Мемлекет басшысы ұсынған «100 нақты қадам» Ұлт жоспарына сәйкес, 2017 жылдың бірінші жарты жылдығында мемлекеттік аппаратты кәсібилендіру кезеңінің бірі – мемлекеттік қызметкерлерді кешенді аттестациялаудан өткізу. Осыған байланысты 19 қаңтар күні ҚР Мемлекеттік қызмет істері және сыбайлас жемқорлыққа қарсы іс-қимыл агенттігінің ШҚО бойынша департаментінің басшысы Бахтияр Камаловтың қатысуымен мемлекеттік қызметкерлерді аттестациядан өткізу тәртібі, сынақтан өткізудің мәні жайында айтылған кездесу өтті.
2017 жылғы 1 ақпан мен 1 шілде аралығында «Б» корпусының әкімшілік мемлекеттік қызметкерлерін аттестациялау жүргізілмек. Бахтияр Камаловтың айтуынша, өткен жылғы аттестациямен салыстырғанда бұл жолғы аттестациялау бір реттік әрі кешенді сипатта өтеді. Сонымен бірге заңнаманы білу деңгейін тексеретін тестілеу болмайды. Оның орнына арнайы автоматтандырылған бағдарламаның көмегімен мемлекеттік қызметкерлердің біліктілігі мен құзыреттілігі тексеріледі.
— Аттестациялаудың мақсаты — мемлекеттік қызметкерлердің кәсіби біліктілігін тексеру ғана емес, олардың қызметтік мансабының өсу деңгейін анықтау. Сол себепті «ҚР мемлекеттік қызмет туралы» Заңында айтылғандай, аттестациялық комиссия қызметкердің лауазымын жоғарылату шешімін қабылдай алады. Аттестация атқарып отырған қызметіне байланысты үш кезеңнен тұрады,- дейді департамент басшысы.
Кешенді тестілеуден өтетін «Б» корпусының мемлекеттік қызметкерлерінің тізіміне мыналар жатады: республикалық деңгейде — министрлік сарапшысынан департамент директорына дейін, облыстық деңгейде — жергілікті және аймақтық басқармалардың маманынан бастап жетекшісіне дейін, аудандық деңгейде — аудандық әкімшіліктің жетекші маманынан әкім орынбасарына дейін.
Облыс бойынша аттестациялаудан өтетін мемлекеттік қызметкерлер саны – 5873. Ал декреттік демалыстағылар, жүкті әйелдер мен 2-3 жастағы балалары бар аналар, 4 жасқа дейінгі балалары бар жалғыз басты аналар мен әкелер аттестациялаудан босатылады. Бұл топқа жататындар саны облыс бойынша 1400 адам. Жалғыз басты аналарға, некеде тұрған немесе тұрмағанына қарамастан, әкесіз бала тәрбиелеп отырған аналар да жатады. Сондай-ақ зейнет жасындағылар тестілеуге қатыса алмайды. Бұл ретте облыс бойынша 362 мемлекеттік қызметкер тіркелген. «А» корпусына кадрлық резервте тұрған мемлекеттік қызметкерлер мен мемлекеттік қызметте 6 айдан аз уақыт қызмет еткендер де тестілеуге қатыспайды.
Мемлекеттік қызметкерлерді кешенді тестілеуге мораторий жоқ. Сондықтан өзге де халық тестілеуге қатысып, бағын сынай алады. Еңбек кодексінің 1- тармақ, 53 — бабына сәйкес, зейнет жасына екі жылдан аз уақыт қалған мемлекеттік қызметкердің аттестациялау қорытындысы бойынша басшылықтың еңбек шартын бұзуына жол берілмейді.
— Мемлекеттік қызметте біраз уақыт үзіліс жасағандар, қызметке тағайындалғанына қанша уақыт болғанына қарамастан, жалпы негіздер бойынша тест тапсырады. Ал тестілеуден босатылғандар тиісті орындардан ресми түсініктеме немесе анықтама әкелуі керек. Еліміз бойынша барлық өңірлерде аттестациялауға дайындық жұмыстары ұйымдастырылып, желілік кесте жетілдірілді. Тестілеуге қатысты барлық ақпараттар kyzmet.gov.kz сайтында орналастырылған. Ал мемлекеттік қызметтегі ауыс-түйіс тестілеу аяқталғаннан кейін ғана жүреді. Ал уақытша қызметте жүргендер аттестация комиссиясының шешімін күтпей-ақ тестілеуге қатыса алады,- деп атап өтті Бахтияр Камалов.
Айта кетейік, кешенді аттестациялау үш сатыда жүзеге асырылмақ: бірінші кезекте мемлекеттік қызметкер туралы басшылық тарапынан арнайы бағалау парағы толтырылады. Екінші кезеңде мемлекеттік қызметкер кәсіби біліктілігін тексеру мақсатында тест тапсырса, соңғы және қорытынды кезең – әңгімелесу. ШҚО бойынша аттестациялау Өскемен қаласындағы Қазақстан көшесі, 36 мекенжайында өтетін болады.
Жадыра ТӨЛЕГЕНҚЫЗЫ, Семей қаласы.
