Семей қаласы кәсіпкерлік бөлімі басшысының міндетін атқарушы Бауыржан Юсупов қаланың кәсіпкерлерімен кездесіп, соңғы кездері бағасы күрт көтерілген қант мәселесін талқылаған жиын өткізді. Аталған басқосуға қаланың көтерме сауда мекемелері мен бірқатар сауда орындарының өкілдері және бұқаралық ақпарат құралдары қатысты.
Қанттың бағасы Семей шаһарында ғана емес, жалпы еліміз бойынша көтеріліп отыр. Маусымдық құбылыс әсіресе қарапайым халықтың қалтасына ауыр тиіп тұр. Қазір жеміс-жидек пісіп, бағасы түсіп жатқанымен, Семейде қант бағасы 300 теңгеден асып жығылды. Кәсіпкерлермен болған жиында қалалық кәсіпкерлік бөлімі басшысының міндетін атқарушы Бауыржан Юсупов бағаның өсуіне еліміздегі қант өндіретін зауыттардың да әсер еткенін атап өтті. Сәйкесінше, көтерме баға да өсіп отыр екен. Кәсіпкерлік бөлімі өкілдерінің айтуынша, өндіруші өнім бағасын өзі белгілейді. Оған жеткізіп беруші 5-6 пайыз, ал сауда орындары 10 пайыз үстеме қосуға құқылы. Айта кетерлігі, қазір Семейде қантты үш мекеме жеткізіп отыр.
— Қант Қазақстан Республикасы Үкіметі бекіткен әлеуметтік маңызы бар 27 тауардың ішіне кіреді. Сондықтан көтерме бағамен алған кәсіпкерлер қантқа 10 пайыздан артық үстеме қоспаулары керек. Ал көтерме сауда орындары қанттың зауыттағы бағасына 5-6 пайыз ғана қосады. Біз қаладағы үш жеткізушімен келісімге келдік. Олар қанттың бағасын 10 пайыз асырмау керектігін, оның әлеуметтік азық-түлік қатарына жататынын көрсетіп отыр,- деген Б.Юсупов тауарды қабылдап алған жекелеген дүкендер мен ірі сауда орындары ол құжатты қабылдай отырып, тауар бағасын шамадан тыс өсірмеуге келісетіндерін атап өтті.
Бауыржан Юсупов қант бағасының күрт көтерілуіне Шығыс Қазақстан облысы бойынша кәсіпкерлер палатасына арнайы хат жолдап, жағдайды бақылауға алуды өтінген. Сол сияқты еліміздегі қант зауыттарынан да осы жағдайға түсінік беруді сұрап хат жолдапты.
Кәсіпкерлік бөлімі мамандарының айтуынша, бұл жағдай жыл сайын қайталанады. Дегенмен бүгінгі күні шаһарда қанттың қоры жеткілікті. Қазір «Спутник» ЖШС-де отыз тонна қант болса, аптаның соңында «Ақ Сұңқар» ЖШС-не қант жеткізу жоспарланып отырған көрінеді. Айта кетейік, шаһар тұрғындары тәулігіне 14 тонна қант тұтынады екен.
Жергілікті билік өкілдері құмшекердің құны аспандап кеткенін жасырмайды. Қант бағасының шамадан асқаны белгілі болғанда, кәсіпкерлік бөлімінің мамандары оқиға орнына барып, аталған тауардың қайдан келгенін анықтайды екен. Бұған қоса сала мамандары қалаға жеткізілген қанттың барлық сауда орындарына саудалануын қадағалап отыр. Осылайша, аталған мәселе қатаң бақылауға алынған. Ал арнайы тексеріс нәтижесінде алыпсатарлыққа жол бергендер заң жүзінде тиісті жауапқа тартылмақ.
Кәсіпкерлік бөлімінің ақпараты бойынша, апта соңына дейін көтерме сауда мекемелерінің барлығы дерлік қант қорын жасақтап алмақ. Нақтырақ айтатын болсақ, шаһарға үш вагон қант жеткізіледі деп күтілуде. Әр вагонда 68 тонна қанттың барын ескерсек, жағдай көпке бармай түзелетін көрінеді. Ал бүгінгі күні Семей қаласындағы қанттың орташа бағасы 290 теңгенің айналасында.
— Көтерме саудагерлер қанттың келісін 260 теңгеден саудалап жатыр. Осыған жекелеген дүкендер 10 пайыз қосса, қанттың келісі мөлшері 290 теңгеден сатылуы керек. Талап бойынша, бөлшек саудадағы баға осы сомадан аспауы керек. Ал базарлардағы 340-360 теңгеден саудаланып жатқаны — алыпсатарлардың қолдан жасап отырғаны. Қазір осының барлығын анықтап жатырмыз,- дейді кәсіпкерлік бөлімнің сауданы дамыту секторының меңгерушісі Айжан Хасенова. — Бағаның өсуіне Жамбыл облысындағы екі қант зауытындағы бағаның өсуі де әсер етіп отыр. Олардағы көтерме бағасының өзі 250 теңге. Жамбыл облысынан қаламызға келгенге дейін 260 теңге болады. Бұл жерде 5-6 пайыздан артық қосылып отырған жоқ. Ал бөлшек саудада 10 пайыздан артық қосылмай, орташа алғанда 290 теңгеден саудалануы керек,- деп нақтылады сектор меңгерушісі.
Асан МЫРЗАХАН, «Семей таңы»
