Тұрғындар ерекше күтетін мерекелердің бірі – Қала күні. Аталмыш мейрамды атап өту барысы 19 қыркүйек күні Семей қалалық ақпарат орталығында қала әкімінің орынбасары Надежда Шарова мен ішкі саясат бөлімінің басшысы Айдар Садырбаевтың қатысуымен өткен баспасөз мәслихатында талқыланды.
Әр жылы әр мезгілде атап өтіліп жүрген Қала күні, қала басшылығының жанындағы мәдениет, өнер және спорт мәселелері жөніндегі кеңес мүшелері мен қоғам активтерінің шешімімен, биылғы жылдан бастап қыркүйек айының төртінші жексенбісінде дәстүрлі түрде мерекеленетін болды. Қала басшысының орынбасары мерекелік шараны өткізу мақсатына тоқталды.
Семей қалалық ішкі саясат бөлімінің басшысы Айдар Садырбаев ағымдағы жылы Қала күні ел Тәуелсіздігінің 25 жылдығы, Семей ядролық сынақ полигонының жабылуының 25 жылдығы, Әлихан Бөкейхановтың 150 жылдығы, Қайым Мұхамедхановтың 100 жылдығымен байланыстырылатынын айта келе, атаулы күнді мерекелеу жоспарымен таныстырды. Оған сәйкес, мерекелік шаралардың басым көпшілігі 24-25 қыркүйек күндеріне жоспарланып отыр. Қала мектептерінде, музейлер мен кітапханаларда «Ана тілім – тірегім», «Менің Семейім», «Туған қалам Семейім», «Өткені өнеге, бүгіні бекем, болашағы жарқын Семей», «Семей – еліміздің рухани-мәдени орталығы», «Семей көшелерінің шежіресі» тақырыптарымен дөңгелек үстелдер, байқаулар, семинарлар, ақпараттық сағаттар мен кітап көрмелері ұйымдастырылады. Степной кентінде ат жарысы, Әуезов алаңынан бастау алатын велошеру, Ертіс жағалауында және Орталық саябақта мерекелік концерт, Абай атындағы театрда фестиваль өтеді деп жоспарлануда. Сондай-ақ медициналық мекемелерде ашық есік күні жарияланса, «Солтүстік» сауда — логистикалық орталығында төмендетілген бағамен тұрғындарға азық-түлік өнімдері жәрмеңкеде ұсынылмақ. Жексенбі күні кешкілік қала тұрғындары мен қонақтарына көтеріңкі көңіл-күй сыйлау мақсатында Орталық алаңда қалалық жастар фестивалі өткізіліп, отшашу болады. Сонымен қатар 30 қыркүйек күні эстрада жұлдыздырының қатысуымен көлемді концерт өткізілмек.
Әйгерім СӘРСЕНҒАЛИ,
«Семей таңы»
