Жуырда «Нұр Отан» партиясының Үржар аудандық филиалының кезектен тыс ХХ конференциясы болып өтті. Аталмыш басқосуға партия филиалының саяси кеңес және бюро мүшелері, «Нұр Отан» партиясының аудандық мәслихаттағы фракция мүшелері, облыстық мәслихат депутаттары, ардагерлер кеңесінің мүшелері, «Жас Отан» ЖҚ мүшелері, бастауыш партия ұйымдарының төрағалары қатысты.
Конференцияны партияның аудандық филиалының төрағасы, аудан әкімі Серік Зайнулдин ашып, жүргізіп отырды. Басқосудың күн тәртібіне бірқатар сұрақтар енгізіліпті. Атап айтсақ, бас қосқандар «Нұр Отан» партиясының «Қазақстан — 2021: Бірлік. Тұрақтылық. Жасампаздық» атты жаңа сайлауалды бағдарламасының басымдықтары және аудандық мәслихат депутаттығына үміткерлер кандидатурасын партия атынан ұсыну, облыстық партия конференциясына делегаттарды сайлау және саяси кеңес пен саяси кеңес бюро мүшелерінің тізіміне өзгеріс енгізу мәселелерін өзара талқылауға салды.
Жиын барысында кіріспе сөз алып, баяндама жасап өткен аудан әкімі Серік Зинабекұлы өз сөзінде «Нұр Отан» партиясының алда тұрған басты бағыттары туралы айта келе, партияның XVII съезінде партия Төрағасы, Елбасы Н.Ә.Назарбаевтың сөйлеген сөзінен үзінді келтіріп: «Енді бізге тек қана Ұлт жоспары бойынша жұмыс жасау керек. «Нұр Отан» партиясының «Қазақстан — 2021: Бірлік. Тұрақтылық. Жасампаздық» сайлауалды бағдарламасы бойынша іс-шаралар жоспарын жасап, оның орындалу реттілігі мен тәртібін қатаң бақылауда ұстап, осы бағытта жұмыс істеуіміз қажет», — деді. Сонымен қатар аудан әкімі партия бағдарламасының негізгі басымдықтарына шолу жасап өтті. «Алдымыздағы бес жыл Қазақстанның ХХІ ғасырдағы тағдыр-талайы қандай болатынын айқындайды. Біздің еліміздің беріктігі, біздің бәріміздің беріктігіміз сынға түсетін болады. Баршамызды елді жаңарту орайындағы ауқымды жұмыстар күтіп тұр. Біздің міндетіміз елді сақтау, Егемендікті нығайту және Ұлттың болашаққа барар жолын батыл ашу. Біз жаһандық сын-қатерлерден бұғып қала алмаймыз. Біз осыған қасқайып қарсы тұруға тиіспіз», — делінген бағдарламаның кіріспесінде. Жалпы, аталған құжат бес институционалдық реформа шеңберіндегі «100 нақты қадам» Ұлт жоспарының негізгі бағыттарын қамтиды.
Тұтастай алғанда, бағдарлама сегіз бөлімнен тұрады. Онда жаһандық сын-қатерлер және жаңа нақты ахуал мәселелеріне шолу жасалып, нақты іс-қимылдар қамтылған. Сонымен қатар алдағы уақытқа межеленген экономикалық қайта өрлеудің негізгі бағыттары да аталмыш бағдарлама мазмұнынан айқындалады. Алдағы жылдарда жаңа әлеуметтік саясат бекітіледі. Соның ішінде тиімді әлеуметтік мемлекет, тұрғындардың әлсіз топтарын қолдау, еңбекпен қамту, жаңа тұрғын үй саясаты, денсаулық пен білім беруді үздік әлеуметтік стандарттарға жеткізудің нақты жоспарлары көрсетілген.
Бұдан бөлек экономикалық қайта өрлеу бағыттары бойынша жекешелендіру және тиімді меншік иелерін қолдау, жаңа инвестициялық саясат, экономикалық қауіпсіздік шараларының нақты жоспары белгіленген.
Осы орайда, сайып келгенде, партияның сайлауалды бағдарламасында қамтылған мақсаттарға қол жеткізу жолы бүкіл қазақстандықтардың бірлескен іс-қимылында жатыр. Бұл ретте үржарлық партия мүшелеріне де жұмыла жұмыс жасау қажет. «Сондықтан да, партиямыз Қазақстанның барлық азаматтарын бірлікке шақырады. Бүгінгі біздің басты миссиямыз — қоғамды Елбасы Н.Назарбаевтың төңірегіне топтастыру. Оның стратегиялық бағыты дағдарыстан нығайып және бәсекеге ана-ғұрлым қабілетті болып шығуға жағдай жасайды», — делінген бағдарламада.
Осыған байланысты «Нұр Отан» партиясы барлық отаншыл азаматтарды еліміздің игілігі үшін өз бағдарламасын қолдауға шақырады. Аудандық партия филиалының төрағасы Серік Зинабекұлы да барша үржарлықтарды осынау жолда бірлесіп еңбек етуге шақырды.
Келесі кезекте жарыссөзге шыққан партия мүшелері Жайық Жұмақұлов, Зухра Бейсенбек, Бауыржан Сейітқановтар өз ойларын ортаға салып, партия бағдарламасының маңызды мәселелерді қамтығанын айта келе, аудан әкімінің пікір-ұсыныстарын қолдайтындарын жеткізді.
Жиын барысында қозғалған келесі мәселе бойынша филиал төрағасы, аудандық мәслихат депутаттығына үміткерлер кандидатуралары тізім бойынша партия атынан ұсынылып, делегаттар тарапынан қолдау тапты.
Бауыржан ЖАҚЫП,
«Семей таңы»
