Елімізді индустриялық-инновациялық дамытудың 2015 — 2019 жылдарға арналған мемлекеттік бағдарламасы «Қазақстан — 2050» Стратегиясының ұзақ мерзімді басымдықтарын, еліміздің әлемнің дамыған 30 елі қатарына кіру жөніндегі тұжырымдамасын іске асыру мақсатында әзірленген. Өңдеуші өнеркәсіпті ыталандыру, әртараптандыру және бәсекеге қабілеттілігін арттыру, шағын және орта кәсіпкерлікті дамыту бағытында аталмыш бағдарламаның берері мол. Кәсіпкерлерге жаңа көкжиек ашатын бағдарламыны жан – жақты түсіндіру мақсатында өткен аптада «Даму» Кәсіпкерлікті дамыту қоры» АҚ-ның Семей қаласындағы филиалында семинар – кеңес ұйымдастырылды.
Семинар – кеңес ҚР ҰКП – ның ШҚО Семей қаласы филиалының бастамасымен өткізілді. Оған Семей қаласы кәсіпкерлік бөлімінің басшысы Марат Нүгеров, ҚР ҰКП-ның Семей қаласы филиалының директоры Ардақ Әділжанов, «Даму» Кәсіпкерлікті дамыту қоры» АҚ-ның өкілдері және қаладағы кәсіпкерлер қатыс- ты. Айта кету керек, өткен жылы елімізде индустрияландыру саясатының бірінші бесжылдығы сәтті аяқталған еді. Нәтижесінде көпетеген инвестициялық жобалар жүзеге асырылып, ел экономикасының күре тамырына қайта қан жүгірді. Қалалық кәсіпкерлік бөлімінің басшысы Марат Нүгеров индустриялық — инновациялық дамытудың мемлекеттік бағдарламасының орындалуына семейліктер де атсалысып келе жатқанын айта келе, өткен жылы іске қосылған жобаларға тоқталды.
— Семей қаласының әкімдігі индустрияландырудың бірінші бесжылдығына 30-дан аса жоба ұсынды. Аталған жобалардың 17-сі мақұлданып, республикалық индустриализация картасының тізіміне қосылды. Мәселен, «Семей асбест-цементтік бұйымдар зауыты» ЖШС-де автоклавты газобетон өндірісі сәтті іске қосылған болатын. Оның жобалық құны 305 млн. теңгені құрады. Бұл жобаның болашағы зор. Бүгінде кәсіпорын еліміз бойынша құрылыс материалдарын шығаратын алдыңғы қатарлы өндіріс ошағына айналды. Осы зауыттың өнімдері құрылыс жұмыстарын мерзімінен бұрын аяқтауға мүмкіндік береді. Сондай-ақ Семей машина құрастыру зауыты «Маз» маркілі жүк көлігінің соңғы үлгісін жинақтауды жоспарлап отыр. Бұл өз кезегінде аймақ экономикасының дамуына оң әсерін тигізетіні анық. Сонымен қатар «Семей Сплав» ЖШС туралы айтуға болады. Кәсіпорында шығарылатын қорғасын Өскемендегі қор-ғасын-мырыш комбинатының өнімдерінен кем түспейді. Келешекте зауыт өзге де өнім түрлерін дайындауды қолға алып, жұмысы еселене түсетініне сенімдіміз,- дейді қалалық кәсіпкерлік бөлімінің басшысы.
Семинар – кеңесте Марат Нүгеров алдағы уақытта Семейде қант қызылшасын өңдейтін зауыттың салынуы мүмкін екенін айтты. Бөлім басшысының айтуынша, бүгінде қала тұрғындары, жалпы, 5 мың тоннаға дейін қант тұтынады екен. Ал қант қызылшасын өзімізде өңдейтін болсақ, ішкі және сыртқы сұранысты реттеуге жол ашылмақ.
Жақсылық
МҰРАТҚАЛИҰЛЫ,
«Семей таңы»
