Өткен сәрсенбі, 24 тамыз күні Семейде «Бизнестің жол картасы — 2020» бағдарламасы аясында мемлекеттік қолдауға ие болған бірқатар кәсіпорындарға пресс–тур өткізілді. Шығыс Қазақстан облысы бойынша «Даму» қоры аймақтық филиалының директоры Тимур Екеев, «Даму» кәсіпкерлікті дамыту қоры» АҚ Семей қаласы филиалының менеджері Анжела Маслова мен кәсіпкерлік бөлімінің сектор меңгерушісі Әмина Сыздықова бастаған топ және БАҚ өкілдері бірқатар әлеуметтік нысандарды аралап, мемлекет тарапынан қолдау көріп отырған мекемелердің жұмыс барысымен танысты.
Бірінші болып жергілікті бұқаралық ақпарат құралдарының өкілдері «Айналайын» шағын орталығына барды. Бүгінде мектепке дейінгі білім беру мекемесі 3 жастан 5 жасқа дейінгі 180 балаға тәрбие беруде. Мұнда бүлдіршіндерді оқыту мен тәрбие беруге барлық жағдай жасалған. Ұжымда арнайы дайындалған білікті мамандар жұмыс істейді. «Айналайын» шағын орталығының құрылтайшысы Еділ Кенжеғалиевтің айтуынша, шағын орталық ашу ойы аудандағы балабақшаға деген сұраныстың жоғары болуынан туындаған.
— Шағын орталық ашу үшін қаражат қажет болып несие алу мақсатында банк қызметіне жүгінген болатынбыз. Онда «Даму» қоры арқылы мемлекет тарапынан жақсы қолдау барын естіп білдік. Нәтижесінде қажетті қаражатқа ие болық. Қазір несиенің 7 пайызы «Даму» қормен субсидияланады. Бүгінгі күні 10 млн. теңге көлемінде субсидия алып үлгердік, — дейді жас кәсіпкер Еділ Кенжеғалиев.
Балабақша заман талабына сай үштілде білім беруді қолға алған. Сондай-ақ логопед, психолог мамандар қызмет жасайды. Сонымен қатар жеке ағылшын бөлмесі де бар. Жұмыс жасап жатқанына көп бола қоймаса да шағын орталық тәрбиешілері жақында Алматы каласында балабақшалар арасында өткен республикалық сайысқа қатысып, бас жүлдені ұтып алыпты.
Семейлік кәсіпкер Еділ Кенжеғалиев ашқан екінші балабақша 70-ықшам ауданындағы «Балапан» шағын орталығы. Әлеуметтік нысан 120 орынға шақталған. Оқыту мемлекеттік және орыс тілінде жүргізіледі. Кеңес заманынан бері сақталған балабақша ғимараты бұрындары жеке меншік ұйымдардың кеңсесі, ал нысан аумағы автокөлік тұрағы болған. Кейін ғимарат жеке кәсіпкердің қолына өтіп, күрделі жөндеу жүргізіледі.
— «Бизнестің жол картасы — 2020» бағдарламасы жұмыс орнын ашуға үлкен көмек көрсетіп отыр. Қазір екі шағын орталықта жетпіске жуық адам қызмет атқарып жатыр, — дейді. «Айналайын» шағын орталығының меңгерушісі Айгүл Туткышева.
Сонымен қатар БАҚ өкілдері «АндроМеда» медициналық клиникасына да барды. Медициналық мекеме урология мен геникология бағыттары бойынша емдейді және диагностика жүргізеді. «АндроМеда» медициналық клиникасының директоры Қайрат Мұқашевтің айтуынша, мекеме «Бизнестің жол картасы – 2020» бағдарламасы аясында 11 млн. теңге несие алған. Аталған қаражатқа мекеме қызметі ұлғайтылып, заманауи медициналық құрылғылар да сатып алыныпты.
— Мекеме 2006 жылы ашылып, қазіргі таңда тұрғындар арасында танылып үлгерді. Осы уақытқа дейін мемлекеттік бағдарламаның көмегімен 1,5 млн. теңге көлемінде субсидия алдым. «Даму» қоры бағдарламасының арқасында жұмысымыз кеңейіп, қосымша жұмыс орындарын ашуға мүмкіндік алдық, — деген, Қ.Мұқашев болашақта да мемлекеттік бағдарламаның көмегімен өз ісін жандандыра түсіруді көздеп отыр.
Пресс — тур аясында БАҚ өкілдері «Жан — Ер» медициналық орталығына атбасын бұрды. Бүгінде жүзден астам қызметкері бар мекеме алғашқыда жалғыз тіс емдеу бөлмесінен басталған.
— Осыдан 10 жыл бұрын жалғыз креслосы бар тіс емдеу бөлмесін ғана ашқан болатынмын, — деген клиника директоры, жоғары дәрежелі тіс-дәрігері, медицина ғылымдарының кандидаты Съезбек Ахметов, — Уақыт өте келе емдеу орындарын көбейттік. Алайда одан әрі қарай ұлғайуға мүмкіндігіміз болмады. Дегенмен жоспарымыз көп болатын. Осыдан кейін субсидия алу үшін «Даму» қорының көмегіне жүгіндік. Бұл 2013 жыл еді. Міне, осы кезден бастап жоспарымыздың барлығын «Даму» қорымен жүзеге асырып келе жатырмыз. Айта кетуіміз керек, осы қолдаулардың арқасында жеке ғимарат алып, қызмет түрін арттыру үшін заманауи қондырғыларға қол жеткіздік.
«Жан — Ер» медициналық орталығы өткен жылы 37 млн. теңге көлемінде субсидия алған. Ал ағымдағы жылы ВТБ Банкі 146 млн. теңгенің несиелік жобасын бекіткен. Аталған қаражатқа қосымша ғимарат күрделі жөндеуден өткізіліп, 20 орынға арналған күндізгі стационар іске қосылмақ. Ал «Даму» қоры несиені субсидиялауды жоспарлап отыр.
Асан МЫРЗАХАН, «Семей таңы»
