Өткен аптаның жұмасы, 18 қараша күні Семей қаласында Тарбағатай ауданының күндері өтті. Семей қаласы мен Тарбағатай ауданындағы алшақтыққа қарамастан, әріптестік байланыс тығыз орнаған. Аудан мен қала арасындағы қарым – қатынасты жаңа деңгейге көтеру мақсатында ұйымдастырылған ауқымды іс-шара аясында аудан әкімі Ділдабек Оразбаев Семей қаласында тұратын тарбағатайлық аға буын өкілдері және студенттерімен кездесу өткізсе, аудан кәсіпкерлері жәрмеңкеде өнімдерін саудалады. Ал тәуліктің екінші жартысында Тарбағатай ауданы күндері мерекелік концертпен жалғасын тапты.
«Солтүстік» сауда-логистикалық орталығында ұйымдастырылған жәрмеңкеде ауданның 17 ауылдық округінің шаруа қожалықтары өз өнімдерін ұсынды. Семейліктерге жылқы, сиыр, қой еттері мен балықтың әр түрі, сондай-ақ сүт өнімдерін аудан кәсіпкер-лері тікелей саудалауға мүмкіндік алды. Жұма күнгі жұмыс күніне қарамастан, логистикалық орталықтың залында сауда қызу жүрді. Айта кету керек, орталықта Тарбағатай ауданының шаруалары өз өнімдерін алғаш рет саудалауда.
— Жалпы, жәрмеңкеге 4 тонна сиыр етін, 2 тонна қой етін,1 тонна жылқы етін және 2 тонна балық әкелдік. Барлығы төмен бағамен саудалануда. Бұл семейліктерді сапалы, арзан ет өнімдерімен қамтамасыз ету мақсатында жасалып отыр,- дейді аудан әкімінің орынбасары Қайрат Моуадинов.
Тарбағатай ауданына қарасты Жаңаауыл ауылдық округінен келген кәсіпкер Ақерке Оралбаеваның айтуынша, сиыр еті 1000 теңгеден, қой еті 900 теңгеден саудаланыпты.
Айта кету керек, бұған дейін Семейге іргелес аудандардың шаруа қожалықтары ғана келсе, енді олардың қатарына Тарбағатай ауданы қосылды. Алдағы уақытта қала мен аудан басшылықтарының келісімдерімен мұндай жәрмеңкелер тұрақты түрде өткізіліп тұрмақ. Бұл жайында қала әкімі Ермак Сәлімов былай деп пікір білдірді:
— Тарбағатайлықтардың Семейдегі күндері алғаш рет өтуде. Мұнда олар тек жәрмеңке өткізу үшін ғана келген жоқ. Бағдарламаларына сәйкес, жерлестерімен, студенттермен кездесулер өткізіп, концерттік бағдарлама ұсынбақ. Аудан басшылығымен жақсы қарым-қатынаста боламыз деген үміттемін. Семейліктер осы орталықта демалыс сайын өткізілетін ауыл шаруашылығы өнімдерінің жәрмеңкесіне үйренген. Өндіруші мен тұтынушы арасындағы тікелей байланыс екі жаққа да тиімділігін дәлелдеді. Сапалы өнімді тиімді бағамен алған тұтынушының бұл жағдайда алыпсатарлардың ұсынысынан бас тартары анық,- дейді қала әкімі Ермак Сәлімов.
Таза әрі табиғи өнімге қол жеткізген қала тұрғыны Бәтима Төкенқызы көксерке балығының келісін 850 теңгеден алыпты. Бәтима апай Зайсан көлінің балықтары экологиялық тұрғыдан таза және өте дәмді болады деп есептейді. «Басқа жерде алыпсатарлар тұрады. Мұнда өз бағасына аласың»,- дейді бұл ретте қала тұрғыны Б.Төкенқызы.
Сауда-логистикалық орталық жетекшілерінің айтуынша, ауылшаруа-шылық жәрмеңкесі алдағы уақытта да жалғасады. Ол үшін облыстың шалғай және жақын орналасқан аудандары, белгіленген кестеге сай, жәрмеңкеге қатысатын болады.
Белгіленген бағдарламаға орай, Тарбағатай ауданының әкімі Ділдабек Оразбаев Семей қаласының жоғары оқу орындары мен колледждерінде оқитын студенттермен Шәкәрім атындағы мемлекеттік университетінде кездесу өткізді. Аудан мекемелеріндегі, шаруашылықтарындағы бос жұмыс орындарының жәрмеңкесі де осы оқу ордасында ұйымдастырылды. Алпысқа жуық болашақ мамандар тиісті мекеме басшыларымен келісімшарт жасасып, алдағы жылы ауылға барып жұмысқа орналасуға бекем бел буды.
Университеттегі кездесуді осы білім ордасының ректоры Мейір Ғариполлаұлы Ескендіров алғы сөз сөйлеп ашты. Өз сөзінде ол Тарбағатай ауданының әкімі Ділдабек Тәжібайұлы білікті басшы ғана емес, таяуда ауыл шаруашылығы ғылымдары саласында диссертация қорғап, ғалымдар сапына қосылғанын да атап өтті. Кездесуге, студенттер мен қатар, сонау бір жылдары Тарбағатай өңірінде еңбек еткен ардагерлер де көптеп келген екен. Жиналғандар алдында баяндама жасаған аудан басшысы өңірдің әлеуметтік-экономикалық дамуының негізгі бағыттары, қол жеткен жетістіктер жөнінде кеңінен мағлұмат берді.
