Семей қалалық ішкі істер басқармасының криминалдық полиция бөлімінің қылмыстық іздестіру бөлімінде жергілікті БАҚ өкілдері үшін арнайы баспасөз мәслихаты өткізілді. Басқосу барысында өткен жылдың қорытындысы мен бөлімнің қазіргі қызметі жайлы түсінік берген тәртіп сақшылары өңіріміздегі хабар-ошарсыз жоғалғандар мен іздеуде жүргендер туралы кең көлемде мәлімет берді.
Семей қалалық ІІБ-ның криминалдық полиция бөлімінің аға жедел уәкілі Бауыржан Қорабаевтың айтуынша, өткен жылдың басынан бүгінгі күнге дейін Семейде 175 адамға іздеу жарияланыпты. Ал, олардың ішіндегі 92 адам сот шешімімен «хабар-ошарсыз жоғалғандар» деп танылыпты. Іздестіру нәтижесінде бұл жандардың тек 76-сы ғана табылды. Өзгелері әлі республиканың әр түкіпірінен, тіпті іргелес Ресей қалаларынан да іздестірілуде. Сонымен қатар, бұрындары туыстық-қарым қатынасы үзілгендерді іздейтін көші-қон полициясының қызметі ендігі арада осы бөлімге жүктелген. Сол себепті бұдан бұрындары да із-түзсіз кеткендер іздес-тіріле беретін болады.
{jcomments on}- Өңіріміздегі хабар-ошарсыз кеткендердің арасында ақыл-есі кем жандар мен ішімдікке салынғандар көп. Мұндай азаматтардың басым көпшілігі алыстағы қыстақтарда тегін жұмыс күші ретінде құлдықта жүреді. Құжатсыз азаматтардың бірқатары жүргізілген тексерістер барысында анықталды, — дейді бөлімнің жедел уәкілі.
Сонымен қатар, қаңғыбастыққа салынғандар мен туыстарына ескертпестен басқа қалаға кетіп, табыс тауып жүргендер де анықталыпты.
Криминалды полиция қызметкері Азамат Ажыхановтың мәліметіне сүйенсек, өткен жылдың басынан бері табылған 24 мәйіттің нақты тұлғасы анықталмаған.
Бөлім мамандарының айтуынша, хабарсыз жоғалғандар санатында 9 жасөспірім бар екен. Анықталғандай, олардың көпшілігі тәртібі қиын балалар. Тіпті, бір жылдың ішінде екі рет іздеу жарияланғандар да бар. Өткен жылы мұндай жастардың бір-екеуін полиция қызметкерлері Алматы, Талдықорған қалаларынан тауып әкеліпті.
Сонымен қатар, баспасөз мәслихаты барысында тәртіп сақшылары қалалықтар арасында тараған «Шығыс» саяжай алабында пайда болған «кісі өлтіргіш» пен «жоғалған» мектеп оқушылары туралы ақпаратты жоққа шығарды.
— Қалалық ішкі істер басқармасына бұл жайлы ешқандай шағым түскен жоқ. Өңірдегі ахуал бақылауда, — деді басқарманың мемлекеттік тіл және ақпарат бөлімінің басшысы Елубек Оспанов.
Қуаныш ЖОЛЫМБЕТ, «Семей таңы».
