Қазанның алғашқы жексенбісінде елімізде Ұстаздар күні аталып өтіледі. Мұғалімдердің мерейін асқақтататын мерекенің түп мәні ұстаздарды ұлықтау болып табылады. Семейдің Балалар мен жастардың шығармашылық сарайында Ұстаздар күніне арналған салтанатты іс-шара өткізілді.
Мерекеге қала әкімінің орынбасары Надежда Шарова, қалалық мәслихат хатшысы Бейсенбек Ақжалов, білім бөлімінің басшысы Наталия Фесенко және білім саласының ардагерлері, қоғамдық ұйымдар өкілдері, қала мектептерінің алдыңғы қатарлы ұстаздары, халықаралық, республикалық және облыстық сайыстардың жеңімпаздары қатысты. Салтанатты мерекеге шақырылған қонақтарды Семей қаласы әкімінің орынбасары Надежда Шарова құттықтап, ізгі тілегін жеткізді. — Құрметті ұстаздар мен білім саласының ардагерлері! Сіздерді қала әкімінің атынан төл мерекелеріңізбен құттықтауға рұқсат етіңіздер. Бұл мереке ұстаздардың әр буын өкілдерінің басын қосып отыр. Мұғалім мамандығы – барлық мамандықтың анасы. Сіздер шәкірттеріңізге білім беріп қана қоймай, сол білімді өмірде пайдалануға үйретесіздер. Жеке тұлғаның адамдық бейнесін, ұнамды мінез-құлқын қалыптастырып, қиындықтан шығуға үйретесіздер. Ең бастысы, мемлекетіміздің нағыз ұлтжанды ұрпағын тәрбиелейсіздер. Сондықтан да Сіздердің асыл бейнелеріңіз шәкірттеріңіздің жүрегінде мәңгі сақталады. Сондықтан да Сіздерге басымызды иеміз, құрметті ұстаздар қауымы! Төл мерекелеріңіз құтты болсын!- деді қала әкімінің орынбасары.Салтанатты жиынға қатысқан бірқатар білім саласының қызметкерлері Ғылым және білім министрлігінің, ШҚО білім басқармасының, білім бөлімінің грамоталарымен, сонымен қатар қала әкімі мен қалалық мәслихаттың және Семей қаласы білім беру қызметкерлерінің қалалық кәсіподақ комитетінің алғыс хаттарымен марапатталды. Жиында сондай-ақ білім бөлімінің басшысы Наталия Фесенко «Үздік жыл мұғалімі — 2016» сайысының «Үздік мұғалім», «Мектепке дейінгі мекеменің үздік тәрбиешісі», «Қосымша білім берудің үздік мұғалімі» аталымдары бойынша жүлдегерлерге грамоталар табыстады. Ұстаздардың кәсіби мерекесіне арналған салтанатты жиын балалардың шығармашылық ұжымдары дайындаған мерекелік концертке ұласты. Айта кетуіміз керек, бүгінгі күні Семей өңірінде төрт мыңға жуық мұғалім еңбек етеді. Ал олардың жүзден астамы жас мұғалімдер. Ағымдағы жылы екі мыңға жуық мұғалім әртүрлі деңгейдегі курстардан өткен. Бұл жаңартылған форматтағы, робот техникасы бойынша және Кембридж бағдарламасының курстары. Қаланың 1100 мұғалімі «Биоинформатика және Синергетика» технологиясы бойынша біліктіліктерін арттыру курстарынан өтіп, аталған технологияны өздерінің жұмыс тәжірибелерінде белсенді түрде қолдануда. Өткен оқу жылы ішінде 760 педагогикалық қызметкер қалалық, облыстық және республикалық кәсіби сайыстарға қатысқан. Келешек ұрпақтың білімді де саналы болып өсуі жолында аянбай еңбек етіп жүрген ұлағатты ұстаздарды біз де төл мерекелерімен құттықтаймыз!
Асан МЫРЗАХАН, «Семей таңы»
