Сейсенбі күні Семей қаласының Түйемойнақ аралында тұңғыш рет «Street Workout» спорт алаңы ашылды. Аралдағы «Денсаулық жолы» аумағында орналасқан бұл спорт алаңы кәсіпкер, Шығыс Қазақстан облыстық мәслихатының депутаты Айдос Серікқалиұлының қаржыландыруымен пайдалануға берілді. Спорт алаңын ашудағы басты мақсат — жастарды салауатты өмір салтын ұстануға және спортпен айналысуға шақыру.
Спорт алаңының ашылу салтанатына қала әкімі Ермак Сәлімов қатысты. Шаһар басшысы жаңа спорт нысанының ашылуымен барша спортсүйер қауымды құттықтап, оның қаламыз үшін маңызды екеніне тоқталды.
— Бүгін спорттық дәстүрлері қалыптасқан және өзіндік жетістіктері бар Семей қаласы үшін өте маңызды күн. Қаламызда ерекше спорт алаңы ашылып отыр. Осының барлығы кәсіпкер, Шығыс Қазақстан облыстық мәслихатының депутаты Айдос Серікқалиұлының қаламызға жасап отырған сыйы. Денсаулық — халқымыздың басты байлығы. Баршаларыңызды айтулы алаңның ашылуымен құттықтай келе, спортпен айналысуға шақырамын,- деген Ермак Бидахметұлы «Street Workout» спорт алаңы Семейде алғаш рет ашылып отырғанын, алдағы уақытта осы іспетті 12 алаң тұрғызылатынын жеткізді. Шаһар басшысының мәліметінше, қазір қаланың әр аумағынан спорттық алаңдардың орындары белгіленген. Алдағы уақытта оларды салуға шаһардың кәсіпкерлері қол ұштарын созбақ. Бұдан өзге қала бюджетінен де қаражат қарастырылмақ.
Алаңға бірінші болып келген жастар жаттығу нысандарын тексеріп көрді. Айта кетейік, «Street Workout» спорт алаңының ерекшелігі – ол ашық аспан астында орналасқан. Бұл көпшілікке көрініп тұрады, әрі кез келген адамның келіп жаттығуына болады. Спорт алаңына резеңке жабындылар төселген. Арнайы аумаққа бағаналар да тартылып, жарық жеткізіліпті. Қауіпсіздік үшін бейнебақылау камералары да орнатылған. Айта кетелік, бұған дейін дене шынықтырудың бір түрі болып келген «Street Workout» бүгінде спорттың жаңа түріне айналды десе де болады. Онда жастар турникте, қырлы бөренелерде және басқа да қондырғыларда әртүрлі күрделі жаттығулар жасайды.
Бұл спорттық қозғалыстың қолға алынғанына көп бола қоймаған. Алайда ол бүгінде бүкіл әлем бойынша қарқынды дамып келеді. Өйткені бұл спорт түрі өте қолжетімді. Арнайы алаң мен қажетті қондырғылар болса жеткілікті. Кез келген адам қалаған уақытында тегін жаттыға алады. Семейде осы спорт түрімен шұғылданатын жастар көп болғанымен, арнайы дайындық өткізетін жерлер мүлдем болмаған. Енді алдағы уақытта спортшылар осы бір спорт түрінен сайыстар өткізуді де жоспарлап отыр.
Асхат САМАТҰЛЫ, «Семей таңы»
