Семей қаласында күзгі ауылшаруашылық жәрмеңкесі дәстүрлі түрде жалғасуда. «Солтүстік» сауда-логистикалық орталығының ашылғанына 1 жыл толуына орай, демалыс күндері кезекті жәрмеңке ұйымдастырылып, оның аясында мерекелік шара өтті. Мерекелік жәрмеңкеге Семей қаласының әкімі Ермак Сәлімов қатысты.
Сауда-логистикалық орталығының аумағында өткен жәрмеңкелерде күзгі өнімдердің сан түрі саудаланады. Әлбетте, бағалары да қолжетімді. Сауда орталығы жұмыс істеген бір жыл ішінде тұрғындар сапалы ауылшаруашылық өнімдерін өндірушілерден ешқандай делдалсыз сатып алуда. Ал мерекелік жәрмеңке барысында келушілер назарына тігілген киіз үйлер мен балалар үшін орнатылған ойын алаңы, құрылған алтыбақан ұсынылды. Орталықтағы тәртіп пен тазалық, сондай-ақ мерекелік шаралар сауда жасауға келген тұрғындарға көтеріңкі көңіл-күй сыйлады.
— Баға біздің көңілімізден шығады. Барлығын орташа бағамен аламыз. Мұнда ет өзге жерлерге қарағанда арзандау,- дейді қала тұрғыны Мәруа Қабидоллақызы.
Сауда орталығы жұмыс істеген бір жыл ішінде қалаға жақын маңдағы шаруа қожалықтарының, фермерлердің қатысуымен жәрмеңке өткізу игі дәстүрге айналған. Өнім өндірушілермен делдалсыз жүргізілген сауда тұрғындар үшін тиімді, сондай-ақ бағаның негізсіз өсуін бақылауға мүмкіндік береді.
— Бұл қазіргі заманға сай, Мемлекет басшысының Үкімет отырысында айтқан тапсырмасына сәйкес келеді. Яғни қала мен ауыл арасындағы бұрын-соңды болмаған байланысты көрсетіп, осындай сауда-логистикалық орталықтары арқылы жүзеге асырылады,- деп атап өтті қала әкімі Ермак Бидахметұлы.
Орталықтың қызметі болашақта өркениетті сауданың тасы өрге домалайтындығын дәлелдеп берді. Сондықтан да сауда орталығының басшылығы мұнымен шектелмей, көрсетілетін қызмет түрлерінің санын көбейтпек ниетте.
«СТ — ақпарат»
