Семей қаласының әкімі Ермак Сәлімов сенбі, 13 ақпан күні шаһардағы № 4 жалпы білім беретін орта мектепке арнайы барды. Ермак Бидахметұлының аталмыш білім ордасына келуі тегін емес. Өйткені мектеп әкімшілігі білім беру нысанының шатыры және жылу жүйесін жөндеу жұмыстарына қала бюджетінен 51 млн. теңгеден астам қомақты қаражат сұраған еді. Тіпті бұл мақсатқа жобалық – сметалық құжаттары да әзірленіп, байқау да жарияланған екен. Бір ғана мектептің шатыры мен жылу жүйесін қалыпқа келтіру үшін осыншама қомақты қаражаттың қажеттілігі, әлбетте, қала әкімінің назарын аударған болатын. Мәселенің анығына көз жеткізу үшін Ермак Бидахметұлы арнайы сала мамандарын ерте келіп мектептің шатыры мен жылу жүйелерін өз көзімен көрді.
Мемлекет басшысы Н.Назарбаев өзінің халыққа арнаған кезекті Жолдауында мемлекет бюджетінің шығындарын үнемдеп, оңтайландыру шараларын жүргізу керектігін қатаң тапсырғаны бәріміздің жадымызда. Мемлекет басшысының тапсырмасына сәйкес, бюджеттік шығындарды үнемдеу Шығыс Қазақстан облысының әкімі Даниал Ахметовтің назарынан да тыс қалған емес. Шығыстарды оңтайландырып, бюджет қаражатының тиімсіз пайдаланылуын болдырмау шаралары Семей шаһарында да оңтайлы жүзеге асырылуда. Семей қаласының әкімі Ермак Бидахметұлының айтуынша, шығындарды қайта қарастырып, бюджет қаражатын отыз пайызға үнемдеп жатқанда, әрбір қаражаттың жұмсалуын қадағалау аса маңызды.
Қала әкімінің қаламыздағы №4 жалпы білім беретін орта мектепке келудегі мақсат та сол қаражаттың қаншалықты орынды жұмсалуын тексеру еді. Алайда әкім мектеп шатыры мен жылу жүйесін жөндеу жұмыстарына сұралып отырған қаражаттың орынсыз екенін байқаған. Сондықтан да жергілікті сала мамандары мен тілшілер қауымын ерте келіп, тағы бір мәрте дәлелдеп берді.
Мәселенің мән-жайына тоқталсақ. Аталмыш білім ошағының әкімшілігі ғимараттың шатырын күрделі жөндеуге жергілікті бюджеттен 31 млн. теңге қаражат бөлуді сұраған. Ол үшін жобалық-сметалық құжаттар да әзірленіп, күрделі жөндеу жұмыстарын жүргізу үшін байқау да жарияланып қойыпты. Арнайы мамандармен келген қала басшысы мектеп шатырының ешқандай күрделі жөндеуді талап етіп отырмағанын, қажет болған жағдайда аракідік шатырлардың ғана ауыстырылуы мүмкін екенін атап өтті.
— Өздеріңіз көріп тұрғандай, мектептің шатырын ауыстырудың қажеті жоқ. Оның орнына жөндеуді қажет ететін № 43 жалпы білім беретін мектепке қаржы бөлуіміз керек. Бұлай жасауға болмайды, — деген қала әкімі Ермак Бидахметұлы мектеп басшылығының жөндеу жұмыстарын жүргізу үшін байқау да жариялап үлгергенін, бірақ оны дереу тоқтататынын жеткізді. Әкім бұған қоса мектеп басшысының жылу жүйесінің де тозығы жеткенін айтып, оны жөндеуге 20 млн. теңгеден астам қаражат қажеттігін айтқанын атап өтті. Аталмыш мәселе бойынша сөз алған «Теплокоммунэнерго» МКК-нің техникалық директоры Николай Ушаков мектептің жылу жүйесінде қандай да бір қиындық туындап отырмағанын айтып, тек барлығына шаруашылық тұрғысынан қарау керек деген пікір білдірді.
— Бүгінгі күні жертөледегі жылу, мектептің ішіндегі жылудан екі есе көп болып отыр. Жертөледегі жылу жүйелері қалыпты жағдайда жұмыс жасап тұр. Сондай-ақ бірінші қабатқа жөндеу жұмыстарын жүргізген кезде жылу жүйесін жауып тастаған. Бар болғаны осыларды қалыпты жағдайға келтіру қажет. Өз басым бұл жерде жылу жүйесіне ешқандай күрделі жөндеу жүргізуді көріп тұрғаным жоқ, — деді «Теплокоммунэнерго» МКК-нің техникалық директоры Николай Ушаков.
Қала әкімінің айтуынша, шаһардағы № 39 мектепте де осындай жағдай қайталанып отыр. Аталмыш білім ошағының шатыр тіреуіштерінің (стропила) жағдайы жақсы. Тек шатырын ғана ауыстыру керек екен.
— Аталмыш мектептің ескі екені рас. Сондықтан да ол мектеп бойынша да жөндеу жұмыстарын жүргізуге байланысты ұйымдастырылған байқаудың барлығын тоқтататын боламыз. Бұл екі мектептің жобалық-сметалық құжаттарын қайта қарастырамыз. № 39 мектептің төбе жабындысы ғана ауыстырылып, жөндеу жүргізіледі, — деді Ермак Бидахметұлы. Есесіне бұл қаражат ететін № 43 мектептің шатырын жөндеуге жұмсалмақ. Айта кетейік, қала басшысы барған № 4 жалпы білім беретін орта мектептің жылу жүйесін жөндеу үшін жасал-ған жобалық-сметалық құжат та қайта қарастырылмақ. Бір сөзбен айтқанда, алдағы уақытта білім ошақтарын жөндеуге бөлінген қаражат қайта қарастырылып, жөндеуді шынымен қажет ететін мектептерге қайта бөлінбек.
Асан МЫРЗАХАН,
«Семей таңы»
