Семей қаласы әкімдігі жанындағы Жастар істері жөніндегі кеңестің кезекті отырысы болып өтті. Басқосуда ауыл жастарының мәдени деңгейін көтеру әрі олардың бос уақыттарын тиімді ұйымдастыру жайы, сондай-ақ балалар үйлері түлектерінің жұмысқа орналасуы және тұрғын үймен қамтамасыз етілуі, жастарды бұқаралық спортқа тарту сынды мәселелер талқыланды.
Кеңеске Семей қаласы әкімінің орынбасары Надежда Шарова, қалалық жұмыспен қамту және әлеуметтік бағдарламалар бөлімінің басшысы Азамат Құрманғалиев, дербес бөлімдердің жетекші мамандары және жастар ұйымдарының белсенділері қатысты. Алдымен Кеңес мүшелері өткен басқосуларда айтылған ұсыныстар бойынша атқарылған жұмыстардың барысымен танысты.
— Бұған дейінгі отырыстарда айтылған ұсыныстарды ескере отырып, Жастар орталығының мамандары іске белсене кірісті. Атап айтқанда, Приречный және Озерки ауылдық округінің жастарымен кездесу ұйымдастырылған болатын. Кездесуде қатысушылар тарапынан ауыл жастарына арнап мерекелік концерт және семинар-тренингтер өткізілсе деген ұсыныстар түскен болатын. Осыған сәйкес, наурыз айында Мұқыр ауылында «Шырайлы көктем» атты қалалық жас өнерпаздардың қатысуымен концерттік кеш, Озерки ауылында жоғары сынып оқушылары үшін көшбасшылық қабілетті дамытуға арналған семинар-тренинг ұйымдастырылды. Әр ай сайын жастар ұйымдарымен кездесулер өткізіліп келеді. Ал үстіміздегі жылдың қазан айында ел Тәуелсіздігінің 25 жылдық мерейтойына орай қаланың Орталық алаңында жастардың қатысуымен үлкен флешмоб өткізуді көздеп отырмыз,- деді қалалық ішкі саясат бөлімінің бас маманы Гүлнұр Ыдырышева.
Сонымен қатар қалалық мәдениет және тілдерді дамыту бөлімінің бас маманы Анар Қуанғалиева жиналғандарға ауыл жастарының мәдени деңгейін арттыру және олардың бос уақыттарын тиімді ұйымдастыру мақсатымен іске асырылып жатқан жұмыстар жөнінде айтып берді. Анар Қуанғалиеваның айтуынша, бүгінде Семей қаласы мәдениет және тілдерді дамыту бөліміне қарасты 24 мекеме бар екен. Оның 19-ы клубтық типтегі мекемелер.
— Бүгінгі таңда мәдени клубтар жанынан дойбы, шахмат, ән-би, домбыра, әдебиет пен театр үйірмелері және спорт секциялары ашылып, ауыл жастарын өнер мен спортқа баулу бағытындағы жұмыстар жандандырылып келеді. Қазіргі күнде үйірмелердің саны 225-ті құрайды. Бұл үйірмелердің 3 мыңнан астам тұрақты мүшелері бар. Жуырда Қайнар ауылының домбырашылары «Ақ көгершін» байқауында топ жарып, өңіріміздің атын шығарған болатын. Сол сияқты Алғабас ауылының бишілері де Қарағанды облысында өнер көрсетіп, көпшілікті тәнті етті,- деп атап өтті Анар Қуанғалиева.
Сонымен қатар Кеңес отырысында басқа да бірқатар мәселелер көтерілді. Әсіресе бүгінде ауылдық жерлердің басым бөлігі ғаламтор желісіне қосылмағандығы, осы бағыттағы жұмыстарды ширату керектігі айтылды.
Жақсылық МҰРАТҚАЛИҰЛЫ, «Семей таңы»
