Семейдің Абай атындағы әмбебап кітапханасында әнші, көрнекті сазгер, Қазақстанның еңбек сіңірген мәдениет қызметкері, жуырда ғана дүниеден өткен Тұрсынғазы Рахимовтың 65 жылдық мерейтойына арналған «Ұлтының жаны мен жүрегіне айналған өнерпаз» атты виртуалды көрме ұйымдастырылды.
Көрмеге жиналған қауымға Тұрсынғазы Рахимовтың өмірі мен шығармашылығы жайында Есмұқан Обаев, Еркін Шүкіманов, Толу Сембаевтардан жазып алынған сұхбаттар ұсынылып, шәкірттері ұстаз-дарының әндерін орындады. Көрме «Әнге ғашық жүрек», «Актерлік қыры», «Әндер тарихы», «Арнаулар», «Кітаптар», «Бейнежазбалар», «Фотогалерея», «Сілтемелер», «Библиография» сынды бірнеше бөлімдерден тұрды. Жалпы, көрмеге мерзімді басылымдар беттерінде жарық көрген жиырмадан аса мақалалар, сазгердің жеке қорынан алынған фотосуреттер, телеарналардың бейнеқорынан алынған бағдарламалар ұсынылды.
— Сазгер, актер Тұрсынғазы Төлеубайұлының әрбір мерейтойын ұйымдастыру біздің кітапханамызда дәстүрге айналған. 65 жылдық мерейтойына арналған көрмені Тұрсынғазы ағамен келісе отырып бастаған болатынбыз. Алайда ол кісі осы күнге жете алған жоқ. Дегенмен де көрме оқырмандарға жол тартып отыр. Көрменің негізгі мақсаты кітапхананың және сазгердің жеке қорындағы, сондай-ақ сазгер шығармашылығына байланысты мол мағлұматтарды оқырмандарымызға ұсынып, Тұрсынғазы ағаның шығармашылығымен, оның әндерінің шығу тарихымен таныстыра отырып, халыққа насихаттау, — дейді кітапхана директорының орынбасары Гүлмира Аязбаева.
Аталмыш шараға қатысқан Әміре Қашаубаев атындағы Семей мемлекеттік филармониясының директоры, мәдениет қайраткері Адай Азаматов өнерпаз жайында бір ауыз жылы лебізін білдірді.
— Тұрсынғазы Төлеубайұлының ән жазуында да өзіндік ерекшелігі бар. Көптеген композиторлар әнді жазып, артынан сөз іздейді. Бұл кісі алдымен сөзге мән беретін. Оны ой талқысына салатын, одан кейін барып ән туатын. Тұрсынғазы қиналған кезінде Мұқағалидің өлеңдерін оқитын, содан барып ән шығаратын. Бұл да бір ерекшелігі еді. Әнді құйқылжытып айтатын, актерлік шеберлігі де мықты болды. Жүректен шығарып орындаған әндері халық есінде мәңгілік қалмақ,- дейді А.Азаматов.
Аталмыш шараға Тұрсынғазы Рахи-мовтың отбасы мен туған-туыстары, зиялы қауым өкілдері, өзі қызмет еткен облыстық Әміре Қашаубаев атындағы филармония мен Мұқан Төлебаев атындағы музыкалық колледждің қызметкерлері және студенттері қатысты. Шара соңында ақынның жары Фатима апай қонақтар мен кітапхана ұжымына алғысын білдірді.
Белгілі әнші, сазгер Тұрсынғазы Рахимовтың «Дариға, домбырамды берші маған», «Отыздан асып барамын», «Мен сені сағынғанда», «Санаулы күн, санаулы ай, санаулы жыл», «Сәби болғым келеді» секілді барлығы жүзге тарта әні бар.
Асан МЫРЗАХАН,
«Семей таңы»
