Ақпан айының 15-і Кеңес әскерінің Ауған же-рінен шығарылған күні. Бұл тарихи дата ұзақ жылдардан бері, байтақ еліміздегі тәрізді, Семей қаласында да ерекше шаралармен аталып өтіледі. Кеше, апта дүйсенбісінде, Кеңес әскерінің Ауған жерінен шығарылғанына 27 жыл толуына орай, қаламызда салтанатты шара өтті. Ауған соғысында қаза тапқан боздақтарға арнал-ған ескерткіш алдында өткен жиынға Ауған ардагерлері, қаза болған жауынгерлердің аналары мен туыстары және қаламыздағы оқу орындарының студент жастары мен зиялы қауым жиналды.
Ерекше шара ең алдымен ескерткішке гүл шоқтарын қойып, сол бір жылдарда жат жерде қаза тапқан жауынгерлерді бір минут үнсіздікпен еске алумен басталды. Осыдан кейін қала әкімінің орынбасары Надежда Шарова көпшілік алдында сөз алды.
— Құрметті жерлестер, қадірменді Ауған соғысының ардагерлері. Арада 27 жыл өтсе де, ауған же-рінде орын алған соғыстың халық жүрегіне салған жарасы, қайғы – қасіреті елдің санасынан өшпек емес. Елдікті құрметтеу, батырлықты дәріптеу, боздақтар рухын еске алу әрдайым азаматтық міндетіміз болып қала береді. Ауған соғысы деген атпен тарихқа енген майдан даласындағы қасірет біздің де сарбаздарымызды айналып өтпеді. Әскери міндет, жауынгерлік жауапкершілік деген ұғымдар сарбаздар мен сардарларды от пен оқтың арасына аттандырды. Осынау сұрапыл кездерде бұрынғы Семей облысында 1100 жауынгер Ауған жеріне аттанып, соғыс кезінде 46 жерлесіміз қазаға ұшырады. Екі адам хабарсыз кетті. Жараланып, жарақат азабын шеккендер де аз емес. Олардың есімдерін ел болып ұлықтау игі дәстүрге айналды. Бүгінде Семей қаласында 487 Ауған соғысының ардагері бар. Олар майдан даласынан қайтпай қалған қаруластарының отбасыларына қамқорлық көрсетіп, қаламыздағы әскери-патриоттық шаралардың өтуіне де атсалысуда, — деп атап өткен Надежда Васильевна осынау шараның маңыздылығына да тоқталды.
Осыдан кейін сөз алған ҚР Қарулы Күштерінің ардагері, генерал-майор Александр Мартынов та жастарға арнап жалынды сөз сөйледі. Ауған соғысы ардагерлері мен мүгедектерінің қоғамдық бірлестігінің төрағасы Боранбай Бегатов сөз сөйлеп, осынау бейбіт күннің қадірін білуге шақырып, Ауған соғысында қаза болған қаруластарының есімдері ешқашан ұмытылмайтынын жеткізді. Сонымен қатар бүгінде арамызда жүрген Ауған соғысы ардагерлерінің жастарымызға патриоттық тәрбие берудегі еңбектеріне де тоқталды.
Ал қаламыздың жас буын өкілдері арасынан сөз алған Семей қаласының Шәкәрім атындағы мемлекеттік университетінің студенті Қуаныш Молдақашев жалынды тілек білдірді. Барша жастарды елдікті құрметтеуге шақырып, Ауған соғысы ардагерлерін үнемі жадыда тұту керектігі туралы айтып өтті. Осыдан кейін дарынды балаларға арналған Шоқан Уәлиханов атындағы «Жас Ұлан» арнайы ерлер мектеп-лицейінің шәкірттері әскери сән-салтанатпен сап түзеп жүріп өтті.
Шара барысында қала жастары Ауған даласында шейіт болған сарбаздар аналарына гүл шоқтарын табыс етті, естелік суреттерге түсті.
Қуаныш ЖОЛЫМБЕТ,
«Семей таңы»
