Өткен сенбі күні Қазақстан Республикасы Тәуелсіздігінің 25 жылдығына арналған «Ұлы дала азаматтары» атты республикалық автокеруен Семей қаласында болды. Осыған орай қаладағы Жеңіс саябағында жастарға патриоттық рухта тәрбие беру және соғыс жылдарында Отан үшін от кешкен батырлардың ерен ерлігін ұлықтау бағытындағы патриоттық шара ұйымдастырылды. Аталған шарада Семей қаласы әкімінің орынбасары Николай Ушаков, «Генералдар кеңесі» республикалық қоғамдық бірлестігінің мүшесі, генерал — майор Марат Мәрденов, соғыс ардагері Ғабдулғазиз Ахмеров, №5511 әскери бөлімінің аға лейтенанты Қуаныш Айтқожиновтар құттықтау сөз сөйлеп, жылы лебіздерін білдірді.
Алдымен автокеруенге қатысушылар Жеңіс саябағында орналасқан Мәңгілік алауға гүл шоқтарын қойып, қан майданда қаза болған жауынгерлерді бір сәт үнсіздікпен еске алды. Қала әкімінің орынбасары Николай Ушаков автокеруенге қатысушыларға «Мәңгілік Ел» патриоттық идеясын жүзеге асырудағы және ұлтаралық келісімді одан әрі нығайтудағы бастамаларына ризашылығын жеткізіп, алғысын білдірді. Осыдан кейін сөз алған автокеруен жетекшісі Марат Мәрденов сапардың басты мақсаты Қазақстанның Мәңгілік Ел екенін көрсету деп атап өтті.
— Бір халық, бір мүдде, бір мақсат қана жетістікке жеткізеді. Халықтың күші бірлікте. Ұлы Отан соғысында бұрынғы Кеңес Одағы халқы фашистік басқыншыларды өзінің бірлігінің, патриоттық рухының, Отанға деген шексіз сүйіспеншілігінің арқасында жеңді. Ата-бабаларымыз өз еріктерімен майданға аттанды. Біздің бүгінгі мақсатымыз — сол қалаларда құрылған әскери құрамалар жайында, солардың құрамында жаумен шайқасып, ерлік көрсеткен батырларымыз жайында әңгімелеп, жергілікті тұрғындардың, әсіресе жастардың бойындағы Отанға деген сүйіспеншілік сезімдерін нығайту,- деген автокеруен жетекшісі Марат Мәрденов жастарды әскери-патриоттық рухта тәрбиелеуде және «Мәңгілік Ел» патриоттық актісін жүзеге асыруға шақыруда аталған шараның маңызы зор екенін атап өтті.
Естеріңізге сала кетсек, Елбасы Н.Ә.Назарбаевтың «Қазақстан жолы — 2050: Бір мақсат, бір мүдде, бір болашақ» атты Жолдауын негізге ала отырып, «Мәңгілік Ел» патриоттық құндылық аясында, Тәуелсіздіктің 25 жылдық мерекесіне орай, «Генералдар кеңесі» республикалық қоғамдық бірлестігі Қазақстан халқы Ассамблеясымен, «Нұр Отан» партиясымен және Қазақстанның интернационалист-жауынгерлерімен бірлесе 4- 12 шілде күндері Қазақстан қалалары бойынша «Ұлы дала азаматтары» атты автошеру өткізуді ұйымдастырған болатын. Бұл шара қазақстандықтардың Мәскеу түбіндегі ұрыста көрсеткен ерлігінің 75 жылдығына арналады.
«Ұлы дала азаматтары» атты республикалық автокеруен Алматы қаласынан бастау алды. Осыған дейін акция қатысушылары Тараз, Шымкент, Түркістан, Бішкек, Қызылорда, Қазалы, Павлодар және Қостанай қалаларында болды. Керуеннің жетекшісі — запастағы генерал-майор Марат Мәрденов, автожарыстың штаб бастығы — запастағы полковник Жұмажан Ерғалымов. Шара соңында Семей қаласының тұрғындары мен акцияға қатысушылар шаһардағы облыстық тарихи – өлкетану мұражайының Ерлік пен даңқ бөлімшесінде болып, одан кейін Аягөз ауданына жол тартты.
Асан МЫРЗАХАН, «Семей таңы»
