Облыс әкімі Даниал Ахметов арнайы кеңесте жауапсыз мердігерлер тізіміне енгізу туралы талап арыздарды сотқа уақытында ұсынуды және бақылауды күшейтуді талап етті. Айталық, осындай компаниялар әрекеттерінің кесірінен бірқатар нысандар әлі күнге дейін пайдалануға берілмеген.
Аймақ басшысы облыстың құрылыс басқармасы бірде-бір жұмыс мерзімінің бұзылу дерегі бойынша дер кезінде сотқа талап арыздарды ұсынбағанын атап көрсетті. Бүгінгі таңда 24 мемлекеттік сатып алуларға қатысушының тек үшеуі ғана жауапсыз болып танылып, екі жылға дейін тендерлік процедураларға қатысу құқығынан айырылған.
— Бұған себеп – құрылыс басқармасында жауапсыз мердігерлердің нақты тізімі болмаған. Осы мәселе бойынша заңнамаға сәйкес жұмыс істеп, дереу сотқа арыз беру керек. Барлық мемлекеттік органдар осы мәселеге назар аударулары тиіс,– деді Даниал Ахметов.
Айта кету керек, осындай компаниялардың өз міндеттеріне деген салғырттығынан облыстағы қан орталығының, балабақшалар мен мектептердің, интернат үйінің, оңалту орталығының және көптеген басқа да әлеуметтік нысандардың құрылыс мерзімдері созылды. Дәл осы себепке байланысты бүгінгі таңда төрт мектептің құрылысы, Зырян ауданындағы оңалту орталығына тиесілі әкімшілік ғимараттың және тағы төрт нысанның жаңғырту жұмыстары аяқталмаған. Осы ретте мына бір тиімсіз жұмыс жүйесі жайында айта кету орынды. Мәселен, мердігер нысанды және ол бойынша тиісті қаржыны алып, қарыздарын қайтарады немесе алдыңғы нысандардағы кемшіліктерді жояды. Соның салдарынан, жаңа құрылыс алға жылжымайды, не болмаса жұмысшылар айлап еңбекақыларын күтеді.
ШҚО Ақпараттық орталығы.
