АЗЫҚ – ТҮЛІК БАҒАСЫ БАҚЫЛАУҒА АЛЫНДЫ
Мемлекет басшысы Н.Ә.Назарбаев Үкімет және Ұлттық Банк қабылдаған дағдарысқа қарсы жоспар аясында әлеуметтік маңызы бар тауарлар бағасының негізсіз өсуіне жол бермеуді мықтап тапсырғаны баршаға мәлім. Осы ретте Үржар ауданында аудан әкімі Серік Зайнулдиннің төрағалығымен аудандағы баға тұрақсыздығына байланысты арнайы жиын өтті. Жиында азық-түлік бағасының қымбаттауына қатысты мәселе қаралып, бірқатар ауылдық округ әкімдері сынға ілікті.
Әлеуметтік маңызы бар макарон өнімдері, көкөніс пен жеміс-жидектер, ет және сүт өнімдері, жұмыртқа және тұз сынды 33 түрлі халық күнделікті тұтынатын бірінші қажеттегі тауарлар халыққа қолжетімді болуы керек. Аудан орталығындағы халыққа қызмет көрсетіп отырған «Гүлназ» азық-түлік сауда дүкенінің бағалары қолжетімді. Бірқатар ауылдық округтердің жеке кәсіпкерлері тауарларды осы сауда дүкенінен алады. Алайда кейбір ауылдық округтерде саудагерлер халыққа тауар бағасын негізсіз өсіріп ұсынып отырғанын аудан әкімі атап өтіп, бағаның бас жібін босатып жіберген бірқатар ауыл әкімдерін сынға алды.
— Осыған байланысты ауданда тәуелсіз комиссия құрылған, комиссия мүшелері 27 ауылдық округтегі азық-түліктің бағасын көріп шықты. Жалпы, халықтың әл-ауқаты жылдан-жылға жақсарып келеді. Дегенмен төмен деңгейде отырған жанұялар да жоқ емес. Сол себепті қарапайым шаруадан бастап кәсіпкерлерге дейін өзара қарым-қатынаста, түсіністікпен жұмыс істеуіміз керек. Азық-түлік пен жанар-жағармайдың бағасы негізсіз шарықтамай, өзінің есебіне байланысты ғана қосылуы керек. Мысалы, Катонқарағай ауданында жеке кәсіпкер Александр Матасов жергілікті халыққа нанның бағасын 25 теңгеден ұсынып отыр. Ал біз 50 мың гектарға дәнді астық ектік, тұрақтандыру қорын құрдық. Алайда баға әр округте әрқалай. Мысалға алатын болсақ, Көктерек ауылдық округінде нанның бағасы 52 теңге, ал Мақаншыда АИ-93 маркалы бензиннің бағасы 140 теңге болса, пастерленген 2,5 пайыздық сүттің бір литрі 125 теңге,- деген Серік Зинабекұлы әр ауылдық округтің әкімі өзінің қарамағындағы дүкендердегі бағаның негізсіз өсуіне тосқауыл қойып, бақылауда ұстауға тиіс екендігін қатаң ескертті.
Айтылған мәселелердің барлығы назарға алынып, атқарылған жұмыстар нәтижелі болуы керектігін де аудан әкімі жиын барысында қадап айтты. «Өткен жылдың қорытындысы бойынша, Үржар ауданы облыс көлемінде бесінші орынға шықты. 8 млрд-тан астам қаржы толығымен игеріліп, салық бойынша тапсырмалар орындалды. Ал салықтың түсімі — ол ауданымыздың өсіп-өркендеуі. Демек, істелген жұмысымыз аз емес. Алда атқаратын қыруар жұмыстар бар. Соның бірі, әлбетте, бағаны бақылауда ұстау»,- деді аудан басшысы. Сонымен қатар аудан әкімі Серік Зайнулдин «Төрлет» нан пісіру цехының басшысы Мұхаметжан Ақпековке аз қамтылған отбасыларға нанның бөлкесін 50 теңгеден — арзандатылған бағамен беру туралы ұсыныс айтты.
Жиын соңында Серік Зинабекұлы әр ауылдық округ әкімі он күн сайын азық-түлік бағасы жөнінде есеп беріп отыруы керектігін, аудан әкімінің орынбасары Құсайын Сейітқанов пен ауыл шаруашылығы және кәсіпкерлік бөлімінің басшысы Тәуіржан Шомановқа бірлесе отырып бағаға бақылауды күшейтуге тапсырма жүктеді.
Бауыржан ЖАҚЫП, «Семей таңы»
