Қазақ инновациялық гуманитарлық – заң университетінде «Нұр Отан» партиясы Семей қалалық филиалының кезектен тыс XXIIІ конференциясы өтті. Конференция жұмысында Семей қаласы мәслихатының депутаттығына кандидаттарды ұсыну мәселесі қаралды. Кезектен тыс өткен конференция жұмысына қала әкімі, «Нұр Отан» партиясы Семей қалалық филиалының төрағасы Ермак Сәлімов төрағалық етті.
Кезектен тыс конференцияға жүзге жуық делегат қатысты. Жиын барысында «Нұр Отан» партиясы атынан Семей қалалық мәслихатының депутаттығына әрбір сайлау округі бойынша кандидаттар тізімі ұсынылды. Делегаттар кандидаттарды бір ауыздан қолдады. Сонымен қатар конференцияда «Қазақстан — 2021: Бірлік. Тұрақтылық. Жасампаздық» сайлауалды бағдарламасының негізгі бағыттары да талқыланды.
— Еліміздегі ең үлкен күш — «Нұр Отан» партиясы. Елбасы, «Нұр Отан» партиясының Төрағасы Н.Ә.Назарбаев партияның кезектен тыс ХҮІІ съезінде сайлауалды бағдарламамызды айқындап берді. Бұл бағдарламаның негізгі өзегі — бірлік, тұрақтылық, жасампаздық. Бірлік бар жерде, түсіністік бар, тұрақтылық бар жерде, даму бар, жасампаздық бар жерде, өркениет бар дегім келеді,- деді «Нұр Отан» партиясы Семей қалалық филиалы төрағасының бірінші орынбасары Зульфия Жамалтдинова.
Конференцияда сөз алған Тоқтарбек Зейнелов «Нұр Отан» партиясы сайлауалды тұғырнамасы жаһандағы экономикалық, саяси дағдарыс кезеңінде халқымыздың бірлігін нығайтумен мемлекетіміздің дамуына жаңа бір серпіліс беретінін атап өтті.
— Партиямыздың сайлауалды тұғырнамасы Елбасы ұсынған 5 институционалдық реформамен сабақтасып жатыр. Сондықтан да партияның сайлауалды бағдарламасы халқымыздың бір ауыздан қолдауына ие болады деген сенімдеміз. «Нұр Отан» партиясының қоғамның барлық түйткілді мәселелерін көтеретін біріктіруші партияға, халықтың партиясына айналғандығын әрбір партия мүшесі мақтан етеді. Сондықтан да партияның әрбір мүшесі сайлауалды бағдарламаны әрбір сайлаушыға жеткізіп, өзімізге артылған саяси салмақ пен жауапкершілікті сезініп, жеңістің жаңа бір белесіне жету үшін барлық күш-жігерімізді біріктіруге шақырамын,- деді Тоқтарбек Зейнелов.
Сонымен қатар конференция- да партияның аймақтық ұйымының Саяси Кеңесі құрамына бірқатар өзгерістер енгізілді.
Асан МЫРЗАХАН,
«Семей таңы»
