Семей қаласындағы М.Төлебаев атындағы музыкалық колледжді көшіру мәселесі оңтайлы шешілді. Аталған оқу орны ағымдағы жылдың 1 қыркүйегінен бастап өз жұмысын шаһардағы Сервис колледжі ғимаратында жалғастыратын болады. Мұндай шешім Шығыс Қазақстан облысы әкімінің орынбасары Жақсылық Омар мен аталған оқу орнының ұстаздары және әкімшілігімен болған кездесуде қабылданған.
Жиын барысында оқу орнының ұжымы арнайы жұмыс тобының шешімімен келісті. Айта кетейік, аталған жұмыс тобының құрамына ұжым өкілдері мен ата-аналар комитеті, сонымен қатар ШҚО білім басқармасы мен «Нұр Отан» партиясының өкілдері кірген болатын.
Оңтайландыру аясында шаһарымыздағы мамандықтары ұқсас Сервис және Бизнес колледждері біріктірілмек. Ал музыкалық колледждің қолданыстағы қазіргі ғимараты Семей қаласындағы мемлекеттік колледждердің студенттеріне арналған жатақханаға айналмақ. Сонымен қатар аталған ғимараттың бір қабаты музыкалық колледждің студенттері мен жас ұстаздарына берілмек.
— Оңтайландыру шараларын жүргізу аясында музыкалық колледжге басымдық бердік. Өйткені, өздеріңіз білесіздер, Семей шаһары — Қазақстанның мәдени астанасы. Ал аталған оқу орны сол мәдени ошақтың бірі саналады. Мен бір келісімге келгенімізге қуаныштымын. Кез келген жаңашылдық қарқынды дамуға серпіліс береді. Жаңа ғимаратқа қоныс аударған кезде, жұмыс барысын қайта қарастыру керек. Шығыс Қазақстан облысында талантты жастар көп. Оларға білімдерін жетілдіріп, оқу орны қабырғасында шығармашылықтарын шыңдау қажет. Оның үстіне жаңа жатақхана жастардың Семей қаласында тұрып оқуларына және жұмыс істеулеріне септігін тигізетін болады. Осы мақсаттарды жүзеге асыру үшін оқу орнының алдағы бес жылға арналған даму бағдарламасын жасап, жаңа мамандықтар ашуды жоспарлау қажет. Облыста оқу орындарында сахна дизайнерлерін, бұқаралық мәдени шаралардың режиссерлерін дайындамайды, әрлеушілер тіпті жоқтың қасы, жетіген, сыбызғы мен басқа да ұлттық аспаптарда ойнауды үйретпейді. Өз кезегінде билік тарапынан сіздерге барлық қажетті көмектер көрсетілетін болады,- деді Шығыс Қазақстан облысы әкімінің орынбасары Жақсылық Омар.
Оқу орнының ұжымы кездесу соңында өңір басшыларына түсіністік танытқандары және орын алған жағдайдың оң шешілгенін үшін ризашылықтарын білдірді
Осыдан кейін Жақсылық Омар Семей қаласындағы көне медициналық мекемелердің бірі қалалық психикалық денсаулық орталығында, сонымен қатар қарттар үйінде болды. Әкім орынбасары аталған екі мекеменің материалдық-техникалық базасына және мамандарына жоғары баға берді.
Асан МЫРЗАХАН, Семей таңы
