Елімізде қайырымды азаматтар тарапынан жасалып жатқан қамқорлық шаралары аз емес. Бұл ретте Семей қаласындағы қазақ-түрік лицейі ұйымдастырған қайырымдылық шарасын ерекше атап өтуге болады. Енді кез — келген аз қамтылған отбасы қаладағы дүкендерден тегін нан ала алады. Айта кету керек, мұндай бастаманы семейліктер өңіріміз бойынша алғашқылардың бірі болып қолға алған.
Сөз басында айтып кеткеніміздей, өткен аптада шаһарымыздағы бірқатар сауда желілерінде тегін нан таратыла бастады. Аталған шара «Біз бірге мықтымыз» акциясы аясында жүргізілуде. Осылайша аса мұқтаж жандар әлеуметтік дүкендерден тегін нан ала алады. Мұндай бастама қала әкімдігі тарапынан да үлкен қолдауға ие болған. Тегін нан қаламыздағы «Адал» супермаркетінің 5 орталығындағы арнайы сөрелерге қойылыпты. Акцияның негізгі мақсаты — әлеуметтік көмекке зәру, қамқорлықты қажет ететін отбасылар мен зейнеткерлерге көмек көрсету. Болашақта арнайы сөрелерге басқа да азық түліктер қойылып, оған семейліктер қолдау көрсетеді деп күтілуде.
— «Біз бірге мықтымыз» акциясының мақсаты оқушыларды адалдыққа және жомарттыққа тәрбиелеу. Өздеріңіз білесіздер, елімізде әртүрлі әлеуметтік шаралар өткізіліп тұрады. Лицей ұжымы да ата-аналармен ақылдаса келе осындай әлеуметтік шараны ұйымдастыруды қолға алды. Мұндай бастамамен мұқтаж жандарға қуаныш сыйлаймыз деп ойлаймын, — дейді Қазақ-түлік лицейінің директоры Ғалымжан Өскенбай.
Тағы бір айта кетерлігі, тегін нан тарату акциясы бір айды ғана қамтымай, жыл соңына дейін жалғасады деп күтілуде. Сондай-ақ шараға кез — келген қала тұрғыны қатысып, сатып алған бір бөлке нанын мұқтаж жандарға арналған арнайы сөреге қалдыра алады. Ақысыз нан тарату шарасы жоғарыда атап өткеніміздей бір реттік шара емес, егер қала тұрғындарынан қолдау болып жатса, алдағы уақытта да жалғасын таппақ. Арнайы сөрелерге наннан өзге азық-түліктер де қойылуы мүмкін.
Иә, қалай дегенмен де, бұл істің игі бастама екені сөзсіз. Әрине, мұндай жомарттыққа екінің бірі бара бермейтіні анық. Сондықтан қаржыларын қайырымдылыққа жұмсаған азаматтарды қашан да қолдауымыз қажет.
Асан МЫРЗАХАН,
«Семей таңы»
