Өткен аптаның соңғы жұмыс күні Қазақстан Республикасы Парламенті Мәжілісінің депутаты, «Нұр Отан» партиясы фракциясының мүшесі Павел Казанцев жұмыс сапарымен Семей қаласына келді.
Сондай-ақ семейліктермен болған кездесуге Жолдау жүктеп отырған міндеттер арқау болды. Халық қалаулысы кездесуде «100 нақты қадам» Ұлт жоспарын жүзеге асырудың бағыттарына түсіндірме бере отырып, елімізде жүзеге асырылып жатқан экономиканы әртараптандыруға бағытталған ауқымды істерге тоқталып өтті. Павел Казанцевтің айтуынша, Парламент Мәжілісінің депутаттары қызметке кіріскеннен бері осы уақытқа дейін жиырмадан астам заң жобасын қабылдаған. Қазір халық қалаулылары жазғы демалыста. Дегенмен Елбасының тапсырмасымен өңірлерді аралап, тұрғындардың ахуалымен, мемлекеттік бағдарламалардың жүзеге асырылу барысымен танысуда.
Кездесу барысында халық қалаулысы келешекте мұнай экономиканың негізгі қозғаушы күші болудан қалатынын, сол себепті Қазақстанға экономиканың негізгі тетігін өзге салалардан қарастыру керектігін де атап өтті. Осы ретте депутат Мемлекет басшысы Н.Назарбаев аталған мәселеге қатысты нақты тапсырма бергенін де жеткізді. Осы ретте мысал келтірген депутат Шығыс Қазақстанда балық өнімдерін экспорттайтын жалғыз кәсіпорынның барын айтып, оның өңір үшін тым аз көрсеткіш екенін атап өтті.
— Бүгінгі күні Зайсандағы балық өнімдерін экспорттайтын кәсіпорынның өніміне көрші Қытай елінде сұраныс өте жоғары. Олар мұздатылған балық түрлерін тонналап алып жатыр. Өңірдегі қайта өңдеу саласында да мол мүмкіндіктер бар. Ауыл шаруашылығы саласында жандандыра түсу қажет. Қазір Қазақстанға 40 пайыз ет өнімдері сырттан тасымалданады. Мал шаруашылығын жүргізудің ғасырлар бойы қалыптасқан дәстүрі бар еліміз әлі күнге дейін ет өнімдерін шетелден тасымалдайды. Сол сияқты шұжық өнімдерінің 40 пайызы Ресейден жеткізіледі. Міне, осы бағыттарда жұмыс жасауымыз керек, — деді П.Казанцев.
Парламент мәжілісінің депутаты П.Казанцев бүгінгі күнде бүкіл әлемде басты қауіпті мәселеге айналып отырған терроризм мен экстримизм мәселесіне де жіті назар аударылып отырғанын айтты. Ол бұл бағыттағы жұмыстар Елбасы Н.Назарбаевтың жіті назарында екенін, алдағы уақытта «Терроризмге қарсы күрес заңы» қайта қаралатынына тоқталды. Кездесуде әлеуметтік сала назардан тыс қалған жоқ. Депутат бұл тұрғыда «Коллекторлық қызмет туралы» заң жобасы қаралып, дегенмен мәжілісмендер құжаттың «шикілігіне» байланысты қайта қарауға жіберілгенін жеткізді. Басқосуда кірісті жаппай декларациялау мен Парламенттің жаңа ақпараттық саясаты да сөз болды. Оның айтуынша, алдағы қыркүйек айынан бастап Парламенттің пленарлық және комиссия отырыстары тікелей эфирде көрсетілетін болады. Бұл Парламенттің жұмысын ашық көрсетіп, халықтың ақпаратқа қол жеткізуіне мүмкіндік бермек.
Халық қалаулысымен болған кездесуде Семей полигонынан зардап шеккендерге жеңілдік, жергілікті өндірушілерді қолдау, ауыл шаруашылығы реформасы, пайдаланылмай жатқан жер мәселелері көтерілді. Депутат алдағы уақытта барлық мәселер бойынша жұмыстар атқарылып, заң нормалары қабылданарда ескерілетінін жеткізді.
Павел Казанцев осыған дейін Өскемен қаласында, Күршім мен Катонқарағай аудандарында болған. Кездесу барысында ішкі туризмді дамыту, балық, ағаш өңдеу салалары, ауылшаруашылық саласын өркендету мәселелері көтерілген. Халық қалаулысы Шығыс Қазақстан облысына сапары барысында өңірдің туристік нысандарға бай екенін аңғарған. Ерекше архитектурасы мен бірегей табиғи ландшафт кез келген адамның көз жауын алатынын айтқан мәжілісмен облыста ішкі туризмді дамыту үшін қызмет көрсету аясын жақсарту керек. Депутат бұл ретте алдымен жолдарды жөндеп, инфрақұрылымды жақсарту маңызды дейді.
— Өңірдің туристік әлеуеті жоғары. Дегенмен бұл салада ұйымдастыру мен инфрақұрылым мәселелері орын алып отыр. Туризмді дамыту үшін алдымен инфрақұрылымды дамытуымыз керек. Сіздерде аралайтын көптеген нысандар бар. Семей экономикалық және мәдени тарихы бай өңір. Бұл артықшылықтар сіздерге қаржы әкелетін қалталы туристерді тартуға көмектеседі. Халықаралық спорттық шараларды ұйымдастыруға да болады. Яғни Семейдің әлеуеті өте жоғары. Туризм дамығанда елімізге қосымша қаржы түсіп, мұнайға тәуелді болмаймыз. Бүгінде Елбасы да әр өңірді шикізатқа тәуелділіктен арылтудың баламасын табуды жүктеп отыр, — дейді Парламент Мәжілісінің депутаты Павел Казанцев.
Семей шаһарына сапары аясында Парламент Мәжілісінің депутаты Павел Казанцев қаланың кәсіпкерлерімен де кездесті. Шағын және орта бизнес өкілдерімен болған басқосуда Қазақстан Республикасы Парламент Мәжілісінің осы уақытқа дейін атқарған жұмысы, алдағы жоспарлар сөз болды. Басқосуда еліміздің экономикалық әлеуеті де ортаға салынды. Алдағы жоспарлар, жүзеге асырылып жатқан жобалар айтылды. Кездесу барысында П.Казанцев жергілікті кәсіпкерлер тарапынан қойылған сұрақтарға жауап қайтарды.
Асан МЫРЗАХАН, «Семей таңы»
