Шыны керек, Семейде жерлеу агенттіктерінің қызметі жүйесіз және бақыланбайды. Соның салдарынан марқұмдардың туыстары тарапынан түсініспеушіліктер болып жатады. Жерлеу қызметтері арзанға соқпайтындықтан, тұрғындар жерлеу орындарына дұрыс қарауды талап етеді. Бүгінде Семейде ресми түрде 3 бейіт қорымы бар. Оларды аралап көріп шыққан қала әкімі Ермак Сәлімов жерлеу рәсімін өткізетін қызмет саласын тәртіпке келтіру керектігіне көз жеткізді.
Бүгінде жерлеу рәсімдері қаладағы 3 бейітте өткізіледі. Оның бірі Алматы тас жолы бойында болса, екіншісі Знаменка ауылына барар жолда, соңғысы Павлодарға баратын жолдың 18-ші шақырымындағы қарағайлы орман бойында орналасқан. Жерлеу рәсімдерін жүргізу үшін «Ритуал Семей» ЖШС-мен келісімшарт жасалған. Мекеме мемлекеттік сатып алуға қатысу барысында, бір қабірді қазу қызметі 15 мың теңге тұратындығына қарамастан, байқауды небәрі бір теңгеге ұтып алған. Алматы тас жолы бойындағы бейіттер басын көріп шыққан қала әкімі мен қалалық мәслихаттың депутаттары бірқатар ескерту жасады. Атап айтқанда, нормативтік актілерге сай болғандықтан мүлтіксіз орындалуға тиіс қызмет түрлері бойынша қажетті ақпараттың болмауы бірқатар сауалдар туғызып отыр.
Бұдан кейін қала әкімі мен депутаттар корпусының өкілдері Знаменка тас жолы бойындағы бейіттерде болды. Мұнда аумақ пен өздеріне алынған міндеттемелерге қатысты мәселе болған жоқ. Жерлеуге арналған алаң толықтай қоршалған. Ал Павлодар тас жолы бойындағы ескі бейітте мәселе жетерлік. Бастысы — аумақ қоқысқа толы. Тіпті жол бойында шашылып жатыр, аяқ алып жүргісіз. Сондай-ақ рұқсат етілмесе де жерлеу рәсімдері жүргізіледі. 2010 жылдан бері бейіт ресми түрде жабылғанымен, жерлеу рәсімдері тыйылмай тұр. Тіпті кейбір азаматтардың алдын ала сатып алған жер телімдері бар. Жағдайға қаныққан қала басшысы бұл қызмет түрі мемлекет тарапынан реттелуі керектігін айтты.
Бүгінде қала басшылығы зираттардың ауданын 17 гектарға дейін ұлғайту шараларын жүргізуде. Бейіт Бесқарағай ауданының аумағында орналасқандықтан, кедергілер бар. Алайда жыл соңына дейін жерді рәсімдеу аяқталуы тиіс.
«СТ — ақпарат»
