Елбасы Нұрсұлтан Әбішұлы Назарбаев жыл сайынғы Жолдауында білім саласына ерекше назар аударып келеді. Болашақ ұрпақтың сапалы білім алуы үшін оқытудың заманауи технологияларын енгізу, білімге қолжетімділікті кеңейту Қазақстанның одан әрі қарыштап дамуына үлкен үлес қосары сөзсіз. Сонымен қатар Мемлекет басшысы еліміздегі екі ауысыммен оқитын және апатты жағдайдағы білім ошақтарының орнына жаңа да заманауи ғимараттар салуды және осы арқылы бәсекелестікке қабілеттілікті арттыруды міндеттеді.
Білімді ұрпақ – жарқын болашақтың кепілі. Сондықтан Үржар ауданында өскелең ұрпақтың сапалы білім алуына толыққанды жағдай жасалып отыр. Бүгінгі күні өңірде жиырмадан астам жаңа мектеп ғимараттары қолданысқа беріліп, күрделі мәселелер оң шешімін табуда. Осы ретте Ұстаздар күні қарсаңында ауданда 320 орынға шақталған Жансүгіров атындағы орта мектеп ғимаратының жаңадан қолданысқа берілуін айтуға болады. Жаңа ғимараттың ашылуына табанды талап қоя білген аудан әкімі Серік Зайнулдиннің үлесі, әрине, орасан зор.
Бұл күн үржарлықтардың көптен күткен қуанышты күні еді. Себебі бұл мектептің құрылысы осыдан 13 жыл бұрын басталғанымен, мердігерлердің жауапсыздығынан сақалды құрылысқа айналған. Содан бері көптеген кедергілер кездесіп, тек былтырғы жылы ғана Семей қаласындағы «Алау» құрылыс компаниясы осы нысанды өз жауапкершіліктеріне алып, бүгінгі күні жұмыстарын сәтті аяқтап отыр. Бұрынғы Жансүгіров атындағы орта мектептің оқушылары 1962 жылы салынған апатты жағдайдағы ескі ғимаратта білім алып келген еді. Енді ол күндердің барлығы артта қалды. Осы ретте мектеп директоры Гауһар Жағалбаева, мектеп оқушылары мен мұғалімдер ұжымы аудан әкімі Серік Зайнулдинге, облыстық, аудандық мәслихат депутаттарына, аудан кәсіпкерлеріне шын ниетімен алғысын айтып, ризашылықтарын білдіруде. Қолданысқа берілген жаңа білім ордасы қос қабатты, оқу кабинеттері заманауи құрал-жабдықтармен қамтамасыз етілген. Ғимарат құрылысына 861 млн. теңге қаражат жұмсалды. Мұнда оқушылардың жан – жақты білім алуына барлық жағдай жасалған. Зертханалық, тәжірибелік жұмыстар жүргізуге қолайлы биология, химия кабинеттері бар. Технология кабинеттері, басқа да пән кабинеттері, асхана, мәжіліс залы, кітапхана, медиатека, 2 лингофон кабинеті, емшара бөлмесі – бәрі де қажетті керек – жарақтармен толық жабдықталып отыр.
Ашылу салтанатында мектеп бүлдіршіндері ұсынған әдеби монтаждан кейін аудан әкімі Серік Зайнулдин жиналған көпшілікке құттықтау сөзін арнады:
– Құрметті жерлестер, ұстаздар, оқушылар, ата-аналар! Бүгін Үржар ауданында екі бірдей қуаныш. Жаңа мектеп ғимаратының қолданысқа берілуі Ұстаздар күнімен тұспа-тұс келіп отыр. Ұстаздар сіздерді аудан әкімдігі мен аудандық мәслихат атынан төл мерекелеріңізбен және жаңа мектептің ашылуымен құттықтаймын. Осы мектептің салынуы жолында атсалысқан барлық адамдарға алғысымды білдіремін. Бұл жерде барлық жағдай жасалған, мектептеріңізде білімді ұрпақтар көбейе берсін. Бүгінгі қуаныш құтты болсын, іші білімді оқушыларға толсын, балаларымыздың дені сау болып, Үржардың шоқтығын биіктете берсін,- деп, қуаныш иелерін құттықтап, жаңа мектепке бағалы сыйлық тарту етті.
Сонымен қатар аудан әкімі Серік Зинабекұлы ізденіспен, шығармашылықпен жұмыс істеп жүрген жетістігі жоғары бірқатар ұстаздарға аудан әкімінің Құрмет грамоталары мен алғыс хаттарын салтанатты түрде табыс етті. Жаңа ғимараттың символдық кілтін мектеп басшысына тапсыру құрметі мердігер компанияның директоры міндетін атқарушы Рыспек Арқабаевқа берілді. Осыдан кейін қазақы дәстүр бойынша шашу шашылып, лента қию рәсіміне кезек берілді.
Ашылу салтанатынан соң мектеп оқушылары мен аудандық Мәдениет үйі өнерпаздары жиналған қауымға ән-жырларын тарту етті.
Бауыржан ЖАҚЫП,
«Семей таңы»
