Қарашаның 23 күні шаһардағы ҚР ҰҚК Шекара қызметінің 2098 әскери бөлімінде, ел Тәуелсіздігінің 25 жылдық мерейтойына орай, арнайы тақырыптық жиын болып өтті. «25 жұлдызды күн» акциясы аясында ұйымдастырылған шара мемлекеттік шекара күнімен тұспа-тұс келіп, оған әскери бөлімнің басшысы — полковник Ерлан Ибрагимов пен жеке құрам қызметкерлері толық қатысты.
21-ші қараша мен 15-ші желтоқсан айы аралығын қамтитын «25 жұлдызды күн» акциясының көздеген мақсаты — еліміздің ширек ғасырда жеткен жетістіктері мен ел өміріндегі айтулы оқиғаларды саралау. Сондай-ақ қазақстандықтардың достығы мен бірлігін нығайтып, этносаралық келісімді қамтамасыз ету болып табылады. Осы ел тыныштығы мен халықтың қауіпсіздігін сақтауда әрі мемлекет шекарасының тұтастығын қорғауда Шекара қызметінің орны бөлек. Шекара қауіпсіздігін қамтамасыз ету әрбір мемлекет үшін маңызды болып саналатыны белгілі. Қазақ жерінде бұл жауапкершілік ҚР Ұлттық Қауіпсіздік комитеті Шекара қызметіне артылғанын айта кету керек. Бүгінде шекара сақшылары өздеріне жүктелген міндетті абыроймен атқарып келеді. Отанымыздың тұтастай аумағын қорғауды абыройлы міндет деп санайтын шекарашылардың әр күні түрлі қауіптер мен қиындықтарға толы екені жасырын емес. Мәселен, Ұлы Дала қиыр шығысында аспан асты Қытай елімен шектесіп жатса, солтүстік пен батыс аймағында алып Ресей Федерациясымен көршілес. Сонымен қатар оңтүстікте, бауырлас Қырғызстан, Өзбекстан, Түрікменстан мемлекеттерімен қатар, Каспий теңізі арқылы Әзірбайжан және Иран елдерімен түйісіп отырғанын ұмытпаған абзал. Елбасының тапсырмасына сәйкес, шекара қызметін дамыту бойынша кешенді жоспар әзірленіп, қазірде ол біртіндеп жүзеге асырылып жатқаны мәлім. Айтулы жиын барысында сөз алған 2098 әскери бөлімі командирінің тәрбие ісі жөніндегі орынбасары, майор Нұржан Қуатов ҚР Тәуелсіздігінің 25 жылдық мерейтойының маңыздылығына тоқталып, ел егемендігі мен оның аумақтық тұтатыстығын сақтауда шекарашылардың қосқан үлесі аз болмағанын тілге тиек етті. Бұған қоса бөлім басшысының тәрбие ісі жөніндегі орынбасары бір топ қызметкерлерге мақтау қағаздары мен ақшалай сыйлықтар табыстады, көпшілік отандық шекарашылар жайлы арнайы бейнефильмді тамашалады. Бұл күнге жоспарланған өзге де іс-шаралар туралы бізге ҚР Ұлттық Қауіпсіздік комитеті Шекара қызметінің 2098 әскери бөлімінің тәрбие ісі бойынша офицері, капитан Тілектес Оспанбаев айтып берді. — Бүгін Шекара қызметінің барлық әскери бөлімдерінде тақырыптық кештер мен мерекелік концерттер өткізілетін болады. Мұның барлығы ел аумағын аса қырағылықпен күзетіп келе жатқан айбынды сарбаздарымыздың еңбектерін елеуге бағытталып отыр. Қазіргі уақытта Шекара қызметінің жауынгерлері Жоғарғы Бас Қолбасшы қойып отырған міндеттер мен тапсырмаларды лайықты орындап келеді деуге толық негіз бар. Біз өзімізге артылған сенімге аса жауапкершілікпен қараймыз,- деп түйіндеді өз сөзін капитан Т.Оспанбаев.
Жақсылық МҰРАТҚАЛИҰЛЫ, «Семей таңы»
