Сочидегі қысқы олимпиаданың басталуына санаулы күндер қалды. Дүбірлі додаға Ердос Ахмадиев, Виктория Ланчикова, Галина Вишневская сынды семейліктер де қатысады. Ел намысын байрақты бәсекеде қорғайтын отандық спортшыларымызды қолдау мақсатында «Цементник» стадионында акция өтті. Акцияға қала әкімі Айбек Кәрімов те қатысып, ел намысын қорғайтын спортшыларға сәттілік тіледі.
{jcomments on}
Ақ олимпиадаға қатысатын спортшыларына Қазақстан ақжол тілеп отыр. Жарыс жолына шығатын саңлақтарымызға жанкүйер болып, қолдау білдірген семейлік жастар да «Цементник» мұз айдынында жиналды. Шара барысында қала басшысы Айбек Кәрімов олимпиадада көк байрағымызды көтеріп шығатын Ердос Ахма- диевтің семейлік екенін мақтанышпен жеткізді. Осы ретте қала әкімі акцияға қатысушы әрбір жасты спортпен шұғылданып, салауатты өмір салтын ұстануға шақырды.
-Сочи олимпиадасына аттанатын спортшыларымызға тек қана табыс, тек қана жеңіс тілейміз. Барлық спортшыларға Қазақстанға тек қана жеңіспен оралыңдар деген тілек білдіргіміз келеді. Семей қаласынан ақ олимпиаданың додасына түсетін үш бірдей споршымыз біздің ғана емес, Қазақстанның намысын қорғайтын болады. Бір ғана шаһардан үш спортшы олимпиадада сынға түсу — үлкен мақтаныш, — деп атап өтті Айбек Мүталапханұлы.
Ердос Ахмадиевтан өзге шаңғы жарысына Виктория Ланчикова есімді тағы бір жерлесіміз қатысатын болса, биатлоннан Галина Вишневская бақ сынамақ. Спортшыларымыздың жарыс алдындағы дайындығы мен көңіл — күйін акцияға қатысушы, спортшы Оксана Яцкая да нақтылай түсті.
-Жерлестеріміз жарысқа жақсы көңіл-күйде аттанды. Өйткені, әрбір спортшы олимпиадалық ойындарға қатысуды армандайды. Дегенмен, қалай болар екен деген күдік те жоқ емес. Соған қара-мастан, мемлекет, жанкүйерлер қолдауының нәтижесінде спортшыларымыз жақсы нәтиже көрсетеді деп ойлаймын, — дейді ҚР еңбегі сіңген спорт шебері Оксана Яцкая.
Олимпиада — тек қана бәсеке емес, ұлттық намыс сынға түсетін орта. Ендеше, намысты ту еткен отандық спортшыларымыздың жеңісті жолдары жемісті болғай дейді акцияға қатысушы жастар.
Ерзат ЖАНАТҰЛЫ,
«Семей таңы»
