Семей өңіріне белгілі қазыналы қарт, соғыс ардагері Петр Коломин 90 жаста. Еселі еңбегі кейінгі буынға үлгі боларлық қарияға Семей қалалық әкімдігінде қала әкімі Ермак Сәлімов құрмет көрсетті.
Петр Коломин 1926 жылы бұрынғы Семей облысы Белағаш ауданына қарасты Воскресеновка ауылында дүниеге келіпті. Петр Михайлович өзінің еңбек жолын 1941 жылы «Пролетарий» колхозында бастап, 17 жасында аудандық қаржы бөлімінде аға салық инспекторы лауазымын атқарған. Ал 1943 жылы Қызыл әскер қатарына шақырылып, қосалқы құрамдағы 125-ші атқыштар полкіне қарасты оқу-даярлық батальонында соғыс тактикасын меңгереді. Сондай-ақ ол Ташкенттегі арнайы әскери училищені тамамдап, 1944 жылы майдан даласына аттанған. Соғыс жылдары жас жауынгер 3-ші Беларусь майданындағы ұрыс қимылдарына қатысып, Прибалтика елдерінің және Кенигсберг қаласын азат етуге атсалысыпты. Петр Коломин 1945 жылы Қиыр Шығыстағы стратегиялық маңызды шекара аумағын қорғаған-ды. Алапат айқаста көрсеткен қайсарлығы мен ерлігі үшін Петр Коломинге екі мәрте Ұлы Отан соғысы ордендері, «Кенигсбергті азат еткені үшін», «Белоруссияны азат еткені үшін» және «Германияны жеңгені үшін» медальдары, тағы да бірқатар марапаттар табысталған екен. Ал елге оралған соң, 1952-1954 жылдары «Путрем-9» мекемесінде кадр жөніндегі инспектор қызметін атқарыпты. 1964-1968 жылдар аралығында Омбы облысының аудандық партия комитетінде еңбек етті. 1968-1986 жылдар шеңберінде кеме жөндеу зауыты мен өзен көлігі саласында бірқатар қызметтер атқарады. Осы су жолдары шаруашылығындағы ұзақ жылғы әрі қалтқысыз қызметі үшін жерлесіміз көптеген алғыстарға ие болыпты.
— Құрметті Петр Михайлович! Сізді жергілікті атқарушы билік пен барша семейліктердің атынан осы мерейлі мезетіңізбен құттықтауға рұқсат етіңіз. Қаладағы барлық іс-шараларға сіз үнемі қатысып, өзіңіздің ақыл-кеңесіңізді беріп келесіз. Өскелең ұрпақты патриоттық рухта тәрбиелеуде сіздің орныңыз бөлек. Көптеген жастар өзіңізге қарап бой түзейді. Әрдайым осылай қатарымызда болыңыз. Сізге зор денсаулық тілейміз,- деген Ермак Бидахметұлы, халқымыздың игі дәстүрі бойынша, қарт жауынгердің иығына қазақтың шапанын жапты.
Сонымен қатар салтанатты басқосу кезінде мерейтой иесін «Шығыс» өңірлік әскери қолбасшылығының өкілдері құттықтап, ардагерге арнайы сыйлықтарын тарту етті.
— Қымбатты Петр Михайлович! «Шығыс» өңірлік әскери қолбасшылығының құрамы сізді ерекше құрметтейді. Сізді қандай шараға шақырсақ та, тілегімізді кері қайтармай, үнемі белсенділік танытып қатысып келесіз. Ермак Бидахметұлы атап өткендей, жас ұрпақты отансүйгіштік рухта тәрбиелеуде сіздің орныңыз айрықша. Өзімнің және «Шығыс» өңірлік әскери қолбасшылығының жеке құрамы атынан 90 жасқа толуыңызбен шын жүректен құттықтаймын. Бойыңыздағы күш-қуат таусылмасын. Әрқашан да ауырмай-сырқамай, ортамызда жүре беріңіз,- деді «Шығыс» өңірлік әскери қолбасшылығы әскерлері қолбасшысының орынбасары, полковник Азамат Мұқатаев.
Тоқсанның төріне шыққан қазыналы қарияны қалалық ардагерлер кеңесінің төрағасы А.Доғалақов, Семей қаласы Қорғаныс істері жөніндегі басқарманың басшысы Ж.Ыдырышев құттықтады.
Шара соңында шаһар басшысы жуырда Қарағанды облысында өткен әскери-патриоттық клубтар арасындағы республикалық «Айбын — 2016» сайысында Семейдегі дарынды балаларға арналған Ш.Уәлиханов атындағы «Жас Ұлан» ерлер лицейінің тәрбиеленушілері үздік атанғанын көпшілікке мәлім етті. Жеңімпаздарды қала әкімі арнайы марапаттап өтті.
Жақсылық МҰРАТҚАЛИҰЛЫ, «Семей таңы»
