Бесқарағай ауданының әкімі Нұрлан Сыдықов жұмыс сапарымен ауданға қарасты Глуховка ауылдық округіне барып, ауылдың тыныс – тіршілігімен танысып қайтқан еді. Нұрлан Бәттәшұлы осы сапарында Глуховка округінде қолға алынған отбасылық дәрігерлік амбулаторияның құрылысымен, сонымен қатар, ауылдың белсенді шаруа қожалықтарының басшыларымен кездесіп, олардың алдағы уақыттың еншісіне белгілеген жұмыс жоспарларымен танысты.
Осы күні аудан әкімі шағын ғана Бірлік ауылында жүзеге асырылған үлкен істің куәсі болды. «Балке» шаруа қожалығының басшысы Оралбек Тоқашевтың бастамасымен іске қосыл-ған сүт-тауарлы фермасының ашылу салтанатына қатысты. Жаңа Жылқы жылының жағымды жаңалықтан бастау алғандығын жақсылыққа жорыған шағын ауыл тұрғындары орталарынан суырылып шыққан еңбекқор азаматқа шынайы ризашалықтарын білдірді. Салтанатты жиынға аудан басшылары, ауданның бетке ұстар ірі шаруа қожалықтарының басшылары, Бірлік ауылының тұрғындары жиналып, қожалық басшысының қуанышына ортақтасып, жүрек жарды тілектерін жеткізді. Ауыл ақсақалы Қалимолла Қайруллин көпшілік алдында талабы таудай, алға қойған мақсаты бар, еңбекқор азамат қиыншылықтардың барлығын жеңіп, отбасымен бірлесе бүгінде еңбегінің жемісін көріп отырғандығын ерекше атап өтті.
{jcomments on}Аудан әкімі мен ауыл тұрғындарына, жалпы жиыл-ған жұртшылыққа Сүт –тауарлы ферманың ішінде 120 бас сауын сиырға орнатылған құрылғының қандай қызметтер атқаратындығын қожалық басшысының өзі таныстырып өтті. Тіпті, сауыншылардың жұмысын жеңілдеткен құрылғының көмегімен сауын қалай жүргізілетіндігі де көрсетілді.
«Жақсының жақсылығын айт, нұры тасысын» дегендей ауданымызда еңбегімен елеулі болып жүрген азаматтар аз емес. Ал, Оралбек Нұрмұхамбетұлы осындай көштің басында. Бүгінде заман талабына сай технологиямен жабдықталған сүт-тауарлы фермасын іске қосып, ауыл тұрғындары үшін қосымша жұмыс көзін ашып отыр.
1995 жылы құрылып, 18 жылдан бері көздеген мақсаттарына жетіп, ерінбей еңбек етіп, аянбай тер төгіп, ауқымды іс атқарып келе жатқан «Балке» шаруа қожалығы бақша дақылдары және сүт өндіру ісімен қатар айналысып, қала халқын сапалы өнімдерімен қамтамасыз етуде. Бүгінде 100 тонна бақша дақылдарын сақтайтын қоймасы, 350 бас ірі қара, 7560 гектар жерге ие шаруа қожалығының алға қойған жоспарлары да жетерлік.
— Сүт-тауарлы ферманы күрделі жөңдеуден өткізіп, заманауи құрылғыны әкеліп, орнатуға 30 млн. теңгеге жуық қаражат жұмсалды. Оның 16 млн. теңгесін екінші деңгейлі банктен 15 пайыздық мөлшермен несие алсам, қалғаны өз қаражатым. Жыл сайын Астана қаласында шаруа қожалықтарына арналған көрме өтетіндігі белгілі. Осы көрмелердің бірінде Өскемен қаласындағы «Аграл» ЖШС филиалының өкілімен танысып, біршама кеңестер алдым. Сосын фермаға 3 айдың ішінде күрделі жөңдеу жүргізіп, құрылғыны орнатуға ыңғайлы жағдай жасалды. Бұл құрылғының көмегімен 120 бас ірі қараны негізі 2 сауыншы ғана атқаруға болады. Десек те, осы күні жаңа фермада 6 сауыншы ауысым бойынша жұмыс жасайтын болады. Бір ірі қарадан күніне шамамен 10 литр сүт алынса, алын-ған сүт құрылғының көмегімен фильтрден өтіп табиғи тазалығын сақтайды. Алдағы уақытта ферма жұмысын кеңейтіп, заман талабына сай тәсілге толық көшсем деген мақсат тұр, — дейді Оралбек Тоқашев.
Елбасының биылғы Жолдауында да агроөнеркәсіп саласына ерекше назар аударылды. Ауылшарушалық саласына жаңа һәм заманауи технологияларды енгізіп, ғылыми тұрғыдан айналысуды Елбасы мықтап тапсырған еді. Міне, аталмыш кәсіпорынның алдағы уақытта Елбасы Жолдауындағы тапсырылған міндеттерге толыққанды жауап бере алатындығына бесқарағайлықтардың сенімі мол.
Әсел ҚАСЫМҒОЖИНА, «Семей таңы»
