Семей шаһарында Алаш қозғалысының жетекшісі, көрнекті қоғам қайраткері Әлихан Бөкейхановтың 150 жылдық мерейтойына орай ескерткіш орнатылмақ. Өткен бейсенбіде ескерткіштің эскизіне жарияланған республикалық байқаудың алдын ала қорытындысы шығарылды. Қаламыздың бірқатар зиялы қауым өкілдері Семей қаласы әкімінің орынбасары Надежда Шарованың төрағалығымен өткен арнайы дөңгелек үстелде байқауға ұсынылған эскиздер ішінен үздігін таңдап алды.
Аталған басқосуға қалалық сәулет және қала құрылысы бөлімінің басшысы Қалдыбек Қоқиланов, ардагерлер кеңесінің төрағасы Амантай Доғалақов, Достық үйінің директоры Аманғазы Тілеубаев, Қазақстан халқы Ассамблеясының мүшесі Орал Шәріпбаев, Семейдің облыстық тарихи-өлкетану музейінің директоры Бекен Теміров сынды бірқатар зиялы қауым және бұқаралық ақпарат құралдары өкілдері қатысты.
Келелі басқосуда Алаш ардақтысы Әлихан Бөкейхановқа арналған ескерткіштің Ертістің сол жағалауында, аспалы көпір аумағында орнатылатыны белгілі болды. Ол аумақты келешекте үлкен кешенге айналдыру да жоспарланып отыр екен.
Ескерткішке жарияланған республикалық байқау сәуір мен мамыр аралығында өткізілген. Ал оған елімізге танымал төрт мүсінші қатысып, ескерткіштің бес түрлі нұсқасын ұсыныпты. Басқосуда белгілі ғалымдар, тарихшылар мен сәулетшілерден құралған сарапшы топ белгілі мүсінші, Қазақстан Суретшілер одағының мүшесі Бақытбек Мұхаметжановтың еңбегіне таңдау жасады. Биіктігі 13 метр болатын ескерткіш, жоспар бойынша, қаланың сол жақ бөлігінде, Ертіс жағалауынан орын теппек. Ал ескерткішке бюджеттен 24 млн. теңге қаржы қарастырылған. Семей қаласы әкімінің орынбасары Надежда Шарованың айтуынша, ескерткіш ағымдағы жылы орнатылмақ екен.
— Ескерткішті биыл орнатуды көздеп отырмыз. Өздеріңіз білесіздер, келер жылы Алашорда үкіметінің 100 жылдық мерейтойы аталып өтіледі. Сондықтан, осы атаулы шараға орай, ескерткішті үлкен кешенге айналдыру жоспарланып отыр. Қоғам қайраткері Әлихан Бөкейханов пен Алашорданы, Алаш қозғалысын бөліп қарауға болмайды,- деді Н.Шарова.
Асан МЫРЗАХАН, «Семей таңы»
