Қыс қыр астында екенін ескерсек, кезекті жылыту маусымына да аз ғана уақыт қалды. Тұтынған жылуға қарызы барлармен жұмыс жалғасын тауып, сот орындаушылары, учаскелік полиция және арнайы жасақталған топ жыл басынан бері қала бойынша күнделікті рейд өткізуде. Соңғы екі күнде Шығыс Қазақстан облысы әкімінің орынбасары Димитрий Гариков пен Семей қаласының әкімі Ермак Сәлімов рейд барысында жылуға берешегі бар және жылу көзінен ажыратылған 10-нан астам нысанға арнайы барды.
Қазіргі таңда қарапайым тұрғындармен бірге берешектер қатарында ірі мейрамхана кешендері, банктік құрылымдар, бильярд және кафе мен дүкендер бар. Облыс әкімінің тапсырмасымен «Теплокоммунэнерго» МКК алдындағы дебиторлық қарызды қайтару қарқыны күн сайын қарқын алып келеді. Әсіресе жылуға көп мөлшерде қарыз қолында қаражаты бар кәсіпкерлер екенін несін жасырамыз. Арнайы жасақталған рейд құрамымен бірге облыс және қала басшылығын көрген борышкер кәсіпкерлер қарызды қайтару кестесі бойынша төлем жасайтындарын жеткізсе, бәз біреулері жауаптан жалтарып, басшылармен бетпе бет жүздесуге орынбасарларын жіберді.
— Алдын ала хабарлама ала отырып, жұмыс орындарына басшылықтың келуін теріс қабылдаған кәсіпкерлердің бұл әркеті – жауапсыздық. Мұндай көзқарасқа біз де тиісінше жауап қайтарамыз. Жылудан ажыратылған нысандарға техникалық жағдай жасалынбайды. Босатылған жылу мөлшері үшін жылуға қосылуға ниетті көптеген өзге кәсіпорын нысандары бар. Сондай-ақ біз мемлекеттік және жеке сот орындаушыларымен тығыз қарым-қатынаста жұмыс істеуге тырысамыз. Жеке сот орындаушыларының жұмысы да шамалы. Бүгінгі істеп отырған жұмысымыз сот орындаушыларына тиесілі. Бірқатар нысандарға қатысты сот шешімі шыққан. Сол нысандарға барып, кассаларын бұғаттаулары керек. Бұл мәселелерді біз прокуратура, сот орындаушылар палатасы арқылы шешетін боламыз. Жүйелі жұмыс жүргізе алмаған сот орындаушыларын лицензияларынан айыруға дейін барамыз,- деді облыс әкімінің орынбасары Димитрий Гариков.
Димитрий Гариков жылыту маусымы жақындаған сайын рейд жұмыстары жиілей түсетіндігін тілге тиек етті. Себебі қарқынды жұмыс жылдар бойы жинақталған дебиторлық қарызды қайтарып, мәселені шешуге жол ашады. Ал жауаптан жалтарғандарға қатаң түрде шара қолданылады.
— Жылыту маусымы басталғанша біз қарызды толықтай қайтарып алуымыз керек. Себебі сол қаражатқа көмір алынады және жылу қазандықтарына жөндеу жұмыстары жүргізіліп, жылу берушілерге жалақы төленеді,- деп атап өтті Д. Гариков.
Жүзеге асырылып жатқан жұмыстардың арқасында «Теплокоммунэнерго» МКК алдындағы дебиторлық қарыз көлемі қысқарды. Нақтырақ айтсақ, ағымдағы жылдың мамыр айында қала бойынша 1400 жеке кәсіпкерлік нысандары берешек болса, қазіргі таңда сандық көрсеткіш өзгеріп, 138-ге дейін қысқарған. Десе де жеке және заңды тұлғалардың «Теплокоммунэнерго» МКК алдындағы берешегі 400 млн. асып жығылады.
Әйгерім СӘРСЕНҒАЛИ, «Семей таңы»
