27 қыркүйек күні қалалық әкімдіктің жанындағы антитеррорлық комиссияның кезекті отырысы өтті. Семей қаласының әкімі Ермак Сәлімовтің төрағалығымен өткен жиынға ШҚО Ұлттық қауіпсіздік департаменті басшысының орынбасары Ермек Жәкібаев, Семей қалалық ІІБ-ның басшысы Жұмабек Исадилов, «Шығыс» өңірлік әскери қолбасшылығының басшылығы және өзге де бірқатар құзырлы органдардың басшылары жиналды.
Комиссияның күн тәртібінде екі мәселе қаралды. Атап айтқанда, өзге елдердегі теологиялық оқу орындарына сапарға аттанатын студенттерді қадағалау әрі 2014-2017 жылдарға бағытталған діни экстремизм мен терроризмге қарсы іс-қимыл жөніндегі мемлекеттік бағдарламаның орындалу барысын талқылау. Отырыс барысында анықталғандай, бүгінде қазақстандықтар 11 мемлекеттегі 64 оқу орнында діни білім алып жатыр екен. Оның тек 15-і ғана ресми түрде теологиялық оқу орны ретінде тіркеліпті. Десе де аталмыш оқу орындарында халықаралық білім беру стандарттары сақталғандығы белгілі болып отыр. Сондай-ақ қазіргі таңда жоғарыда айтылған білім ордалары мен Қазақстан мұсылмандар діни басқармасы арасында екі жақты келісім бар екені анықталды. Бұдан өзге басқосуда комиссияның атқарған істері мен алдағы жұмыс жоспары талқыланды.
«СТ – ақпарат».
