комбинаты іске қосылды. Балық өнімдерін дайындайтын «Нептун» кәсіпорыны жұмысын бастады. «Роза» ЖШС өндірісін ұлғайтты, — деді Ермак Сәлімов Знаменка ауылы тұрғындары алдында.
Округтегі іргелі істерге ауыл тұрғындары ризашылықтарын білдірді. Әсіресе, ауыл халқы жолдардың жөнделіп, көшелерге жарықтың берілуі ауыл әкімінің еңбегі деп бағалады. Ауыл халқын алаңдататын маңызды мәселелердің бірі — құрылыс жұмыстары созылып кеткен жаңа амбулатория екен. Кездесуде тұрғындар осы мәселені көтеріп, құрылыс жұмыстарының уақытылы аяқталуына қадағалау жүргізуді өтінді.
Есептік кездесулер сонымен қатар Жазық, Айнабұлақ, Ақбұлақ ауылдық округінде жалғасты. Ауылдық округ әкімдері өткен жылы халық алдындағы есептерінде айтылған сын — ескертпелер мен ұсыныстар бойынша атқарылған жұмыстарға да тоқталып өтті. Бұған қоса мал шаруашылығын дамыту мақсатында атқарылып жатқан жұмыстардың жайы көбірек сөз болды. Бұл ретте Семей қаласының әкімі Ермак Сәлімов ауылдарда мал шаруашылығының мүмкіндігін барынша пайдаланып, мал басын арттыру қажеттігін ескертті. Кездесулерде ауыл халқының әлеуметтік жағдайлары да сараланып, атқарылып жатқан оңды істер сарапқа салынды.
Осыдан кейін Ермак Бидахметұлы Таңат ауылында есептік кездесу өткізуді жоспарлаған еді. Алайда ауа райының күрт өзгеруі, ақпанның ақ түтек бораны жоспарлан-ған кездесуге кедергі келтірді. Оның үстіне қала басшысының келе жатқанынан хабардар ауыл әкімінің қам жасап, қарекет қылудың орнына «келмей – ақ қойыңыздар» деп қол қусырып отырғаны түсініксіз болды. Дегенмен Семей қаласының әкімі Ермак Сәлімов Абыралы, Қараөлең, Алғабас ауылдарындағы кездесулерін сәтімен аяқтап, ат құлағы көрінбейтін ақ түтек боранға қарамастан Таңат ауылдық округіне жол тартты. Жолға шыққанын да, кездесудің өтетінін де округ әкіміне ескерткен болатын. Осылайша ауа райының қолайсыздығына, табиғаттың тосын мінезіне қарамастан жолға шыққан төрт-бес көлік Ақбұлақ ауылы азаматтарының жәрдемімен Таңатқа да жетеді. Алайда ауыл әкімінің кездесу болатыны жайында халықты құлағдар етіп, жинамағаны да еріксіз бас шайқатады. Осы ретте қалың қарды өз күштерімен аршып жеткенде ауыл әкімінің бей-жай қарап отырғаны әлбетте ыңғайсыз екені анық. Аз уақыт ішінде шаһар басшысы жақын маңдағы тұрғындардың басын қосып, арыз-шағымын тыңдады. Қала әкімінің келгенін естіген тұрғындар жиынға келіп, шағымдарын білдірді. Айтуларынша, ауыл әкімі халықты жөнді қабылдамайды, дауыс көтеріп, өтінішке құлақ аспайды. Ең ауыры, жергілікті атқа мінерлердің ауылдың жабылатындығы жөнінде хабар таратып, елді дүрліктіруі. Тіпті, ауылдық округ әкімінің «жабылады емес пе?!», «мен зейнеттемін, қазір-ақ кетуге бармын» — деп қарсы сөйлеуі жөн болмады деп түйдік.
Барлық мәселелерді бүге-шүгесіне дейін естіген шаһар басшысы екі жүздей ғана халықтың қарапайым мәселелерін шеше алмаған ауыл әкімінің жұмысын қатты сынға алды.
Жалпы, кездесулер Абыралы, Қараөлең мен Алғабас ауылдық округтерінде де өтті. Жиында ауылды жерлердің келешектегі дамуы, бағыты, келелі мәселелері сөз болды. Барлық атқарылған жұмыстарды халық жоғары бағалады деуімізге болады. Қала әкімі Ермак Сәлімов ауылды жерлерде мал шаруашылығын дамытуды, алдағы уақытта тері, жүн қабылдау орындарын қайта жандандыру керектігін атап өтті. Қала басшысының пайымынша, бұл өз кезегінде шаһардың да экономикасын көтеруге, кәсіпорындардың жандануына өз септігін тигізбек. Бұдан өзге ет өнімдерін ешқандай делдалсыз қалада саудалауға мүмкіндік беретін сауда орындарын ашу керектігі сөз болды. Мұны ауыл халқы бірден қолдады.
Е.Сәлімов Семей қаласы бойынша жыл көлемінде атқарылған жұмыстарға, әрбір саладағы қол жеткен жетістіктерді жан – жақты баяндады. Өңір экономикасының артып келе жатқанын тілге тиек етіп, сәйкесінше халықтың да әл-ауқатының жақсара түскендігін атап өтті. Барлық кездесулерде әкім жұмысына ауылдағы ағайын оң бағасын берді.
Асан МЫРЗАХАН, «Семей таңы»
