Жаңа оқу жылының қарсаңында «Мектепке жол» қайырымдылық акциясы ұдайы ұйымдастырылуда. Аталмыш акция 31 тамыз күні «Нұр Отан» партиясы Семей қалалық филиалының ұйытқы болуымен өтті. Шараға партия ұжымы, «Жанұя орталығы» қоғамдық қорының басшылығы, халық қалаулылары мен акцияға демеушілер қатысты.
Шараның маңызы мен мақсатына тоқталған «Нұр Отан» партиясы Семей қалалық филиалының қоғамдық қабылдау бөлімінің меңгерушісі Дархан Жұмаділов қыркүйек айының соңына дейін акция жалғасатындығын мәлімдеді.
— Бүгінгі таңда мемлекеттік саясаттың басты бағыттарының бірі – аз қамтылған және көпбалалы отбасыларды қолдау. Акция аясында бүлдіршіндерге демеушілердің көмегімен сыйлықтар, мектепке керек оқу құралдарын, киім-кешектер табыс етіп отырмыз. «Мектепке жол» акциясы дәстүрлі түрде жыл сайын ұйымдастырылады. Оған қатысушылардың да саны артып келеді. Дәстүрлі шара 30 қыркүйекке дейін жалғасады. Алдағы уақытта да қала кәсіпкерлері мұндай қайырымдылық шараға қолдау танытады деген сенімдеміз,- деп атап өтті өз сөзінде Дархан Жұмаділов.
Бұл күні 15 бүлдіршін мектеп құралдары және спорттық киімдермен қамтамасыз етілді. Бастамаға қаржылай қолдау танытқан «Семей Инжиниринг» АҚ.
Қайырымдылық адамзат баласы-нының бойындағы игі қасиеттердің бірі екендігін жеткізген «Жанұя орталығы» қоғамдық қорының директоры Людмила Асташкина «Семей Инжиниринг» АҚ бас директоры Мейрамхат Айнабековке қоғамдық қор атынан алғыс хат тапсырды.
«Тірі адамның жүректен аяулы жері жоқ» деп ұлы Абай атамыз айтқандай, шараға қатысушылар адамгершіліктен арылмай, мейірім мен ізгілік, рақымдылық пен имандылық қатар жүргенде әлем нұрлана түсетіндігін тілге тиек етті. Сый-сыяпатқа ие болған бүлдіршіндер мен ата-аналар ұйымдастырушыларға жүрекжарды лебіздерін білдірді.
-«Табиғаттағы барлық жылу күннен, өмірдегі барлық жылу – адамнан» демекші, адамзат баласының бір-біріне деген қамқорлығы, бауырмалдылығы азаймаса екен. Қазіргі таңда көпбалалы отбасыларға мұндай қолдау өте қажет. Сондықтан да демеушілерге, шараға ұйытқы болып отырған жандарға алғыс айтамыз. Бүгін аға-әпкелерінің қолдауын сезініп, мейірімін байқап отырған балаларымыз ертең-ақ ер жетіп, елімізді көркейтуге атсалысады деп ойлаймын. Ең бастысы, олар қайырымды болады, себебі, кішкентайларынан қайырымдылықтың не екенін көріп отыр, — дейді төрт баланың анасы, акцияға Темірлан есімді ұлымен келіп отырған Гүлжаһан Боранбаева.
Әйгерім ЖАҚЫП, «Семей таңы»
