Семей қаласының Қорғаныс істері жөніндегі басқармасында қаламыздың орта мектептері мен колледждердің алғашқы әскери дайындық мұғалімдерін үш күндік оқу-әдістемелік жиынына шығарып салу салтанатты жиыны өтті.
Қазақстан Республикасы Тәуелсіздігінің 25 жылдығына орай ұйымдастырылып отырған оқу әдістемелік жиын «Шығыс» өңірлік қолбасшылығының әскери жаттығу полигонында тамыз айының 23-25 аралығында өтеді. Оқу жиыны Семей қаласы әкімі Ермак Сәлімовтің шешімімен және «Шығыс» өңірлік әскери қолбасшылығының қолбасшысы, генерел – майор Нұрлан Қашағановтың бұйрығына сәйкес алғаш рет қолға алынып отыр. Ондағы басты мақсат – әскери патриоттық жұмысты жүргізуші ұстаздардың білім тәжірибесін көтеру.
Алғашқы әскери дайындық ұйымдастырушыларын үш күндік әскери полигонға шығарып салу салтанатына соғыс ардагері Петр Колмин, ҚР Қарулы Күштерінің ардагерлері генерал-майор Александр Мартынов, полковник Ризабек Махудаев, 3-ші ранг капитыны Білал Мұқашев, полковник Александр Коновалов және «Шығыс» өңірлік әскери қолбасшысы, генерел – майор Нұрлан Қашағанов пен Семей қаласы әкімі аппаратының мемлекеттік — құқық бөлімінің басшысы Сержан Әзбергенов арнайы қатысты.
Оқу-жаттығу барысында алғашқы әскери дайындық мұғалімдері саптық, ұрыс, тактикалық және оқ ату бойынша дайындықтардан өтіп, тәжірибелерін шыңдамақ. Салтанатты жиында сөз алған «Шығыс» өңірлік әскери қолбасшылығының қолбасшысы, генерел – майор Нұрлан Қашағановтың айтуынша, осындай жаттығу жиындары ұстаздардың тәжірибелерін арттырып, жас Отан қорғаушыларды дайындауға үлкен септігін тигізбек.
— Құрметті ардагерлер, офицерлер мен кеш қонақтары! Кейде жыл сайын өткізіп отыратын осындай шараларды ұмыт қалдырып жатамыз. Жаз мезгілінде оқу-жаттығу шараларын ұдайы өткізіп отыру аса қажет. Өйткені болашақ Отан қорғаушыларды тәрбиелеуде оқу орындарында қызмет жасайтын алғашқы әскери дайындық мұғалімдерінің тигізетін пайдасы зор. Сондықтан аталған оқу-әдістемелік жиынын өткізуді бірауыздан қолдадық. Бұл айтулы шараға ардагерлер де өз тілектерін білдіруге арнайы келіп отыр. Осы үш күн ішінде өз тәжірибелеріңізді шыңдай түсесіздер. Оқу-жаттығу жиынының жоғары дәрежеде өтуіне тілектеспін, — деген Н.Қашағанов жиын соңында ұстаздар арасында сауалнама жүргізіліп, оның қорытындысы бойынша осындай оқу жиындарының қаншалықты қажеттілігі анықталатынын атап өтті. Ол сондай-ақ қажет болған жағдайда оқу-әдістемелік жиындарын жыл сайын өткізуге болатынын тілге тиек етіп, алдағы оқу жылында мектептерге әскерилерді де жіберіп, арнайы сабақтар өткізуге болатынына тоқталды.
Асан МЫРЗАХАН, «Семей таңы»
