30 маусым күні Семей қаласы әкімдігінде қала әкімі Ермак Сәлімовтің төрағалығымен әкімдіктің кезекті отырысы өтті. Әкімдік отырысына қала әкімінің орынбасарлары, қала әкімі аппараты басшысы және дербес бөлім басшылары қатысты. Күн тәртібіне сәйкес, қалалық құрылыс бөлімінің басшысы Б.Жақаев пен сәулет және қала құрылысы бөлімінің басшысы Қ.Қоқилановтың баяндамалары тыңдалды.
Бірінші мәселе бойынша қазандықтар мен ЖЭО-ның қолданыстағы қуаттылығын жаңғырту және қаладағы жылу желілерін қайта жаңғырту туралы және «Нұрлы Жол» мемлекеттік бағдарламасын іске асыру аясында тұрғын үй инфрақұрылымының жағдайы мен дамуы туралы баяндама жасалды. Бұл ретте 2009 жылдан бастап № 1 ЖЭО-да кеңейту және қалпына келтіру жұмыстары жүргізілуде. Жұмыс жобасы ұзақ мерзімді болып табылады және республикалық бюджеттен қаржыландырылады. Жобаның жалпы құны 24, 365 млрд. теңгені құрайды. Жоба бойынша құрылыстың 3 кезеңі қарастырылып, бүгінгі күні 1-ші және 2-ші кезеңдері аяқталды. Құрылыс барысында бекітілген жобалық-сметалық құжаттамаға инженерлік-техникалық және технологиялық жобалық шешімдерге әсер етуші өзгерістер енгізу қажеттілігі туындап, «Павлодарэнергопроект» ЖШС жобалық-сметалық құжаттамаға түзету енгізуді аяқтаған. Қазір жоба мемлекеттік сараптамадан өтуде.
Тұрғын үй құрылысына байланысты Болат Жақаев: «2016 жылға бекітілген кестеге сәйкес Семей қаласында 76,7 мың шаршы метр тұрғын үй барлық бағыттар бойынша пайдалануға беруге жоспарланған»,- деп атап өтті. Бөлім басшысы сонымен қатар Қарағайлы ауданының құрылысы бойынша есеп берді. Бұл ретте Қарағайлы ауданында 147 гектар жерге 9 қабатты, 12 және 16 қабатты 80 үй салу көзделуде. Сондай–ақ 1200 орындық екі мектеп, 379 орындық 3 балабақша және дене шынықтыру және сауықтыру кешені, әлеуметтік нысандар мен мәдени ошақтар салу жоспарлануда. Қала әкімі ақпаратты назарға алып, қаулы жобасына мерзімдері бекітілген нақты тапсырмаларды жазуды жүктеді.
Қалалық сәулет және қала құрылысы бөлімінің басшысы Қ.Қоқилановтың және сәулетші Г.Овчинниковтің Түйемойнақ аралының туристік саласын дамыту туралы баяндамалары тыңдалды. Түйемойнақ аралы қаламыздағы туризмнің рекреациялық ресурсы ретіндегі құрамдас бөлігі болып табылады. Қаланың ескі және жаңа Бас жоспарларына сәйкес, аралдың аумағы қала туристеріне арналған мәдени-көпшілік орындар, спорттық-саябақтық аймақтар қарастырылған рекреациялық аймаққа жатады.
— Түйемойнақ аралының туристік саласын дамыту жобасын іске асыру үшін, функционалдық — қала құрылысы тұрғысында аймақтандыруды, көлемдік — кеңістіктік және сәулет — көркемдік шешімдерді белгілей отырып, жоспарлап ұйымдастырудың негізгі бағыттарын нақты айқындау үшін, ең алдымен, барлық топографиялық және геодезиялық жұмыстарды жүргізе отырып, аралдың жаңа егжей — тегжейлі жоспарлау жобасын (ЕЖЖ) әзірлеу қажет деп санаймын. Себебі жергілікті жер мен Ертіс өзені жағалауының бедері өзгерген,- деп атап өтті Қ.Қоқиланов.
Қала басшысы бұл пікірді құптай отырып, инвесторлар тартуға қатысты жұмыстарды атқаруды тапсырды. Сонымен қатар аралда қызмет атқаратын ортақ бір басқарушы мекемені бекіту үшін ұсыныстар беруді тапсырды.
Семей қаласы әкімінің баспасөз қызметі.
