Жаңа оқу жылының басталуына санаулы күндер қалды. Осы орайда 24 тамыз күні ШҚО Абай атындағы әмбебап кітапханада «Жанұя орталығы» қоғамдық қорының ұйымдастыруымен «Мектепке жол» акциясы аясында «Шын жүректен» қайырымдылық іс – шарасы өтті. Шараға Орталық мешіттің бас имамы, Православ шіркеуінің діни өкілі, акцияға қолдау танытқан демеуші кәсіпорындардың, мекемелер мен ұжымдардың басшылары және халық қалаулылары, ата-аналар мен мектеп оқушылары қатысты.
«Жанұя орталығы» қоғамдық қорының директоры Людмила Асташкина шараның маңызы мен мақсатына тоқталды.
— Акцияның басты мақсаты – көп балалы аналарға, аз қамтылған отбасыларға көмек қолын созу. Балалар мен олардың ата-аналарына шаттық сыйлау. Шара аясында 86 отбасының 157 баласына жалпы құны 1 млн.200 мың теңгенің мектеп құралдарын сыйламақпыз. Өткен жылы 60 балаға 600 мың теңге көлеміндегі қаражатқа мектепке қажетті оқу – құралдарын тарту еткен едік. Жыл сайын акция ауқымы кеңеюде деп айтуға болады. Қолдау танытып отырған кәсіпкерлерге, жанашыр жандарға алғысымыз шексіз,- деді Людмила Асташкина.
Аталмыш акция бірнеше жыл қатарынан дәстүрлі түрде ұйымдастырылуда. Осы уақыт аралығында деректер қоры да қалыптасқан. Ұйымдастырушылардың айтуынша, бұл жолы әр отбасыға хабарласып, мектепке қажетті заттарының тізімін жасаған. Шаһарымыздағы Орталық мешіт, Православ шіркеуі, «БЖЗҚ» АҚ Семей қалалық филиалы, «Семей инжинеринг» АҚ сынды 13 кәсіпорын, мекеме, ұжымдардың қолдау танытуы нәтижесінде тізім бойынша қажетті заттар алынған.
— Адам өміріндегі игі істердің бірі – мұқтаж жандарға қамқорлық жасау. «Жерде бір бала қуанса, көкте мың періште шаттанады» демекші, бүлдіршіндерге қуаныш сыйлау сауапты іс деп білемін. Қолдан келсе әрдайым қол ұшын созған ғанибет. Жаңа оқу жылында оқушыларға сәттілік тілеймін. Мектеп табалдырығын аттағалы отырған балғындардың қадамдары құтты болсын,- деген қалалық мәслихат депутаты, «БЖЗҚ» АҚ Семей қаласындағы өңірлік филиалының директоры Дариға Дайрова мұндай бастаманы әрдайым қолдайтындығын жеткізді.
Әйгерім СӘРСЕНҒАЛИ,
«Семей таңы»
