«Нұр Отан» партиясының Семей қалалық филиалында саяси кеңес Бюросы мүшелерінің қатысуымен баспасөз жиыны өткізілді. Аталмыш басқосуға «Нұр Отан» партиясының Семей қалалық филиалы төрағасының бірінші орынбасары Зульфия Жамалтдинова, саяси кеңестің Бюро мүшесі, облыстық мәслихат депутаты Марат Құрманбай, қалалық мәслихат депутаты Айнұр Арғынбекова, Семей өңірі бойынша Тұтынушылар құқығын қорғау басқармасының басшысы Бағлан Шегедеков қатысып, ортақ мәселеге байланысты пікірлерімен бөлісті.
Қатысушылар өз кезектерінде тазалықтың денсаулық кепілі екені айтып, қаланың барша тұрғындарын осы акцияға белсене қатысуға шақырды. Бұл ретте сөз алған облыстық мәслихат депутаты Марат Құрманбай:
— Қаланы тазалау шаралары осы екі айлықпен шектелмеуі керек. Алдағы уақыттары да барша халық болып осы істі жалғастыруымыз қажет. Бүгінгі күні тазалық шараларына тек мектеп оқушылары мен студенттер ғана қатысып жүр. Дегенмен шаһардағы кәсіпкерлер де өз үлестерін қосқандары абзал. Осыған байланысты біз алдағы уақытта әртүрлі мекемелермен, жастармен бірлесе жұмыс жасауды жоспарлап отырмыз, — деді өз сөзінде М.Серікжанұлы.
Халық қалаулысы сондай-ақ ағымдағы жыл атаулы күндерге толы екенін, баршамыздың Ел Тәуелсіздігінің 25 жылдығы мен Семей ядролық полигонының жабылғанына 25 жыл толуы сынды мерейтойлы мерекелерге арналған шаралардың куәсі болатынымызды, осыған орай алыс-жақын шетелдерден, еліміздің өзге өңірлерінен қонақтар келетінін атап өтті. М.Құрманбай сол себепті «Нұр Отан» партиясы Семей қалалық филиалы саяси кеңес Бюросы қала тазалығына бейжай қарамайтын барша тұрғындарға үндеу жариялағанын жеткізді.
Өз кезегінде сөз алған «Нұр Отан» партиясының Семей қалалық филиалы төрағасының бірінші орынбасары Зульфия Жамалтдинова қаламыздың әсем де сымбатты таза болуына атсалысу баршамыздың ортақ міндетіміз екенін айтты. Осы ретте ол барша семейліктерді үндеуге қолдау білдіріп, тазалық шараларын жүргізуге күш салуға шақырды. З.Жамалтдинованың айтуынша, бүгінгі күні аталмыш үндеуге «Жасыл ел» жастар ұйымы қолдау білдіріпті. Осыған байланысты жастар ұйымы мен партия белсенділері алдағы сенбі күні қаламыздағы демалыс орындарының бірі Түйемойнақ аралында тазалық шараларын жүргізбек.
Семей өңірі бойынша Тұтынушылар құқығын қорғау басқармасының басшысы Бағлан Шегедеков тазалық шараларына қатысты бастаманы қолдайтындықтарын және алдағы уақытта оған белсенді түрде атсалысатындықтарын жеткізді. Тазалықтың тәрбиеден басталатынын атап өткен Бағлан Салихұлы бүгінгі таңда қала әкімінің тапсырмасымен түсіндіру жұмыстарының жүргізіліп жатқанын да атап өтті. Оның айтуынша, осы атқарылған жұмыстардың нәтижесінде бүгінгі күнге дейін 400 ескерту жасалған. Ал жоспарлы тексеру барысында тазалыққа салғырт қарағандарға сегіз мәрте әкімшілік айыппұл салыныпты.
— Құзырлы орган өкілдері келіп айыппұл салғанын тосып отырмай, тұрғындар тазалық шараларын жүргізіп отырулары керек. Бұл жұмыстар екі айлық барысында ғана емес, күнделікті атқарылуы қажет. Сонда ғана қаламыз көркейіп, әсем шаһарға айналады. Біз алдағы уақыттарда учаскелік полициямен бірлесе жұмыс жасап, тазалық жүргізбегендерге әкімшілік шаралар қолданатын боламыз. Бүгінгі күнгі айыппұлдың көлемі де айтарлықтай қомақты екенін айта кетуіміз керек. Біздің мақсат — айыппұл салу емес, қаланың тазалығын қамтамасыз ету. Өкінішке орай, осыны түсінбейтін тұрғындарымыз да бар, — деді өз сөзінде Б.Шегедеков.
Бас санитардың айтуынша, қазір тұрмыстық қалдықтарды тасымалдаумен айналысатын мекемемен келісімшартқа отырмаған ұйымдардың тізімі жергілікті тәртіп сақшыларына жіберілген. Енді аталған мекемелерге қандай да бір шаралар қолданылатын болады. Сондықтан сала мамандары ұйымдар мен жекеменшік үй иелеріне арнайы қоқыс тасымалдаумен айналысатын мекемемен келісімшартқа отыруға кеңес береді.
Асан МЫРЗАХАН, «Семей таңы»
