Семей шаһарының Интернет кеңістігі тағы бір сайтпен толықты. Шаһарда қалалық инфрақұрылымды және халыққа қызмет көрсетуді жақсартуды көздейтін www.bakylau-semey.kz жаңа портал өз жұмысын бастады.
«Бақылау» деп атау алған сайт арқылы кез келген қала тұрғыны шағымдары мен өтініштерін әкімдіктің бөлімдеріне жылдам түрде жолдай алады. Бұл жаңашылдықтың жұмыс жүйесі қарапайым. Мәселен, көшеде келе жатқан адам ашық жатқан кәріз құдығын немесе өсіп кеткен ағаштың жол белгісін жауып қалғанын байқаса, оны бірден «Бақылау» сайтына хабарлай алады. Семейліктерге хабарламасымен қатар фотосуреттерін де жіберуге болады. Портал модераторы келіп түскен хабарламаны бірден жауапты ведомствоға жібереді. Ал шағымдар мен өтініштерге берілген жауап аз уақыттың ішінде қала тұрғынының электрондық поштасына келіп түспек.
Айта кетейік, жоба әлеуметтік желілердің элементтері негізінде құрылған. Айталық, семейліктер қалдырылған хабарламаға қолдау білдіріп, оның төменгі жағына пікірін жолдай алады. Бұл жергілікті атқарушы билік өкілдеріне мәселенің қаншалықты өзекті екенін анықтауға да мүмкіндік бермек. Бұдан өзге «Бақылау» жүйесінің мобильдік нұсқасы да қолданысқа беріліп отыр. Бұл қала тұрғындарына өз сауалдары мен өтініштерін мәселе туындаған орыннан шұғыл түрде жолдауға мүмкіндік береді.
Өткен жұма күні Семей қаласының әкімдігінде аталмыш порталдың таныстырылымы өтті. Жиынға Семей қаласының әкімі Ермак Сәлімов пен қалалық мәслихат хатшысы Бейсенбек Ақжалов, сондай-ақ әкімдіктің дербес бөлім басшылары және қоғамдық ұйым өкілдері қатысты. Басқосуда «Рейтинг» ЖШС компаниясы өкілдері жобаны таныстырды.
— Аталған интернет-портал тұрғындардың шаһарды абаттандыру жұмыстарына белсенді араласуына, көрсетілетін мемлекеттік қызметтің сапасын арттыруға және туындаған мәселенің жылдам шешілуіне жағдай жасайды,- дейді «Рейтинг» ЖШС сараптама секторының жетекшісі Назым Салықова.
Дегенмен жиында сайттың күрделі құрылымына, дұрыс жасалып бітпеген мобильдік қосымшасына, жалпы, жүйенің жұмысына қатысты көптеген сын-ескертпелер айтылды. Алайда Семей қаласының әкімі Ермак Сәлімов аталған жобаның маңыздылығын айтып, жаңа жүйенің ұтымды тұстарына тоқталды.
— Біз үшін бұл жоба ауқымды жұмыс туындататынын түсініп отырмын. Кейбіреулер жайдан-жай жарысып жазып, сауалдарын жолдай береді. Алайда оны түсініп, қабылдауымыз керек. Бізге интерактивті байланыс өте қажет. Мәселен, мен әлі күнге дейін қабылдауыма жазылған 100-ден астам азаматты қабылдап үлгермедім. Қабылдау күнделікті жүргізілгенімен, физикалық тұрғыда үлгермей жатырмын. Ал арнайы портал көптеген мәселелерді жылдам шешуге көмектеседі. Осылайша, біз ақпаратты технология арқылы жергілікті атқарушы билік пен халық арасындағы өзара байланысты жеңілдете аламыз. Бұл жұмыстардың барлығы қала азаматтарының қауіпсіздігі мен жайлы өмір сүруі үшін жасалып отыр. Аталған жоба әкімдіктің бөлім мамандарына салмақ түсіретіні рас. Алайда бұл жұмыстар қажет және маңызды болып саналады,- деді қала әкімі Ермак Сәлімов.
Асан МЫРЗАХАН, «Семей таңы»
