Биыл Семей өңірі бойынша бес мыңнан аса бүлдіршін мектеп табалдырығын аттап, бірінші сыныптың оқушысы атанды. Бұл туралы 1 қыркүйек – Білім күнінде шаһардағы №22 мектеп — лицейінде өткізіліген алғашқы қоңырау салатанатында мәлім болды. Айтулы шараға Семей қаласының әкімі Ермак Сәлімов арнайы қатысып, оқушыларды жаңа оқу жылының басталуымен құттықтады.
Ағымдағы жылы жалпы Шығыс Қазақстан облысы бойынша 23 мың бүлдіршін бірінші сыныптың партасына отырыпты. Ал 11-ші сыныпқа көшкен оқушының саны он мыңға жетеғабыл. Ал Семей қаласында бұл көрсеткіш 1700 түлекті құрауда. №22 мектеп — лицейінде өткен алғашқы қоңырау мерекелік жиынында шаһар басшысы Ермак Сәлімов, семейлік мектеп түлектерінің биылғы ҰБТ-де жеткен жетістіктеріне тоқталып, бұл нәтижені келер жылы мектепті тамамдайтын оқушылар еселей түсетініне сеніммен қарайтынын айтты.
— Құрметті ұстаздар, оқушылар және ата-аналар! 1-ші қыркүйек – Білім күні мерекесімен барлықтарыңызды құттықтауға рұқсат етіңіздер. Бұл мереке жалпыхалықтық сипатқа ие болған айрықша күндердің бірі. Әр адамның өмірінде оның алар орны да ерекше екені күмәнсіз. Әсіресе бүгінгі күн мектеп табалдырығын алғашқы рет аттағалы тұрған кішкентай бүлдіршіндеріміздің естерінде сақталып қалатыны белгілі. Тарыдай болып кіріп, таудай болып шыққалы тұрған оқушыларға қадамдары сәтті болсын деген тілегімді білдіремін. Өздеріңізге белгілі, 2016 жылы 33 оқушы «Алтын белгіге», 19 оқушы «Үздік аттестатқа» ие болған. Биылғы жаңа оқу жылына білек сыбана кірісуді көздеген 1700-ге тарта түлекке білімнің жоғары деңгейін көрсетсін деген ниетімді жеткізгім келеді. Мыңдаған ұстаздар үшін 1 қыркүйек, жаңа бастамалар мен тың идеялардың нышаны іспетті елеулі күн. Сондықтан да мұғалімдерге зор шығармашылық табыс тілеймін. Білімнің қара шаңырағы болып саналатын №22 мектеп, биылдан бастап лицей атағына қол жеткізіп отыр. Бұл әуелі білім ұжымы бірлесіп атқарған жұмысының жеңісті жемісі деп білемін. Осы ретте Семей қаласының әкімдігі лицейге 6 млн. 4 мың теңгені құрайтын мультимедиялық лингофонды кабинетті сыйға тартуға шешім қабылдады. Аталмыш озық үлгідегі кабинет, мектеп оқушыларына инновациялық технологияларды меңгеруге жол ашып, білім ордасы биік белестерді бағындырады деген ойдамыз. Әрдайым жастарымыз білім мен еңбекте тек қана алдыңғы қатардан көрінсін. Мерекелеріңізбен құрметті жерлестер, — деп түйіндеді өз құттықтау лебізін Ермак Бидахметұлы.
Әрмен қарай №22 мектеп лицейінің жас өнерпаздары жиналған қауымға театрландырылған көрініс пен дайындаған концерттік бағдарламаларын ұсынып, көпшіліктің қошеметіне бөленді. № 22 мектеп – лицейдің бірінші сынып табалдырығын аттап тұрған бүлдіршіндердің бірі — Аяла Серғазы. Ол дәл осы білім ұясына келгеніне дән риза. Себебі оның үлкен ағасы да бұл лицейді тәмамдап, бүгінде еліміздегі үздік жоғары оқу орындарының бірінде өз білімін жетілідіруде. Келешекте кішкентай балғын әкесі сынды адамның өміріне араша болатын мықты дәрігер болуды армандайды екен.
— Бүгінгі білім күні мейрамымен барша оқушыларды және өзімнің жаңа достарымды, яғни сыныптастарымды құттықтаймын. Мектепте оқитыныма қуаныштымын. Менде өзгелердей жақсы білім алып, елімнің дамуына өз үлесімді қосқым келеді. Сол үшін сабағымды жақсы оқып, зерек болуға бар күшімді саламын, — деген өзінің асқақ арманымен бөлісті кішкентай балғын.
Жақсылық МҰРАТҚАЛИҰЛЫ, «Семей таңы»
