Семей қаласы әкімдігінің «Жұмыспен қамту орталығы» КММ мамандары «Нұр Отан» партиясы өкілдерімен, «Өрлеу» жобасының кеңесшілерімен бірлесіп халықтың нысаналы топтарына жататын тұлғаларды уақытша жұмыспен қамту және олардың жұмысқа орналасуына көмек көрсету мақсатында бос орын жәрмеңкесін өткізді.
Бос орындар жәрмеңкесіне бұл жолы жиырмаға жуық көпбалалы және толық емес отбасы мүшелері шақырылды. «Нұр Отан» партиясы Семей қалалық филиалы төрағасының бірінші орынбасары Зульфия Жамалтдинова шараның маңызы мен мақсатына тоқталып, «Нұр Отан» партиясы қашанда халықтың мүддесін қорғайтындығын тілге тиек етті.
Түсіндіру жұмыстарын жүргізіп, бос жұмыс орындарына орналасуға үміткер ретінде тіркелу үшін қажетті құжаттар тізімін атап өткен «Жұмыспен қамту орталығы» КММ-нің бөлім басшысы Марина Часовникова:
— Бос жұмыс орындарына тоқталсақ, тұрақты жұмыс орнына мұғалім, дәрігер сынды мамандар сұранысқа ие. Жұмыс істемейтін тұрғындар үшін мемлекеттік қолдаудың тағы бір түрі — әлеуметтік жұмыс орындары. Мұндай уақытша жұмыс орнына тігінші, құрылысшы, аула сыпырушы, еден жуушы, құжаттарды реттеуші қажет. Өткен жылы бағдарлама арқылы 6 мыңға жуық адам тұрақты және уақытша жұмыс орнына орналасса, 2016 жылдың алғашқы жарты жылдығында 1500-ге жуық адам еңбек шартын жасасты,- деп атап өтті.
Өткен жылмен салыстырғанда үш жақты еңбек шартын жасасқан адам санының аздығын бөлім басшысы «Халықты жұмыспен қамту туралы» жаңа Заңның қабылдануымен тікелей байланысты деп түсіндірді. Ол қолданысқа енгенше, қазынадан халықты еңбекпен қамтуға бөлінген қаржы қалпында сақталып, жұмысқа орналастыру тежеліп тұрады. Десе де келер айда мәселе реттеліп, жылдың соңына дейін тұрғындар жұмыспен қамтылып үлгереді деген сенім бар.
Қазіргі таңда жұмыспен қамту орталығына 2000-ға жуық адам жұмыссыз ретінде тіркелген. Арнайы және жоғары оқу орындарының түлектері жастар тәжірибесі бойынша өз жолдарын тапса, қайта оқыту курстары арқылы да біршама жұмыссыздардың мәселесі шешілмек. Жалпы, жастар тәжірибесі бойынша 35 мың теңге жалақы белгіленген. Жастар қоғамдық бірлестіктер мен мемлекеттік емес өзге де мекемелерге жолданса, жұмыс беруші тарапынан қосымша еңбекақы төленеді. Семей қаласы Сервис колледжін 2015 жылы іс қағаздарын жүргізу және мұрағат мамандығы бойынша тамамдаған Гүлнар Скакова аталмыш шараның маңызы зор деп біледі.
— Бүгінгі шара аса маңызды. Көпбалалы жанұя мүшелері мен толық емес отбасылар уақытша жұмыс орындарымен қамтылуға мүмкіндік алып отыр. Өзім жастар тәжірибесі арқылы өткен жылы бес ай «Казполиграф» ЖШС-де хатшының көмекшісі болып қызмет еттім. Еңбек шартым аяқталған соң, 2016 жылы үш ай Семей қалалық зейнетақы төлеу жөніндегі мемлекеттік орталығында іс қағаздары бойынша қызметкер болдым. Алдағы уақытта, мүмкін болса, Жұмыспен қамту орталығының бағдарламалары аясында жұмысқа орналассам деген ниеттемін,- дейді Гүлнар Скакова.
Жәрмеңкеге қатысушылар өздеріне бос орындарды таңдап, жолдама алды. Ал кеңесшілер оқыту және қайта даярлау курстары, жастар тәжірибесі және қоғамдық жұмыстар жайлы түсіндіру жұмыстарын жүргізді.
Әйгерім ЖАҚЫП, «Семей таңы»
