Өткен жұма, 1 шілде күні «Нұр Отан» партиясының Семей қалалық филиалында қалалық қоғамдық кеңестің отырысы өтті. Жиында шаһарымызда өзекті мәселелердің біріне айналған қалаішілік жолаушы тасымалымен айналысатын қоғамдық көліктердің жайы талқыға салынды. Бұл жолы да кеңес отырысы, әдеттегідей, жолаушы тасымалдаушы мекемелердің өкілдерінсіз өтті.
Билік партиясының ғимаратындағы басқосуға Семей қаласының жолаушылар көлігі және автомобиль жолдары бөлімі басшысының міндетін атқарушы Нұрлан Серғазинов, «Нұр Отан» партиясы Семей қалалық филиалы төрағасының бірінші орынбасары, қоғамдық кеңес мүшесі Зульфия Жамалтдинова, жергілікті бұқаралық ақпарат құралдары мен қоғамдық кеңестің тұрғын үй — коммуналдық шаруашылық мәселелері бойынша құрылған комиссия мүшелері қатысты. Басқосуда алғаш сөз алған қоғамдық кеңес мүшесі Зульфия Жамалтдинова аталған жиынға дейін қаламыздың жолаушы тасымалын бақылау орталығының мамандарымен бірлесе отырып қаланың тасымалдаушы мекемелерінің өкілдерімен кездесулер өткізгенін, сәйкесінше, олардың қоғамдық кеңестің отырысына шақырылғанын атап өтті.
— Жолаушы тасымалы мәселесі бүгінгі күні қаламыз үшін өте өзекті саналады. Сол себепті тасымалдаушылар аталған жиынға шақырылып, қордаланған мәселелер солармен жан-жақты талқыланып, пікірлерін естуіміз керек еді. Алайда олар қоғамдық кеңес отырысына келмеді. Бүгінде, қоғамдық көлік мәселесі талқыланғанда, барлығын тендерге сілтеу әдетке айналды. Бұл дұрыс емес,- деген Зульфия Жамалтдинова қоғамдық көліктердің әлі де тасымалдау ережелерін бұзып, ерте тоқтап қалатынын, олардың кешкілік жолаушылар болмайды дегені әншейін сылтау екенін айтып, мәселенің өзекті екендігін жеткізді.
— Тасымалдаушылар кешкілік жолаушылардың болмайтынын айтып ақталады. Қала халқын кешкі сегізден кейін аялдамаларда тұрмайтындай етіп өздері үйретіп алған. Ойлап қарасаңыздар, автобустың кешкілік ерте тоқтап қалатынын білетін адам қалайша саналы түрде аялдамаға барады?! Сонда қалай болғаны, жолаушылар кешке аялдамаға шығып, тасымалдаушыларды өздері үйретулері керек пе?– деді З.Жамалтдинова.
Бұл ретте сөз алған Н.Серғазинов қаламыздағы қоғамдық көліктер шарт бойынша 9:30-ға дейін жолаушы тасымалдауы керек екенін, алайда оның барлық қоғамдық көлікке қатысты еместігін түсіндірді. Жалпы, жиында аталмыш сала төңірегінде қордаланып қалған біраз мәселелер талқыға салынды. Қоғамдық кеңес мүшелері бұл мәселелердің барлығын алдағы уақыттарда да кең көлемде көтеру керектігін айтты. Жиында БАҚ өкілдері жекелеген тасымалдаушылар туралы да сөз қозғап, кейбір бағыттағы автобустардың тасымалдауларына көңілдері толмайтындарын жеткізді. Бұл тұрғыда сөз алған Семей қаласының жолаушылар көлігі және автомобиль жолдары бөлімі басшысының міндетін атқарушы Нұрлан Серғазинов бұл мәселелер бойынша тиісті жұмыстар атқарылатынын айтты.
Асан МЫРЗАХАН, «Семей таңы»
