Үржар ауданының Мақаншы ауылында Әсет Найманбайұлы атындағы «Інжу-маржан» ІІІ республикалық дәстүрлі орындаушылар байқауы мәресіне жетті. Ел тәуелсіздігінің 25 жылдығына арналған байқауда елімізге танымал өнер қайраткерлері төрелік етіп, жеңімпаздарды анықтады.
Ұлттық мәдени құндылықтарды насихаттауға бағытталған байқауға еліміздің 9 аймағынан келген 20-дан астам дәстүрлі әншілер қатысты. Байқауға ҚР Еңбек сіңірген қайраткері, Үржар ауданының Құрметті азаматы, музыка зерттеушісі, күйші Жарқын Шәкәрім бастаған Ерлан Рысқали, Нұржан Жампейісов, Берік Омаров, Әділ Тұрғанбаев, Гүлмира Темірбекова сынды дәстүрлі әндерді дәріптеушілер қазылық етті. Әсет әндерін орындаушыларға әндердің ырғақтық құрылымын, диапазон алшақтығын, күрделілігін ескере отырып, әншілердің дауыстарының тұрақтылығына, дауыс реңділігіне, орындаушылық шеберлігі, сапалық деңгейі, сахна мәдениеті, орындалатын шығармалардың байқаудың шарттарына сәйкестігі бағаланады.
Алғашқы күні әншілер Әсеттің бір әнін, халық композиторының немесе халық әндерінен бір ән орындады. Осы кезеңнен өтіп іріктелген ән келесі күні қалың көпшілік тыңдарманға ұсынылды. Байқау мәресіне жетіп, әншілерге жүлде тапсыру сәтінде сөйлеген қазылар алқасының төрағасы Жарқын Шәкәрім: — Қасиетті баһадүр батыр Қабанбайдың тұлпарының ізі қалған, талай жақсы мен жайсаң жүріп өткен ұлы мекен, Әсет атамыз кең сахараны жаңғыртып ән салған бұл өлкенің тарихы терең, — деді. Марапат рәсімі барысында ШҚО әкімінің орынбасары Жақсылық Омар қатысушыларға алғысын білдіріп, келер жылы Ә. Найманбайұылының 150 жылдығы жоғары деңгейде аталып өтілетінін жеткізді. — Әсет Найманбайұлы Алаштың ән оздырған өте тағдырлы әншілердің бірі. Оның ғибрат пен тарихқа толы өміріне қарай отырып, қазақтың басындағы кейбір өзекті мәселелерді байқаймыз. Осының барлығын ертең халық мұрасы ретінде осы әншілер жеткізіп, дәстүрімізді насихаттамақ, – деді Жақсылық Омар. Байқаудың қорытындысы бойынша ІІІ орынды алматылық, ақтөбелік және Үржар ауданының әншілері иеленді. Ал ІІ және І орынды шығысқазақстандық қатысушылар алса, байқаудың бас жүлдесі Ақмола облысынан келген Асқар Мұқияттың қанжығасына байланды. Жүлдегерлер марапаттарын ШҚО әкімінің орынбасары Жақсылық Омар, Үржар ауданы әкімінің орынбасары Серік Құсайынұлы, байқауға арнайы келген күйші – сазгер Секен Тұрысбеков, ауыл әкімі Советқан Қалиев, ҚР Еңбек сіңірген қайраткері дәстүрлі әнші Ерлан Рысқали, Т.Жүргенов атындағы Қазақ Ұлттық өнер Академиясының доценті, Дәнеш Рақышевтің шәкірті Нұрлан Жампейісов ҚР мәдениет саласының үздігі, Ә.Қашаубаев атындағы облыстық филармонияның әншісі Берік Омаров, Өскемен қаласындағы ағайынды Абдуллиндер атындағы өнер училищесінің аға мұғалімі Әділ Тұрғанбаев, дәстүрлі әнші, республикалық ән байқауларының үздігі Гүлмира Темірбекова тапсырды. Құрметті қонақтар Мақаншы ауылындағы Әсет Найманбайұлы атындағы музей үйіне аялдап, осындағы жәдігерлермен мұқият танысты. Музей басшысы Әбен Тұйғынұлы мен Әсеттің туған немересі Ләззат Қожекеқызы келушілердің сұрақтарына нақты жауап беріп, олардың мол мағлұмат алуына мүмкіндік жасады. Әсет Найманбайұлына қатысты деректерді, жәдігерлерді үзбей жинастыруға, ақын әндерінің шығу тарихын зерттеп, оның өмірінен көне жазумен жазылған шығармаларды жұрт игілігіне жалықпай ұсынып жүрген, мұражайды көп жылдан бері басқарып келе жатқан ҚР мәдениет қайраткері Әбен Тұйғынұлы Разуевке Үржар ауданының «Құрметті азаматы» атағы берілді. Шара елімізге танымал өнер майталмандарының қатысуымен өткен гала-концертпен жалғасын тапты.
Мұратқазы САЯБАЕВ, ҚР Журналистер одағының мүшесі, Үржар ауданы.