— Студент жастармен, ардагерлермен осындай кездесулер өткізу дәстүрге айналды. Биыл осында үшінші рет бас қосып отырмыз. Ондағы мақсатымыз — жастарды ауылға барып жұмыс істеуге шақыру; кезінде ауданда ел игілігі үшін аяндай еңбек еткен, ел басқарған, сол елдің қалыптасуына үлес қосқан ардагерлерімізбен ақылдасып, алдыға қойған қандай жоспарларымыз бар, олар қалай орындалып жатыр деген мәселелер бойынша ой бөлісу,- деді Ділдабек Оразбаев.
Ауданның соңғы үш-төрт жыл бедеріндегі жетістіктерін нақты цифрлармен термелеп айтқан аудан басшысы бұл табыстарға кезінде осы кездесуге қатысып отырған еңбек ардагерлері бастап беріп кеткен жоспарларды жалғастырып, жұмыс істеу арқылы қол жеткенін атап көрсетті.
— Құрметті ардагерлер, ақ сақалды аталарымыз, ақ самайлы аналарымыз, сіздер қалап беріп кеткен іргетас, бастап беріп кеткен жұмыстарыңызды жалғастырып, былайша айтқанда, эстафетаны алға қарай апара жатырмыз. Мемлекет басшысының белгілеп берген бағдарламаларын қарапайым халыққа жете түсіндіру арқылы, солардың жүзеге асырылуын қамтамасыз ету нәтижесінде жетістіктерге қол жеткізудеміз. Соңғы төрт жылда ауданымызда ауыл шаруашылығы өнімдерін өндіру көлемі 2012 жылмен салыстырғанда 160 пайызға өсіп отыр. Мал өсіру, егіншілікті дамыту қарқыны артты. Мал тұқымын асылдандыру жағынан республикада алдыңғы қатарлы орында келеміз. Аудандағы 55 елді мекенді мамандарымыз аралап, Елбасының өндірісті дамыту жөніндегі бағдарламаларының мәнін халыққа жақсылап терең түсіндіруі нәтижесінде соңғы үш-төрт жылда Тарбағатай ауданы 1 млрд. 337 млн. теңгеге асыл тұқымды мал сатып алды. Бұл ретте мал бордақылау жұмысын жетілдіру жедел қолға алына бастады. 2013 жылы ауданда 24 жерде мал бордақыланса, қазір 332 жерде бордақыланады. Ауданда Қарғыба, Базар, Тебіске сияқты өзендердегі су тоспаларын жөндеу арқылы суармалы жерді игеру жұмыстары жалғастырылуда. Суармалы алқаптың көлемін арттыру, онда элиталы тұқымдар әкеліп егу, шаруашылықтардың ғылыми-зерттеу орталықтарымен байланысын нығайту, тамшылатып суару тәсілін меңгеру шаралары тиісті жемістерін беріп отыр. Биыл егіс дақылдарының әр гектарынан 22 центнерден өнім алуға қол жеткіздік. Картоп, сәбіз, қауын-қарбыз сияқты өнімдерді енді шеттен тасымайтын болдық. Ауданда 20 жылыжай жұмыс істеп тұр.
Әлеуметтік салалар да қарышты қадаммен дамып келеді. Барлық ауылдарға жол салынды. Ақсуаттың ішіндегі жиырма көше асфальтталды. Алдағы жылы барлық көшені асфальттап, карусель, бассейн салу жоспарымызда бар. 40-50 жыл жөндеу көрмеген 20 мектеп күрделі жөндеуден өтіп, барлық ауылдарда балалар бақшасы іске қосылды. Елбасы, «Балапан» бағдарламасы бойынша, 2020 жылға дейін балаларды мектеп жасына дейінгі білім ордаларына қамту міндетін алға қойса, біздің ауданымызда бұл міндет 2017 жылы толық орындалады деген сенімдеміз. Егер осындай даму қарқынымыз сақталатын болса, төрт-бес жылда Тарбағатай ауданы өңірдегі ең бай аудан болады деп сенімді түрде айта аламыз,- деді Ділдабек Оразбаев.
Кездесуде жоғары оқу орындарының алдыңғы қатарлы бір топ студенттеріне Тарбағатай ауданының әкімі алғыс хаттар тапсырды. Сонымен қатар аудан басшысы ардагер аналарды «Тарбағатайдың Алтын анасы», ақсақалдарды «Тарбағатай ауданының Құрметті азаматы» атағымен марапаттап, «Еңбек ардагері» медалін тапсырды.
Кездесуде Нәсен Ибраев, Болат Сапоров, Мақан Айтжанов сынды ақсақалдар аудан басшысына алғыс сезімін білдірді
Түстен кейін Мәдениет сарайында концерт берілді, концерттен соң қала әкімінің орынбасары Қайрат Ерембесов сөз сөйлеп, қала басшылығы атынан тарбағатайлықтарға алғыс айтты. Сонымен қатар ол қала әкімі Ермак Сәлімовтің атынан Тарбағатай ауданының әкімі Ділдабек Оразбаевқа жазушы Медеу Сәрсекенің Семей ядролық сынақ полигонының жабылуының 25 жылдығы қарсаңында шыққан кітабын сыйға тартты.
Хамза СӘТИЕВ, «Семей таңы»