30 тамыз, яғни ҚР Конституциясы мерекесі күнінде Семейде ирландиялық «Чернобыльден де қауіпті» қоғамдық қорының бастамасымен шаһарда жазылмайтын науқас емделушілерге арналып жаңа хоспис пайдалануға берілді. Мекеменің ресми ашылу салтанатына Семей қаласы әкімінің орынбасары Надежда Шарова, «Чернобыльден де қауіпті» қоғамдық қорының бас директоры Фиона Коркоран және үкіметтік емес ұйымдардың белсенділері жиналды.
Белгілі болғандай, жаңа нысан 30 орынға шақталып салыныпты. Оның жалпы аумағы 500 шаршы метрді құрайды. Жобаға шамамен 200 мыңнан аса евро жұмсалынған екен. Бұған қоса тағы 12 млн. теңге көлеміндегі қаржыны «Барыс» қоғамдық қоры бөлген. Сондай-ақ инженерлік-коммуникация жүйелерін тартуға жергілікті билік көмек қолын созған. Айта кету керек, мекеме Ирландия елі мен Шығыс Қазақстан облысы әкімдігі арасындағы әріптестік аясында бой көтерді.
— Құрметті семейліктер және қала қонақтары! Барлықтарыңызды Семей қаласының әкімі Ермак Бидахметұлы атынан ҚР Конституциясы күні мерекесімен шын жүректен құттықтауға рұқсат етіңіздер. Мемлекетіміздің келешегі жарқын болып, оның тұғыры әрқашанда биіктей берсін. Қымбатты Фиона Коркоран ханым! Барша семейліктермен қатар бүкіл шығысқазақстандықтардың атынан сізге ризашылығымызды білдіреміз. Бұл іс арқылы өзіңіздің ақкөңіл әрі таза ниетті жан екеніңізді дәлелдей білдіңіз. Мұндай нысанның біздің өңірімізге қажет екені даусыз. Себебі ауыр дертпен науқастанатын адамдар ерекше күтімді қажет етеді. Сондықтан да сізге тағы бір мәрте үлкен алғысымызды айтамыз, — деген жылы лебізін жеткізді мәртебелі мейманға шаһар басшысының орынбасары Надежда Васильевна.
Өз кезегінде Ирландияның қоғам белсендісі осы жобаның сәтті іске асырылуына көмектескен аймақ билігі мен жергілікті үкіметтік емес ұйымдардың жетекшілеріне алғысын айтты.
— Бұған дейін біз Украинада Чернобыль АЭС-ның апатынан зардап шеккен азаматтарға көмектескен болатынбыз. Ал кейіннен мен шотландтық журналистің мақаласын оқып отырып Семей ядролық сынақ полигоны туралы ақпаратқа қанық-тым. Одан келген зардаптың қаншалықты көлемде ауыр екендігін түсіндім. Семей өңіріне келгенімде жазылмайтын ауыр дертке шалдыққан жандарға қол ұшын созу керек екенін сездім. Сондықтан осындай шешім қабылдауға тура келді. Ирландия мен Қазақстанның тығыз байланысы арқасында біз осы жақта арнаулы интернаттар мен балалар үйін салуға жәрдем көрсетіп келеміз. Бұдан бөлек, 40 тонна көлемінде гуманитарлық көмек жіберуге атсалыстық, — деп атқарылған жұмыстармен бөлісті Фиона Коркоран.
Сонымен қоса хоспистің ашылу салтанатына белгілі әнші, итальяндық музыкант Сон Паскаль мен қазақстандық жас актер, Ақан Сатаевтың «Ағайындылар» көркем туындысында басты рөльдердің бірін сомдаған Әнуар Нұрпейісов те қатысқандығын атап өткен жөн. Өз сөзінде итальяндық өнерпаз һәкім Абайдың шығармашылығын аса құрметпен бағалайтынын тілге тиек етіп, Ұлылардың мекеніне келгеніне қуанышты екенін айтты. Оның дәлелі ретінде көпшіліктің алдында Абай Құнанбайұлының «Көзімнің қарасы» туындысын орындап, жиналғандарды тәнті етті.
— Семейге келгеніме өте ризамын. Мен ұлы Абайдың шығармышылығына тәнті болған жандардың бірімін. Семей ядролық сынақ полигоны жайында хабарым да мол. Ол қазақ халқына үлкен қайғы алып келгенін білемін. Киелі шаһарға келудегі мақсатым осы және Қазақстан тарихына қатысты өзге де мәліметтерді өз көзіммен көріп қаныққым келеді, — деді Сон Паскаль.
Жақсылық МҰРАТҚАЛИҰЛЫ, «Семей таңы»
