«Нұр Отан» партиясының Семей қалалық филиалының қоғамдық қабылдау бөлмесінде Шығыс Қазақстан облысының жер қатынастары басқармасының басшысы Қонысбай Төлеубеков азаматтарды жеке мәселелері бойынша қоғамдық қабылдау өткізді.
Қоғамдық қабылдауға келген қала тұрғыны Айнұр Секманова 2007 жылдан бері жер телімін алу кезегінде тұрғанын, алғашқыда кезегінің жиырма екінші, кейін білгенінде өзінің тізімде 1 820 болып тұрғанын қалғанын айтып шағымданды. Айнұр Секманова сонымен қатар қала іргесіндегі Степной кентінде бос жатқан он сотық жер телімінің барын айтып, сол жерді заңдастыру мүмкіндігі туралы сұрап білді.
Шығыс Қазақстан облысының жер қатынастары басқармасының басшысы Қонысбай Төлеубеков қабылдауға қатысып отырған Семей қаласы жер қатынастары бөлімінің басшысы Сүлеймен Медеуовпен шағымданушы мәселесіне байланысты кеңесе келе, алдымен тиісті құжаттарын жинақтап, қалалық жер қатынастар бөліміне жүгіну керектігін атап өтті. Осы ретте Семей қаласы жер қатынастары бөлімінің басшысы Сүлеймен Медеуов 2005-2007 жылдар аралығында жер телімдерін алып, алайда құжаттарын рәсімдеп үлгере алмаған азаматтарға ғана жер телімдері біріліп жатқанын атап өтті. Ол сондай-ақ бос жатқан жер телімдері бойынша азаматтардың көптеп жүгінетінін, дегенмен ондай жерлердің тек кезек бойынша берілетінін түсіндірді.
— Бүгінгі күні кезек бойынша берілетін Қарағайлы ықшам ауданындағы жер телім-деріне су мен жылу тартылған жоқ. Ал Суық бастау кентіне кәріз жүйесі тартылды. Электр энергиясы да жартылай жүргізілген. Дегенмен су әзірге жеткізілген жоқ. Ол ауданда он сотықтан 2,5 мың жер телімі бар, — деді Сүйлеймен Медеуұлы.
Шығыс Қазақстан облысының жер қатынастары басқармасының басшысы Қонысбай Төлеубеков алдымен инфрақұрылым желілері тартылмай, ешқандай жер телімі берілмейтінін тағы бір мәрте атап өтті. Басқарма басшысы ең алдымен берілетін жер телімдерінің талапқа сай болуын басты назарда ұстайтындарын жеткізді.
Қоғамдық қабылдауға келгендердің басым көпшілігі баспана салатын жер телімдеріне жылдар бойы қолдары жетпей жүргендерін айтып шағымданды. Сондай-ақ қоғамдық қабылдауда жер дауы, жерді рәсімдеу мен тіркеу мәселелері, жер телімдерін жекешелендіру сынды мәселелер де назардан тыс қалған жоқ. Бұл ретте жер қатынастары басқармасының басшысы қоғамдық қабылдауға келген азаматтардың өтініш – тілектерін өзінің жеке бақылауына алатынын атап өтті.
Асан МЫРЗАХАН,
«Семей таңы»
