24 тамыз күні қалалық кәсіподақтар үйінде дөңгелек үстел өтті. Күн тәртібінде еңбек даулары және оларды шешу мәселелері талқыланды. Шараға ШҚО кәсіподақтар кеңесінің төрайымы, қала басшылығы және кәсіподақтар активі, жұмыспен қамту және әлеуметтік бағдарламалар бөлімі, қалалық сот мамандары мен қорғаушылар қатысты.
Басты мақсат Қазақстан Республикасы Денсаулық сақтау және әлеуметтік даму министрлігі мен кәсіпкерлер палатасының кешенді жоспарына сәйкес ағымдағы жылдың қаңтарынан бастап қолданысқа енгізілген Еңбек Кодексіндегі ерекшеліктерді таныстыру және жұмыс беруші мен жұмысшы арасында туындайтын мәселелерді шешу мен олардың алдын алу екендігін тілге тиек еткен ШҚО Кәсіподақтар кеңесінің төрайымы Нұржан Тусупова әрбір еңбек адамы өз құқығын білуі керектігін айтты.
— Заң ережелерін білмегендіктен еңбек даулары туындайды. Дау жекелеген еңбеккерге және жалпы ұжымға қатысты болуы мүмкін. Мұндай кезде шағымданушы өзі қызмет ететін кәсіпорын, мекеме ішіндегі кәсіподақ ұйымының көмегіне жүгіне алады. Кәсіподақ ұйымы болмаған жерде көбінесе азаматтар сотқа дейін барады. Сондықтан түсініспеушілік орын алмай, жұмысшылар өз мүдделерін қорғай алуы үшін кәсіподақ ұйымы әр мекеме, ұйымдарда болғаны абзал. Кәсіподақ төрағасы заңды түрде әділет басқармасында тіркелгені жөн. Бұл мәселені заңдық негізде бекіту мақсатында біз министрлікке ұсыныс жасадық,- деген Нұржан Құрмантайқызы еңбеккерлер даулы мәселе туындаған жағдайда қалай әрекет ету керектігін, кімдердің көмегіне жүгінуге болатындығын түсіндірді.
Ең бастысы дау туындату емес, сол түсініспеушілікті жою, оның алдын алу екендігін айтқан Н.Тусупова осы бағытта семинарлар мен дөңгелек үстелдер, түсіндіру жұмыстары қарқынды жүргізіліп жатқандығын мәлімдеді.
— Жұмысшыларға қатысты даулардың басым көпшілігі жалақының кешіктіріліп берілуіне байланысты орын алады. Бұл мәселе үш жақты коммиссия, облыс әкімдігінің сыбайлас жемқорлыққа қарсы штаб жұмысында қаралады. Қазіргі таңда кәсіпорындардың еңбеккерлер алдындағы берешегі 114 млн.теңгені құрап отыр. Бұл жыл басынан бергі көрсеткішпен салыстырғанда екі есеге азайған. Жалақы беру ісінде жайбасарлық танытып отырған кәсіпорын басшылығымен үздіксіз жұмыс жүргізіліп жатыр,- деген ШҚО Кәсіподақтар кеңесінің төрайымы еңбеккерлердің жұмыс уақыты, кезекті демалысы және де өзге мәселелер жөнінде айтып өтті. Сонымен бірге, дауды сотқа жеткізбей, медиация тәртібімен шешу әдісі жайлы пікір білдірді.
Әйгерім ЖАҚЫП,
«Семей таңы»
