Арқа төсіндегі еңселі елордамыз Астана күні Есіл жағасында ғана емес, ерке Ертіс пен еліміздің барлық өңірлерінде кең көлемде аталып өтілді. Дәстүрге айналған мерекені семейліктер де атаусыз қалдырмады. Шаһардың әр жерінде түрлі шаралар ұйымдастырылып, оған қалың көпшілік ерекше ықыласпен қатысты.
Семейде Астана күніне арналған мәдени шараның шымылдығы қалалық Достық үйінде ашылды. Бұл жерде қала тұрғындарының назарына шаһардың шығармашылық ұжымдарының қатысуымен мерекелік концерт өтті. Қала тұрғындары мен қонақтарын мерекемен құттықтау үшін концерттік бағдарлама алдында сөз алған қала әкімі Ермак Сәлімов береке мен бірлікті ту етіп, тату–тәтті өмір сүріп жатқан ұлттар достығына айрықша тоқталды. Осыдан кейін жергілікті өнерпаздар Астанаға, ел мен туған жерге арналған әндерін орындады.
Сондай-ақ, елордамыз Астана күні мейрамы мен ҚР Тәуелсіздігінің 25 жылдық мерейтойына орай, шаһардың темір жол вокзалы аумағында қымызмұрындық ұйымдастырылды. Бұл мерекенің тамыры сонау көшпенділер дәуірінен бастау алатыны тарихтан белгілі. Қымызмұрындық дәстүріне сәйкес, алғашқы өндірілген қымыз көрші-қолаң мен мәртебелі меймандарға беріледі. Міне, бабалар салтын берік ұстанған семейлік жұртшылық та «Аяла» мейрамханасының алдында ақ боз үй тігіп, игі дәстүрді қайта жаңғыртып отыр. Мерекелік шара аясында темір жол вокзалы аумағында концерттік сахна қойылып, қаланың жас өнерпаздары патриоттық рухтағы әндерді шырқап, жиналған қауымға көтеріңкі көңіл-күй сыйлады.
— Құрметті қала тұрғындары! Осы мереке күндері біздің әсем шаһарымызда жоғары деңгейдегі түрлі іс-шаралар өткізілуде. Осыдан он жыл бұрын біз қымызмұрындық дәстүрін «Ахау, Семей» ұжымының көмегімен ұйымдастырған едік. Бұл ретте осы шараның өтуіне ұйытқы болған Гүлжихан Жұматаеваға ризашылығымды білдіргім келеді. Сол кісінің арқасында игі дәстүр үзілмей жалғасып келе жатыр. Барлықтарыңызды Семей қаласының әкімі Ермак Сәлімовтің атынан мерекелеріңізбен шын жүректен құттықтаймын!- деген лебізін жолдады қалалық мәдениет және тілдерді дамыту бөлімінің басшысы Берік Көпбаев.
Бұл күні қымызмұрындық дәстүрін көруге көптеген мәртебелі қонақтар келді. Олардың арасында қалалық Достық үйіне қарасты этномәдени бірлестіктердің өкілдері және шаһардың зиялы қауымы болды. Айтулы мерекедегі қуаныш тағы бір игі жаңалықпен толықты. Атап айтқанда, осы аумақтың маңынан қаладағы Спорт колледжінің директоры С.Тоқтарғазиннің тікелей мұрындық болуымен жаңа қымызхананың тұсауы салтанатты түрде кесілді. Лента қию рәсімінен соң, жиналған қауым қымыз бен ыстық бауырсақтан дәм татуға мүмкіндік алды.
Ал осы сәтте спортсүйер қауым үшін айтулы жарыстың салтанатты ашылу рәсімі өтті. Атап айтқанда, «Ертіс» спорт кешенінде ел Тәуелсіздігінің 25 жылдығы мен Астана күніне арналған пауэрлифтингтен Қазақстан Республикасының чемпионаты басталды. Жарыстың салтанатты ашылу рәсімінде қала әкімі Ермак Сәлімов қатысушыларды мерекелерімен құттықтап, сәттілік пен жеңіс тіледі.
— Қайырлы күн, құрметті спортсүйер қауым! Сіздерді Астана күнімен шын жүректен құттықтаймын. Елордамыз Астана – еліміздің жүрегі, еліміздің символы. Астана — ол Қазақстанның рухани байлығы, жаңа келбеті. Мен барлық астаналықтарды, барша қазақстандықтарды Елорда күнімен құттықтаймын,- деді Семей қаласының әкімі Ермак Бидахметұлы өз құттықтауында.
Байрақты бәсеке қаламызда осымен екінші мәрте өткізіліп отыр. Бұл жолғы сайысқа еліміздің 400-ден астам мықты спортшысы бақтарын сынай келіпті. Жарыс алда Ташкент қаласында өтетін Азия чемпионатына іріктеу болып отыр. Зілтеміршілер шілде айының 11-ші жұлдызына дейін бақтарын сынамақ. Жарыстың бас төрешісі Андрей Алтайбаевтың айтуынша, сайыстың алғашқы күнінен-ақ жергілікті спортшылар жақсы өнер көрсеткен.
— Алғашқы күні қыздар арасында сайыс өткізілді. Шығыс Қазақстан облысының қыздар командасы нәтижелі өнер көрсетті. Айта кетуіміз керек, жалпыкомандалық есепте алғаш рет қыздарымыз үшінші орынға ие болды. Бұл өте жақсы көрсеткіш деп есептеймін. Жалпы, Шығыс Қазақстан облысында, оның ішінде Семей қаласында пауэрлифтинг жоғары деңгейде дамып келеді деп айтуға толық негіз бар. Қалада жалғыз бұл емес, барлық спорт түрлері қарқын алуда. Бұл — жастарымыз үшін үлкен мүмкіндік. Барша жарысқа қатысушыларға тек жеңіс тілеймін. Астана күні құтты болсын! Тәуелсіз еліміз, еңселі елордамыз жасай берсін,- деді Андрей Алтайбаев.
Елорда мерекесі «Астана – ару қала» атауымен қалалық Мәдениет сарайында жалғасын тапты. Салтанатты жиынды Семей қаласы әкімінің орынбасары Надежда Шарова ашып, қала әкімі Ермак Сәлімовтің атынан абыройы асқақтаған Астана күнімен құттықтады. — Астана еліміздің жүрегі ғана емес, ол әрқайсысымыздың жүрегімізде. Биыл ел Тәуелсіздігінің 25 жылдығын атап өтеміз. Бұл атаулы күннің де еңселі еліміз үшін маңызы өте зор. Астананың туған күнімен баршаларыңызды құттықтаймын, бейбіт еліміз әрқашан гүлдене берсін. Мерекелеріңіз құтты болсын! — деп құттықтау сөзін қорытындылады Надежда Шарова.
Ресми құттықтау сәтінен кейін концерттік бағдарлама да басталып кетті. Мерекелік бағдарлама барысында Астана жайлы әсем әндер орындалып, жергілікті өнерпаздар халықтың қошеметіне бөленді. Айтулы мереке қаланың Орталық саябағында да көтеріңкі көңіл — күймен аталып өтілді. Бұл мәдени орталықта да жергілікті өнерпаздар өз өнерлерін паш етіп, көпшіліктің көңілінен шықты. Осылайша, жоғары деңгейде ұйымдастырылған ел Тәуелсіздігінің 25 жылдығымен қатарлас келген Астананың 18 жылдық мерекесі қала тұрғындарының көңілінен шықты.
Асан МЫРЗАХАН,
Жақсылық МҰРАТҚАЛИҰЛЫ,
«Семей таңы»
