Семейде жылуға қарызы бар борышкерлермен жұмыс күшейтілді. Сәрсенбі, 28 қыркүйек күні Семей қаласы әкімінің орынбасары Николай Ушаков бастаған коммуналдық мекеме өкілдері Жамақаев көшесі, 219 мекенжайындағы көп қабатты тұрғын үйдегі жылуға қомақты қарызы бар бірқатар пәтерлерді орталық су тарту жүйесінен ажыратты.
Қала әкімінің орынбасары Николай Ушаков «Семей Водоканал» мекемесінің аталған нысанда атқарған жұмысын қадағалады. Айта кетуіміз керек, бұған дейін Жамақаев көшесіндегі көп қабатты тұрғын үйде қала әкімі Ермак Сәлімов болып, тұрғындарымен кездескен еді. Ол кезде, бірқатар түйткілді мәселелермен қатар, жылуға жиналып қалған қомақты көлемдегі қарызды қайтару мәселесі де талқыланған болатын.
Бүгінде аталған мекен жайдағы (219 және 219 «А») көп қабатты тұрғын үйлерінің «Теплокоммунэнерго» МКК алдындағы жалпы дебиторлық қарызы миллион теңгеден асқан. Оның үстіне жылуға қарыз әрбір екінші пәтерде бар көрінеді. Бұл алдағы қысқы маусымға дайындық жұмыстарына кесірін тигізуде. Сондықтан бұл мәселеге жергілікті билік мән беріп, қарызды қайтару жолдарын іздестірген. Нәтижесінде қарыздары 240 мың теңгеден асқан 8 пәтерді орталық су тарту жүйесінен ажыратты. Нақтырақ айтатын болсақ, аталған пәтерлердің ас үйі, ваннасы мен әжетханасы жұмыс істемейтін болады. Ал аталған жүйені қайта қосу үшін борышкерлерге негізгі қарыздарын өтеп, сонымен қатар коммуналдық мекеменің арнайы бригадасына қосымша жұмысы үшін 12 мың теңге төлем жасауға тура келеді.
Қала әкімінің орынбасары Николай Ушаковтың айтуынша, аталған шаралар қызметке уақтылы төлем жасап отырған абоненттер мен жалпы тұрғын үйдің су тарту жүйесі жұмысына кері әсер етпейді. Есесіне тұрғындарды жауапкершілікке үйретпек.
— Осындай қатаң шаралардың қолданылатыны туралы бұған дейін де айтылған болатын. Бүгін «Теплокоммунэнерго» МКК-нің «Семей Водоканал» МКК алдындағы қарызын өзара шешу үшін Жамақаев көшесіндегі 219-шы тұрғын үйдегі жылуға төлем жасаудан жалтарған жауапсыз борышкерлерді су тарту жүйесінен ажыратып жатырмыз. Аталған жұмыстарды Жамақаев көшесі, 219 «А» көп қабатты тұрғын үйінде де жүргізу жоспарда бар. Әрине, бұл шаралар тұрғындарға жайсыздық тудырады. Алайда коммуналдық мекемелердің басқа амалдары жоқ. Тіпті кейбір абоненттер жылдар бойы есеп айырыспаған. Салдарынан жылуға деген қомақты қарыз жиналып отыр. Жылу берушілердің, отын сатып алу мен жөндеу жұмыстарына кететін шығыннан өзге, жұмысшылардың жалақысы мен «Семей Водоканал» МКК алдында қарызы бар. Ал аталған мекеме «Шығысэнерготрейд» ЖШС-не берешек. Осы орын алып отырған жағдайдың барлығы коммуналдық мекеме өкілдерін қатаң шара қолдануға итермелеп отыр,- дейді Николай Ушаков.
Сала мамандарының айтуынша, пәтерлерді жылу көзінен ажыратқанға қарағанда, су тарту жүйесінен ажырату аса қиындық туғызбайды. Оның үстіне қыс мезгілінде де бұл шаралар кәріз жүйесіне еш әсер етпейді екен. Демек, берешегі бар тұрғындар аталған қызметті ұзақ уақытқа дейін пайдалана алмауы мүмкін. Айта кетуіміз керек, жылуға қомақты қарызы бар Жамақаев көшесіндегі № 219 және 219 «А» тұрғын үйлерінен өзге, пайдаланылған жылу үшін төлем жасаудан жалтарған тағы да бірқатар борышкерлер су тарту жүйесінен ажыратылмақ. Бүгінгі күні «Теплокоммунэнерго» МКК алдындағы жылуға жалпы қарыз 342 млн. 600 мың теңгені құрайды. Оның 240 миллион теңгесі тұрғындар қарызы есебінде.
Асан МЫРЗАХАН, «Семей таңы»
