Семей қаласының әкімі Ермак Сәлімов «Белес — 2016» атымен өткен мектеп түлектерінің бітіру кешіне қатысып, үздік оқушыларды марапаттады. Атап өтсек, биылғы жылы Семейде мың жарымнан астам оқушы мектеп бітіріп, аттестат алып отыр. Оның ішінде 33 оқушы «Алтын белгі» иесі болса, 19 оқушы үздік аттестатқа ие болды. Семей қаласының білім саласы тарихында алғашқы рет максималды 125 балл жинаған оқушы бар. Ол — №17 орта мектептің түлегі Кәмшат Болат. Қала басшысы түлектердің ересек өмірге басқан қадамдарына сәттілік пен ақ жол тіледі.
17 маусым күні Орталық алаңда Семей қаласының әкімі Ермак Сәлімов Ұлттық бірыңғай тестілеуде өз білімдерін дәлелдей білген семейлік түлектерге «Алтын белгі» төсбелгілері мен үздік аттестаттарды табыстады. Дәстүрлі шараға мектеп түлектері, ата-аналар, білім беру жүйесінің ардагерлері және мектеп мұғалімдері қатысты. Шаһар басшысы түлектерді айтулы оқиғамен құттықтап, жастарды болашақта бұдан да үлкен жетістіктер күтіп тұрғанын айтты.
— Қымбатты түлектер, құрметті ата-аналар, бүгінгі салтанатты кеш баршамызға құтты болсын! Биылғы жылы 1 500 оқушы мектеп бітіріп, аттестат алып отыр. 33 оқушы «Алтын белгі», 19 оқушы үздік аттестатқа ие болды. Жылдың соңында семейлік оқушылар жақсы көрсеткішке қол жеткізді. Жастарымыз осы дәстүрді жалғастырып, болашақта да зор табыстарға жете берсін. Мектеп пен ата-ананың үмітін ақтап, елдің дамуына үлес қосыңдар, қымбатты түлектер. Үлкен өмірге басқан қадамдарыңыз сәтті болсын! Шын жүректен баршаңызға ақ жол тілеймін,- деді Е.Сәлімов.
Қала басшысы балаларды оқытып, әр оқушыны білім нәрімен сусындатқан ұстаздар қауымына да ерекше алғысын білдірді. Мектеп түлектерінде мықты білім негізін қалыптастырып, оларға рухани-адамгершілік бағдар беруде, ересек өмірге дайындауда ұстаздардың алар орны ерекше екенін айта кеткен жөн. Бүгінде елімізде білім саласына қолайлы жағдай жасалған. Жалпы білім беретін мектептер саны жыл сайын артып келеді. Атқарылған жұмыстардың нәтижесінде білім сапасы артуда. Биылғы жылғы ҰБТ қорытындысы бойынша, түлектеріміздің орташа білім көрсеткіші 82,9 балды көрсетіп, 167 түлек жүздің үстінде балл жинаған. Сондай-ақ оқушыларымыз халықаралық олимпиадалар мен ғылыми жобалардан да құралақан қайтқан емес. Жүлделі орындар иеленуде. Салтанатты жиынға 2016 жылғы мектеп түлектерінің атынан «Алтын белгі» иегері Әлішер Тлеубеков және Екатерина Бобко сөз алды. Түлектер қала басшылығына, мұғалімдерге және ата-аналарға көрсеткен қолдаулары үшін алғыстарын білдірді. Театрландырылған көріністен басталған мереке қызыққа толы болды. Қоңырау соғу рәсімі өтіп, «Ақ жол төсеу» жоралғысы жасалынды, түлектер қоштасу вальсін биледі. Мектеп бітіру салтанаты мерекелік концертпен аяқталды. Түлектерді семейлік өнерпаздар да құттықтады.
Асан МЫРЗАХАН, «Семей таңы»
