Сәрсенбі, 17 тамыз күні Семей қалалық ақпарат орталығында «БЖЗҚ» АҚ Семей қаласындағы өңірлік филиалы басшылығының қатысуымен баспасөз мәслихаты өтті. Баспасөз мәслихатында 2016 жылдың алғашқы жарты жылдығы бойынша БЖЗҚ қызметінің қорытындысы баяндалды.
«БЖЗҚ» АҚ Семей қаласындағы өңірлік филиалының директоры Дариға Дайрова БЖЗҚ 2013 жылғы 22 тамызда «ГНПФ» ЖЗҚ» АҚ негізінде құрылғанын, құрылтайшысы және акционері Қазақстан Республикасының Үкіметі екенін атап өтіп, филиал жұмысымен таныстырды және мешін жылының алғашқы 6 айында межелеген нәтижеге қол жеткізгендерін мәлімдеді.
— 2016 жылдың бірінші жарты жылдығындағы таза инвестициялық табыс көлемі 267,21 млрд. теңге. Былтырғы жылдың осы кезеңімен салыстырғанда ол екі есеге артқан. Нақтырақ айтсақ, өткен жылдың алғашқы 6 айындағы көрсеткіш 141,41 млрд.теңгені құрады. Ал шарт жасасу мәселесіне тоқталсақ, жалпы салымшылар 10,15 млн. жеке зейнетақы шоттары (ЖЗШ) шартын жасасты. Оның ішінде шамамен 9,7 млн. бірлік міндетті зейнетақы жарналары есебінен болса, міндетті кәсіптік жарналар бойынша 403 362 бірлік және ерікті зейнетақы жарналары бойынша 39 071 бірлік шарт жасасты. Зейнетақы жинақтарының жалпы көлемі 6,22 трлн. теңгеден асты,- деген Дариға Абайқызы республика бойынша шарт жасасу жайына да тоқталды.
Жалпы, еліміз бойынша сараптама жүргізсек, ЖЗШ саны бойынша алғашқы орында Алматы қаласы болса, ОҚО мен Қарағанды алғашқы үштікке енеді. Зейнетақы жинақтарының көлемі бойынша Алматы қаласы көш бастап, Астана және Қарағанды қалалары тиісінше екінші, үшінші орындардан көрініп отыр екен.
Баспасөз мәслихаты барысында «БЖЗҚ» АҚ Семей қаласындағы өңірлік филиалының директоры көңіл аударған тағы бір мәселе – жұмыс берушінің 5% міндетті зейнетақы жарнасы.
— 2018 жылдан бастап өз қызметкерлері үшін қызметкер табысының мөлшеріне қарай бес пайыздық зейнетақы жарнасын жұмыс берушілердің барлығы аударатын болады. Жарнаны жұмыс беруші аударатындықтан, жұмыскердің меншігі болып есептелмейді. Мұраға қалдырылмайды және жалпыға бірдей белгіленген зейнетақы жасына жеткен кезде тағайындалады,- деген Д.Дайрова бұл 5 пайыздық зейнетақы жарнасы жұмыскердің жалақысынан емес, жұмыс берушіден бөлінетінін және 10 пайыздық міндетті зейнетақы жарналары қалпында сақталатынын атап өтті.
Сонымен бірге Дариға Дайрова зейнетақы түрлеріне тоқталды. Тарқатып айтсақ, бірінші, базалық зейнетақы төлемі барлық зейнет жасына жеткен тұрғындарға еңбек өтілі мен еңбекақысына қарамастан күнкөріс минимумының 50 пайызы есептеліп тағайындалады. Және ол мемлекет қаржысынан бөлінеді. Екінші, солидарлы зейнетақы 1998 жылға дейін кем дегенде 6 айлық еңбек өтілі бар азаматтарға беріледі. Соңғысы бірыңғай жинақтық зейнетақы. Ол әр адамның табысының 10 пайызы жинақ шотына аударылуы арқылы жинақталған қаржысы. «Еңбек түбі – зейнет» демекші, ол неғұрлым көп әрі нәтижелі еңбек етіп жинақ шотына салым салған адам зейнетін де тиісінше көретіндігінің айғағы.
Сондай-ақ шара барысында әскери қызметкерлерді, әскери құрылымдардағы қызметкерлерді зейнетақымен қамсыздандыру 2016 жылдың 1 қаңтарынан бастап мемлекеттік бюджет есебінен жүзеге асырылып жатқанын және әскерилердің зейнетақы қорынан алынған 50 пайыз қаражат сол азаматтар біріңғай зейнет жасына жеткен уақытта міндетті түрде қайтарылатынын жеткізді. Айта кетерлігі, 2015 жылдың 31 желтоқсанына дейін салымшылар зейнетақы қорына салған қаржыларын алуға мүмкіндіктері болған. Енді 2016 жылдан бастап зейнет жасына жетпейінше заң негізінде ешбір салымшыға салымы қайтарылмайды.
«БЖЗҚ» АҚ Семей қаласындағы өңірлік филиалы жұмысының нәтижесі иесіз шоттар мәселесін шешуде көрініп отыр.
— Соңғы үш жылда біздің филиал иесіз қалған шоттардың қожайынын іздестіруде ауқымды жұмыстар атқарды. Атап айтсам, 3 жыл бұрын 1700 иесіз қалған зейнетақы шоты болса, қазіргі таңда 100 мың теңгеден астам салымы бар 36 шоттың қожасы іздестірілуде,- деген Дариға Абайқызы бұл мәселе өткен кезеңде әртүрлі мекемелердегі жұмысшылардың салымын аудару барысында өз ісіне жауапсыз қараған есепшілердің салғырттығынан туындағанын айтып өтті. Жалпы, сандық көрсеткішке назар аударсақ, қор жұмысы жемісті. Бүгінгі таңда 236 бөлімде 70-тен астам білікті маман салымшылар мен алымшылардың сұраныстарын қанағаттандырып, халық игілігі үшін еңбектенуде.
«БЖЗҚ» АҚ Семей қаласындағы өңірлік филиалы директорының орынбасары Марал Байтабанова жеке зейнетақы шотындағы зейнетақы жинақтарының жай-күйі туралы ақпарат алу жолдарын түсіндірді.
— Зейнетақы шотындағы зейнетақы жинақтарының жай-күйі туралы ақпаратты қордың 236 бөлімшесінің бірінен, пошта байланысы, электрондық пошта көмегімен, www.enpf.kz сайтынан немесе ұялы қосымша арқылы білуге болады. 2,2 миллионға жуық адам хабарлаудың электрондық тәсілін таңдаған. Жарты жыл ішінеде ұялы қосымшадан жүктеп алу саны 241,5 мыңға жеткен,- деген Марал Жанатқызы салымшылар үшін барлық мүмкіндіктер жасалатынын жеткізді.
Әйгерім ЖАҚЫП,
«Семей таңы»
