Жылуға берешегі барлармен жыл басынан бері қала бойынша арнайы рейд шаралары жүргізіліп келеді. Бұл жұмыстар өз нәтижесін беріп те жатыр. Себебі осы күнге дейін қордаланған қарыздың көп бөлігі қайтарылды. Дегенмен бұл бағыттағы жұмыстар алдағы уақытта да жалғасын таппақ.
Қазіргі таңда жылуға берешектері барлар қатарында теміржол қызметкерлері де бар. Өткен сәрсенбі күні Семей қаласының әкімі Ермак Сәлімов тұтынылған жылу үшін қарызы бар «Қазақстан темір жолы» ҰК» АҚ филиалы Семей жол бөлімшесінің ұжымымен арнайы жүздесті. Аталмыш жиынға Семей жол бөлімшесінің басшысы Марлен Көкірекбаев та қатысты. Шаһар басшысы Ермак Бидахметұлы теміржолшылардың жылуға берешегі жыл басында 3 млн. 660 мың теңге болғанын, бүгінде аталған қарыздың 1 млн. теңгесі қалғанын атап өтіп, аталған қаражаттың жуық арада төленуі керектігін жеткізді.
— Өздеріңіз білесіздер, өткен жылғы жылыту маусымы аяқталысымен жылуға қарызды өндірумен айналысып келеміз. Оған сот орындаушылары, автокөлік инспекциясы мен бұқаралық ақпарат құралдары сынды барлық механизмді жұмылдырдық. Жылуға қарызды өтеуден жалтарғандарға қоңырау шалып та ескерту жасадық. Айта кетуіміз керек, жылуға қарызды өндіруде оң өзгерістер бар. Дегенмен бұл жұмыстар жалғаса беретін болады. Өйткені бізге алдағы жылыту маусымына дайындалып, көмір сатып алу керек. Қазандықтар мен жылу тарату желілері де жөндеуден өткізілуде. Бұл жұмыстардың барлығы тұрғындардың қыс мезгілінде жайлылығы үшін жасалып отыр, — деді қала әкімі Ермак Сәлімов.
Қала басшысы жылуға қарыздың әрбір тиыны маңызды екенін, себебі алдағы маусымға көмір қорын жеткізу керектігін баса айтты. Ол сондай-ақ теміржол бөлімшесінде жұмыс жасайтын әрбір борышкердің атын атап, бөлім басшыларына жағдайдың мәнісін түсіндіруді талап етті. Теміржол қызметкерлері өз кезектерінде қыркүйек айының 10-на дейін барлық қарыздың жабылатынына сендірді.
Жиын соңында «Қазақстан темір жолы» ҰК» АҚ филиалы Семей жол бөлімшесінің басшысы Марлен Көкірекбаев барлық бөлімше басшыларына қарызды қайтару жөнінде тапсырма бергенін, жылыту маусымына дейін теміржолшылар ешқандай берешексіз кіретінін мәлімдеді.
Асан МЫРЗАХАН, «Семей таңы»
